Miqueas 4 - Bible in Tzotzil de Chenalhó with Deuterocanon

Ta to spas mantal ta sbejel banamil li Muc'ul Diose

¹ C'alal slajebaltic xa batel c'ac'ale, li vits yo' bu oy xch'ulna Muc'ul Diose ja' no'ox stuc toyol vits ta xc'ot; ja' no'ox stuc toyol ta xc'ot ta scotol li yantic vitsetique. Ja' te ta xtalic ta stojol li cristianoetic ta yantic lume.

² Ep yantic banamil ta xtalic, jech chalic: “La'ic me, muycutic batel ta vits yu'un li Muc'ul Diose; batic ta xch'ulna li Dios yu'un Jacobe. Jech xu' chixchanubtasutic ta stamel li be yu'une, jech xu' cu'untic ta jtambetic o batel li be yu'une”, xiic. Yu'un ja' te ta vits Sión ta xloc' tal li chanubtasel yu'un Muc'ul Diose; ja' te ta Jerusalén ta xlic tal li mantal yu'une.

³ Ja' ta xchapan li jujun lume; ja' ta stuq'uibtas li jujun banamil ti toj tsotsique, xchi'uc c'alal to ti bu nomtic oye. Li yespadaique ta xlic spasic ta azarona; li slanzaique ta spasic ta joz. Jech mu'yuc xa ta smil sbaic ta espada li muc'tic lumetique; mu'yuc xa ta xich'ic chanubtasel ta sventa paspleito.

⁴ Jun xa yo'nton te chotajtic chcuxic ta yolon ts'usubtic xchi'uc ta yolon higotic yu'unic. Mu'yuc xa boch'o chtal sibtasaticuc, yu'un jech chal stuc li Muc'ul Dios ti tspas ta mantal scotol te ta vinajele.

⁵ Ac'o me scotol cristianoetic ta yantic lum ja' chich'ic o ta muc' li diosetic yu'unique, pero li vu'utique sbatel osil ja' chquich'tic o ta muc' li Muc'ul Dios cu'untique.

Ta to x'ic'atic sutel tal ta Sión li israeletic ti chucbilic batel ta yantic banamile

⁶ Jech chal li Muc'ul Diose: “C'alal me la sta sc'ac'alile, ta to xlic jtsobic li jchijtac ti coxoique, ti oy lubel cha'yic ta scoj ti nutsbil ibatique, ti vu'un laj cac'be svocolique.

⁷ Li coxoetique ja' xa scomelal Israel ta xc'otic; li boch'o nom chucbil ibatique ta xcac' pasuc ta jun muc'ta tsatsal lum. Vu'un li Muc'ul Diosune te ta jpas mantal o ta stojolic ta vits Sión li' ta ora xchi'uc c'alal to ta sbatel osil.

⁸ Jerusalén, vo'ot li toyol q'uelub osilot yu'un avu'untaque, ti tsatsal coraltonot yu'un li jnaclumetic ta Sione, ta xc'ot ta atojol yan velta ti vo'ot muc'ta lum chac'ot jech chac c'u cha'al muc'ta lumot to'oxe; vo'ot chaventain li jnaclumetic ta Jerusalene”, xi li Diose.

⁹ Ja' yu'un, ¿c'u yu'un ti toj tsots cha'avan jech chac c'u cha'al jun ants ti liquem xa xc'uxul xch'ute? ¿Me yu'un mu'yuc xa ajvalil avu'un? ¿Me yu'un icham xa li jbijubtasvanej avu'une?

¹⁰ Lum Sión, ayetan, viquetan ta oq'uel jech chac c'u cha'al jun ants ti liquem xa xc'uxul xch'ute, yu'un ta xa xloc' batel li' ta atojol li jnaclumetic avu'une. Ta jamalaltic xa no'ox chnaquiic c'alal to chc'otic ta Babilonia. Pero ta to xich'ic coltael yu'un li Muc'ul Diose; ta to xich'ic pojel loq'uel ta sc'ob li yajcontraique.

¹¹ Li' ta orae toj ep xa banamiletic stsoboj sbaic sventa chascontrainicot, jech chalic: “Ta to jq'ueltiquic c'u x'elan soquem chcom sc'oplal li lum Sione; ta to xquil ta jsatic c'u x'elan li svocole”, xiic.

¹² Pero li stuquique mu sna'ic c'usi snopoj, mu sna'ic c'usi xchapanoj li Muc'ul Diose; mu sna'ic ti chich'ic tsobel jech chac c'u cha'al chich' tsobel chucbil trigo ta yav smajubile.

¹³ “Lum Sión, lican me, tec'o li trigo jech chac c'u cha'al tspas li vacaxe, yu'un li axulube ta xcac' c'otuc jech chac c'u cha'al tsatsal taq'uin; li avoye ta xcac' c'otuc jech chac c'u cha'al bronce, jech chlic aju' ta teq'uel ep lumetic. Li c'usitic chapoje chavoc' sventa chavac'bun ta jtojol, vu'un li Muc'ul Diosune; li sc'ulejalique ja' cu'un o chc'ot, vu'un li Ajvalilun ta sbejel banamile”, xi li Diose.