Miqueas 3 - Bible in Tzotzil de Chenalhó with Deuterocanon

Sc'oplal chopol jpasmantaletic

¹ Jech chcal: A'yo ava'yic, jpasmantaletic ta stojol smomnich'nab Jacob, banquilaletic ta stojol smomnich'nab Israel, ¿Me mu ja'uc oy ta aventaic spasel li c'usitic tuq'ue?

² Pero li vo'oxuque ja' chac'anic li c'usitic chopole; ja' abajojic li c'usitic leque. Chacho'beic loq'uel c'alal ta snuculil ya'yel li jteclumale; yu sbaquil xa telel chcom avu'unic.

³ Cuxul chati'beic sbec'tal ya'yel li jteclumale; chacho'beic loq'uel snuculil, chavoch'beic c'alal ta sbaquiltac; chabojilanic jech chac c'u cha'al ti'bol chapanic ta bin.

⁴ Ta to xa'avanic ta sc'opanel li Muc'ul Diose, pero mu'yuc chastac'boxuc. Ta sc'ac'alil le'e, ta snac' sat ta atojolic ta scoj ti toj chopol li avabtelique.

Jlo'lavanej j'alc'opetic

⁵ Li j'alc'opetic ti chaq'uic ch'ayuc ta be jteclumale jech chalic: “Ich'ic bendición”, xutic li boch'otic chaq'uic lec ve'lile; yan li boch'otic mu'yuc c'usi chaq'uique “tsaquic ta pleito”, xi sc'oplal yu'unic. Ja' yu'un vu'un li Muc'ul Diosune jech chcal ta sventa li j'alc'opetic le'e:

⁶ “Mu'yuc xa c'usi ch-ac'bat yilic o ta ac'ubaltic ti c'alal chvayique; ta xc'ataj o ta ic' osil li c'usi ch-ac'bat to'ox sna'ique. Li c'ac'ale ta xbat o ta stojolic; li sac osile ta x'ic'um ta stojolic”, xcut.

⁷ Yalem ta q'uexlal chcomic o li j'alc'opetic le'e; mu'yuc stu chcomic o. Macal chcom yeic ta sventa ti mu xa xtac'batic o yu'un Diose.

⁸ Yan li vu'une noj chicom ta svu'el li espíritu yu'un Muc'ul Diose, xchi'uc noj chicom ta sventa c'usitic tuc' xchi'uc ta sventa stsatsal co'nton, yu'un jech xu' chcalbe c'u x'elan stoyobbail li Jacobe, xchi'uc c'u x'elan smul li Israele.

⁹ A'yo ava'yic, jpasmantaletic ta stojol smomnich'nab Jacob, banquilaletic ta stojol smomnich'nab Israel, vo'oxuc ti chabajic li c'usitic tuq'ue, xchi'uc ti chayanijesic li c'usitic leque.

¹⁰ Ta puru milvanej va'al avu'unic li vits Sione, xchi'uc ta puru chopol chapanel va'al avu'unic li lum Jerusalene.

¹¹ Yu'un li jchapanvanejetic tee ta puru taq'uin chchapanvanic; li paleetique ta puru tojbil chchanubtasvanic; li j'alc'opetique ta taq'uin chalic li c'usi chc'ot ta pasele. Chalic ti ja' chcoltaatic yu'un Diose, jech chalic: “Li' xchi'inojutic li Muc'ul Diose; mu'yuc c'usi chopol chtal ta jtojoltic”, xiic.

¹² Ja' yu'un vo'oxuc ta amulic ti xco'laj xchi'uc locbil banamil chcom li Sione, ti puru tontic xa te busul chcom ta Jerusalene, xchi'uc ti chpix ta chopol ts'i'laletic li vits yo' bu oy ch'ulnae.