Miqueas 2 - Bible in Tzotzil de Chenalhó with Deuterocanon

Abul sbaic li boch'otic chuts'intaic me'onetique

¹ Toj abul sba li boch'otic te tsnopilanic c'usitic chopol tspasic c'alal mochol ta svayabique. C'alal tsacub osile, chbat xa spasic o, yu'un xu' yu'un tspasic li c'usi tsc'an yo'ntonique.

² Xpich'et no'ox yo'ntonic yu'un li yosil xchi'ilique, jech chbat spojic; chac xa yu'unuc ya'yic li sna xchi'ilique, jech chbat spojic noxtoc. Chuts'intaic li xchi'iltaquique; chac'beic svocol c'alal ta yajnil xnich'nab, xchi'uc tspojbeic li c'usitic ac'bil comel yu'un stot sme'e.

³ Ja' yu'un li Muc'ul Diose jech chal ta sventaic: “Oy xa c'usi chopol jchapanoj ta aventaic ec; ta xcac' tal tsots vocol ta atojolic. Cuchul xa no'ox anuc' chaxanovic, yu'un mu xa xu' avu'un xateltun chaxanovic, yu'un chtal chopol ora ta atojolic.

⁴ C'alal me la sta li sc'ac'alil le'e, ta to xaq'uejintaic q'ueoj ta sventa oq'uel, jech chavalic: ‘Jcotoltic lijlajutic o; li Diose laj xa sjelbe o yajval li jlumaltique. ¡C'uxi bat spojbutic li cosilaltique! Ja' xa laj yac'be, la svoc'be sbaic li cajcontratique’, xachiic to”, xi li Diose.

⁵ Ja' yu'un li vo'oxuque mu'yuc chavich' bisbel avosilic ti c'alal tsvoc'be sba yosilic yan velta li steclumal Muc'ul Diose.

Jlo'lavanej j'alc'opetic

⁶ “Mu c'usi xtal avalbun ca'icutic; mu xistauncutic li tsots vocole”, xutic li boch'otic chalic c'usi chc'ot ta pasele.

⁷ Vo'oxuc li smomnich'naboxuc Jacobe, jech chavalbicun: “¿Me chanop ti chopol chil Muc'ul Dios li smomnich'nab Jacobe? ¿Me yu'un laj xa smuc'ul yo'nton li Diose? ¿Me ja' jech ch-abtej Dios jech chac c'u cha'al chavale? ¿Me mu oyuc c'usi lec tsta c'alal chc'opanat yu'un Dios li boch'o tuq'uil be stamoje?”, xachiic.

⁸ Jech chal li Muc'ul Diose: “Li vo'oxuque chacontrainic xa li jteclumale; chapojbeic sc'u' noxtoc li boch'otic te chjelovique. Ja' jech chapasbeic jech chac c'u cha'al avajcontraic ti c'alal oy muc'ta c'ope.

⁹ Li antsetic yu'unic li jteclumale chajipic loq'uel ta snaic ti c'alal jun yo'nton te nacalique, xchi'uc chapojbeic li slequilal yalabic chcac'beique.

¹⁰ Ja' lec totsanic, xanovanic batel, yu'un mu ja'uc xcuxubil avo'ntonic li'i, yu'un isoc xa li banamile, ibolib avu'unic ta jyalel ta scoj li amulique.

¹¹ Me oy boch'o chlic snop epalc'op, me jech chlic yale: ‘Vu'un ta xcal ti lec to chloc' avu'unic pasem ya'lel ts'usub xchi'uc c'usitic lec tsotsic ta uch'el’, me xie, le'e ja' j'alc'op yu'unic li cristianoetic li' ta lume.

Li Diose ta to xlic stsob li steclumale

¹² “Ta melel ta to xlic jtsob scotol li smomnich'nab Jacobe; ta to xlic quic'an tal li scomelal smomnich'nab Israele. Ta xlic jtsobic, ja' jech chc'otic jech chac c'u cha'al chijetic ta scoral; ja' jech chc'otic jech chac c'u cha'al stsobol-tsobol chijetic ta sve'ubic. Li' ta banamile ta to xvinaj xvochetic epal cristianoetic.

¹³ Vu'un ba'yucbeun yu'unic; ta jambe tal sbeic. Ta xloq'uic tal ta ti'coralton; te nabalic tal ta jpat vu'un li ajvalilun yu'unique”, xi li Diose.