Miqueas 1 - Bible in Tzotzil de Chenalhó with Deuterocanon

Li Diose ta xchapan Samaria xchi'uc Jerusalén

¹ C'alal yorail i'ochic ta ajvalilal ta Judá li Jotam, Acaz, xchi'uc Ezequiase, li Miqueas liquem ta Moresete ja' yorail ic'opanat yu'un li Muc'ul Diose. Ja' i'ac'bat yil c'u x'elan sc'oplal li Samaria xchi'uc Jerusalene.

² Lumetic, a'yo ava'yic acotolic. Banamil, tuc'ulano lec ava'ay achi'uc li jnaclumetic avu'une: Li Cajvaltic Muc'ul Dios te oy ta xch'ulnae, ja' tsva'an sba ta testigo sventa chascontrainoxuc.

³ Ja' stuc ta xloc' tal ta sna ti bu oye; ja' chtal xpech'an ta teq'uel li toyol vitsetic li' ta banamile.

⁴ Li muc'tic vitsetique ta x'unij ta yacan jech chac c'u cha'al chab ti ch-unij ta c'oq'ue; ta xbein yalel ta stenlejaltic jech chac c'u cha'al vo' ti chch'ac batel sbee.

⁵ Ti jech chc'ot ta pasele, ja' ta scoj stoyobbail li Jacobe; ja' ta scoj smul li smomnich'nab Israele. ¿Bu oy li stoyobbail Jacobe? ¿Me mu ja'uc te ta Samariae? ¿Bu oy li toyol c'opojebaletic yu'un Judae? ¿Me mu ja'uc te ta Jerusalene?

⁶ Ja' yu'un jech chal li Muc'ul Diose: “Li lum Samariae ta jyavnaijes o, puru tontic xa te sbusul-busul chcom; chcom ta bats'i banamil sventa chich' ts'unel o ts'usubtic. Ta jves batel ta soplejaltic li tonetic sventa naetique; jeche' t'anal chcom cu'un li snaclebtaque.

⁷ Li c'usitic scuyoj ta sdiosique ta jlilin scotol; li te'etic yich'ojic ta muq'ue ta xcules scotol. Jech noxtoc li matanaletic chaq'uic ta stojol sdiosique ta jchic' ta c'oc' scotol. Yu'un ta smoton taq'uin jmulavil antsetic la spasic o, jech ta staq'uin jmulavil antsetic ta xbat cu'un noxtoc”, xi.

Ta xat yo'nton Miqueas

⁸ Ja' yu'un ta xi'oc', ta xi'avan; jeche' xbixbun cacan, jeche' xit'ant'un chixanov. Li' chime'on oc' jech chac c'u cha'al oq'uil; li' xi'av-un jech chac c'u cha'al unin avestruz mut.

⁹ Yu'un li xchamel Samariae mu stac' poxtael; ipuc batel c'alal ta Judá; ic'ot c'alal to ta jlumal, ja' li Jerusalene.

¹⁰ Mu me xavalic batel ta stojol cajcontratic ta lum Gat; mu me xavac'beic yil ti cha'oq'uique. Te no'ox baletanic ta pucuctic ta Bet-le-afra.

¹¹ Jnaclumetic ta Safir, batanic ta chuquel ta yan banamil; q'uexovan ava'yic, yu'un jeche' t'anal chabatic. Li boch'otic te nacalic ta Zaanane mu xu' chloq'uic. Te ta Bet-esele toj tsots oq'uel, jech mu'yuc boch'o xu' chaspojoxuc.

¹² Li jnaclumetic ta Marote xlaj yu'unic ti ja' tstaic li c'usi leque, pero li Muc'ul Diose ja' xa laj yac' tal li tsots vocole; staoj xa c'alal ta ti'coralton yu'un Jerusalén.

¹³ Jnaclumetic ta Laquis, vo'oxuc ti sliqueboxuc mulil yu'un li boch'otic te nacajtic ta Sione, ti ja' te ilic tal ta atojolic li stoyobbail israeletique, chuco xa me lec li acaretaic ta aca'ic ti bu lec tsots x'anilajique.

¹⁴ Jipo comel ta avo'ntonic o li lum Moreset-gate. Li lum Aczibe ja' chtun ta sventa chlajic o ta lo'lael li ajvaliletic ta Israele.

¹⁵ Jech chal li Muc'ul Diose: “Vo'oxuc ti te nacaloxuc ta Maresae, ta jtacboxuc tal yan boch'o chtal stsaloxuc. Li banquilaletic yu'un Israele chjatovic batel; te chbat snac' sba c'alal to ta nailch'en Adulam.

¹⁶ Sión, juxo loq'uel stsotsil ajol ta scoj li avalab anich'nab ti lec ac'anoje. Paso aba ta t'abjol jech chac c'u cha'al sjol xulem, yu'un ta xich'ic chuquel batel ta yan banamil li jnaclumetic avu'une”, xi li Diose.