San Mateo 3 - Bible in Tzotzil de Chenalhó with Deuterocanon

La xchol sc'op Dios Juan j'ac'vanej ta vo'

¹ Ta yorail le'e, ja'o lic xchol sc'op Dios ta xocol banamil te ta Judea li Juan j'ac'vanej ta vo'e,

² jech laj yal: “Suteso avo'ntonic, yu'un nopol xa yorail chlic ventainvanuc li Diose”, xi.

³ Ja' sc'oplal ti jech ono'ox ts'ibabil yu'un j'alc'op Isaías ta vo'onee: “Oy boch'o tsots ta x'avan ta xocol banamil: ‘Chapanbeic sbe li Cajvaltique. Tuq'uibtasbeic sbe li Dios cu'untique’, xi chlic yal”, xi ono'ox li Isaiase.

⁴ Li sc'u' Juane ja' jalbil tsotsil camello. Xchucoj xch'ut ta nucul. Li sve'ele ja' c'ulub xchi'uc spom muc'ta pom.

⁵ Ibat ya'ibeic sc'op Juan scotol li boch'otic nacajtic ta Jerusalene, xchi'uc scotol li jnaclumetic ta Judeae, xchi'uc li boch'otic te nacajtic ta jujun lum ta uc'um Jordane.

⁶ Scotol li boch'otic jamal laj yal smulique, i'ac'bat yich'ic vo' yu'un Juan te ta uc'um Jordán.

⁷ C'alal laj yil Juan ti ep fariseoetic xchi'uc saduceoetic bat sc'anic ich' vo'e, jech laj yalbe: “Li vo'oxuque ja' achi'ilic orachon. ¿Me chac'an chajatovic ta anil ta sventa li stojol mulil ta xtale?

⁸ Ac'o vinajuc ta avabtelic me ta melel ti sutem avo'ntonique.

⁹ Mu me jechuc xanop ta avo'ntonic: ‘Ja' jmoltotic li Abrahame’, mu me xachiic. Chacalboxuc ava'yic, li Diose xu' yu'un ta sc'atajesbe ta smomnich'nab Abraham li tonetic li'i.

¹⁰ Ta melel li eq'uele te xa metsel ta yibel li te'e. Scotol li te' ti mu lecuc chac' sate ta xich' ts'etel, ta xich' jipel ochel ta c'oc'.

¹¹ Li vu'une ja' no'ox chacac'boxuc avich'ic vo' ta sventa ti sutem avo'ntonique. Yan li boch'o ts'acal ta xtal cu'une, ja' ech'em svu'el. Li vu'une mu'yuc c'usi xu' cu'un; ac'o me yich'bel batel xonob, mu xu' cu'un. Li stuque ja' chayac'boxuc avich'ic Ch'ul Espíritu xchi'uc c'oc'.

¹² Jech noxtoc li yic'aubil strigoe te xa stsacoj ta sc'ob, ta smes lec li yav smajubil strigoe. Li strigoe ta stic' ochel ta snail; yan li ste'ele ta xchic' ta c'oc' ti bu mu ono'ox xtu'p oe”, xi li Juane.

Laj yich' vo' li Jesuse

¹³ Ja'o iloc' batel ta Galilea banamil li Jesuse; te ic'ot ta uc'um Jordán yo' bu oy li Juane, yu'un bat sc'anbe ich' vo'.

¹⁴ Li Juane muc xch'un ti chac'be yich' vo' li Jesuse, jech laj yalbe: —Vo'ot chavac'bun quich' vo' ti jechuque. ¿Me smelol ti vo'ot tal ac'anbun ich' vo'e? —xut.

¹⁵ Itac'ov li Jesuse: —Ja' lec ac'bun quich' vo', yu'un tsc'an ac'o jpastic scotol c'usi tsc'an li Diose —xi. Jech te laj yac'be yich' vo' li Jesuse.

¹⁶ C'alal laj yich' vo' li Jesuse, iloc' ta uc'um; ta ora ijam li vinajele. Laj yil iyal tal ta sba li Espíritu yu'un Diose, xco'laj xchi'uc stsumut yilel.

¹⁷ Ta ora ivinaj c'op ta vinajel, jech laj yal: “Li'i ja' Jnich'on; lec jc'anoj, lec jpatoj co'nton yu'un”, xi.