San Mateo 18 - Bible in Tzotzil de Chenalhó with Deuterocanon

Boch'o biq'uit chac' sba ja' ich'bil ta muc' chc'ot

¹ Li yajchanc'optac Jesuse jech lic sjac'beic li Jesuse: —¿Boch'o ich'bil ta muc' chc'ot te yo' bu tspas mantal Diose? —xutic.

² Li Jesuse laj yic' jun olol. Te la sva'an ta o'lol yo' bu oyique.

³ Jech laj yalbe: —Melel li c'usi chacalboxuque, me mu xajel atalelique, me mu xaco'lajes abaic jech chac c'u cha'al ololetique, j'ech'el mu xa'ochic yo' bu tspas mantal li Diose.

⁴ Ja' yu'un li boch'o biq'uit chac' sba jech chac c'u cha'al li olol li'i, ja' ich'bil ta muc' chc'ot te yo' bu chventainvan li Diose.

⁵ Li boch'otic ta xic' junuc olol ta jventa jech chac c'u cha'al li'i, ja' vu'un chiyic'un o chc'ot.

⁶ Yan li boch'o chac' ch'ayuc ta be junuc li ololetic li'i ti xch'unojicune, ja' lec ac'o chucuc jun muc'ta cho' ta snuc', ac'o jipatuc ochel ta natil nab.

⁷ “Toj abul sbaic li boch'otic li' oyic ta banamil ti oy boch'o chch'ayvanic ta bee. Yu'un ta ono'ox xtal li boch'o chch'ayvanic ta bee, pero toj abul sba li boch'o jech tspase.

⁸ Ja' yu'un me ta scoj no'ox ac'obic, o me avacanic chata o amulique, sebic loq'uel. Ja' lec me motmot ac'ob, o me motmot avacanic cha'ochic ta lequilale; ja' vocol me chapal avoc ac'obic chabatic ta c'oc' ti bu mu xtu'p o sbatel osile.

⁹ Jech noxtoc me ta scoj no'ox asat chata o amule, pitso loq'uel. Ja' lec me jbej asat cha'och ta lequilale; ja' vocol me te oy xchibal asat chajipat ochel ta c'oq'ue.

Lo'il sventa ch'ayemal chij

¹⁰ “Q'uelo me abaic, mu me mu'yucuc stu chavilic junuc li ololetic li'i. Chacalboxuc ava'yic, li j'almantaletic yu'unic te ta vinajele scotol ora te chilbeic o sat li Jtot te oy ta vinajele.,

¹² “¿C'usi chanopic? Me oy jun vinic chc'ot ta vo'vinic (100) ta cot xchije, pero me chch'ay jcotuque, ¿me mu teuc ta scomtsan li balunlajuneb yo'vinic (99) ta cote, yu'un ja' chbat st'un tal li jcot ich'aye?

¹³ C'alal me la stae, melel chacalboxuc, toj ech'em xcuxet yo'nton; ja' mu sta jech xcuxet yo'nton yu'un li balunlajuneb (99) yo'vinic mu'yuc xch'aye.

¹⁴ Ja' jech ec li Jtotic te oy ta vinajele, mu sc'an me chch'ay junuc li ololetic li'i.

Tsc'an chcac'betic sna' li boch'o chopol c'usi chispasbutique

¹⁵ “Me oy bu mu'yuc lec c'usi ta spasbot li achi'ile, batan, bat ac'bo sna' ta achibalic no'ox. Me laj ya'ibot ac'ope, jech ivu' avu'un scoltael li achi'ile.

¹⁶ Yan me mu sc'an xa'ibot ac'ope, ic'o batel jun chibuc achi'il, yu'un ja' testigo chc'otic ta sventa li c'usi chavalique.

¹⁷ Me mu sc'an xa'ibe sc'opique, alo ta tsobajel yu'un jch'unolajeletic. Me mu xa'ibe sc'op li jch'unolajeletique, comtsanic jech chac c'u cha'al yan cristiano ti mu xotquin Diose, o jech chac c'u cha'al jtsobpatan.

¹⁸ “Melel li c'usi chacalboxuque, scotol li boch'o chachuquic li' ta banamile, chucul chc'ot c'alal ta vinajel. Scotol li boch'o chacoltaic li' ta banamile, coltabil chc'ot c'alal ta vinajel.

¹⁹ “Chacalboxuc noxtoc, me oy chiboxuc ti jmoj avo'ntonic li' ta banamil oy c'usi chac'anbeic li Jtot te oy ta vinajele, chayac'boxuc.

²⁰ Yu'un ti bu atsoboj abaic chib oxib ta jventae, te oyun ta o'lol avu'unic —xi li Jesuse.

²¹ Li Pedroe jech la sjac'be li Jesuse: —Cajval, ¿jayib velta tsc'an ta jpasbe perdón c'alal tsta smul ta jtojol li jchi'ile? ¿Me tsc'an c'alal to ta vucub velta? —xi.

²² Itac'ov li Jesuse: —Mu'yuc chacalbot ti c'alal to ta vucub veltae. Ja' tsc'an chapasbe perdón c'alal to ta lajuneb xchanvinic (70) ta velta chich' atel li vucube —xi li Jesuse.

Lo'il sventa chib j'iluviletic

²³ “Yu'un ti c'u x'elan ta spas mantal li Diose, ja' jech chac c'u cha'al jun ajvalil ti tsc'an chich' ta venta c'u yepal yil yu'un li xchi'iltac ta abtele.

²⁴ Jech lic yich'an lec ta venta. Ja' ba'yuc ital li boch'o oy lajunmil (10,000) talento yile.

²⁵ Ta sventa ti mu xa xtoj yu'un li yile, ja' yu'un li ajvalile laj yal mantal ti ac'o yich' chonel xchi'uc yajnil xnich'nab, xchi'uc scotol li c'usitic oy yu'une, yu'un jech xu' chtoj o li yile.

²⁶ Pero li vinique la squejan spatan sba ta stojol li ajvalile, jech laj yalbe: ‘Ajvalil, avocoluc malaun to, chajsutesbot scotol li quile’, xi.

²⁷ Li ajvalile ic'uxubaj ta yo'nton li xchi'il ta abtele; la scolta, la xch'aybe scotol li yile.

²⁸ “Pero c'alal iloc' batel li vinique, te la snup ta be jun xchi'il ta abtel oy vo'vinic (100) denario yil yu'un ec. La stsac li xchi'ile; la xmich'be ta snuc', jech laj yalbe: ‘Sutesbun ta ora li avile’, xut.

²⁹ Li xchi'il ta abtele la spatan sba ta stojol, jech laj yalbe: ‘Avocoluc malaun to, chajsutesbot scotol me la jtae’, xut.

³⁰ Pero mu sc'an smala. Bat stic' ta chuquel. Ja' to tscolta c'alal me isutesbat scotole.

³¹ C'alal laj yilic li yan xchi'iltac ta abtele, ep laj yat yo'ntonic, jech bat yalbeic ta ora ajvalil scotol li c'usi la spase.

³² Li ajvalile la stac ta iq'uel li boch'o jech la spase, jech laj yalbe: ‘Toj chopol j'abtelot. Li vo'ote la jch'aybot scotol avil ti c'alal laj ac'anbun vocol ta jtojole.

³³ ¿Me mu xu' jech chac'uxubin achi'il ec jech chac c'u cha'al la jc'uxubinote?’, xut.

³⁴ I'ilin li ajvalile, jech laj yac' ta sc'ob li j'uts'intavanejetique; ja' to chcol c'alal me la stoj scotol li yile”.

³⁵ —Ja' no'ox jech chaspasboxuc ec li Jtot te oy ta vinajele me mu scotoluc avo'ntonic j'ech'el chapasbeic perdón smul li achi'ilique —xi li Jesuse.