San Mateo 17 - Bible in Tzotzil de Chenalhó with Deuterocanon

La sc'atajes sba Jesús ta stojol oxib yajchanc'optac

¹ C'alal i'ech' xa'ox vaquib c'ac'ale, li Jesuse laj yic' batel Pedro xchi'uc Santiago xchi'uc Juan, yits'in Santiago. Stuquic no'ox laj yic' muyel ta jun toyol vits.

² Li Jesuse te lic c'atajuc ta stojolic. I'ayin xojobal sat jech chac c'u cha'al xojobal c'ac'al. Solel isacub li sc'u'e jech chac c'u cha'al luz.

³ Ta ora te ivinaj ta stojolic li Moisés xchi'uc Eliase. Te ilo'ilajic xchi'uc li Jesuse.

⁴ Lic c'opojuc li Pedroe, jech laj yal: —Cajval, toj lec ti li' oyutique. Me chac'ane, ta jpascutic oxbej vacaxna li'i; jun avu'un, jun yu'un Moisés, jun yu'un Elías —xut.

⁵ C'alal ja'o chlo'ilaj li Pedroe, ital jvol toc, oy xojobal; te macbil ic'otic. Te laj ya'yic c'op ta yut toc, jech laj yal: “Li'i ja' jnich'on, lec jc'anoj. Lec jpatoj co'nton yu'un. A'ibeic sc'op”,, xi.

⁶ C'alal jech laj ya'yic li oxibique la spatan sbaic ta lumtic, solel ep ixi'ic.

⁷ Li Jesuse inopaj batel; la stij liquel, jech laj yalbe: —Licanic, mu xaxi'ic —xut.

⁸ C'alal la stoy satique, mu'yuc xa boch'o laj yilic; ja' xa no'ox stuc te oy li Jesuse.

⁹ C'alal ja'o chyalic tal ta vitse, i'albatic mantal yu'un li Jesuse: —Mu to me boch'o xavalbeic li c'usi laj avilique, ja' to me licha'cuxi loq'uel ta jmuquinal, vu'un ti Xnich'on cristiano lic'ote —x'utatic.

¹⁰ Li yajchanc'optaque jech la sjac'beic: —¿C'u yu'un ta xalic jchanubtasvanejetic ti ta persa ja' ba'yuc ta xtal li Eliase? —xutic.

¹¹ Itac'ov li Jesuse: —Ta melel jech ts'ibabil ta sc'op Dios ti ja' ba'yuc ta xtal li Eliase, yu'un chtal xcha'lecubtas scotol.

¹² Pero chacalboxuc ava'yic ti jeloven xa li Eliase, pero mu'yuc laj yotquinic. La spasbeic c'usi tsc'an yo'ntonic. Ja' no'ox jech chiyac'bicun jvocol ec, vu'un ti Xnich'on cristiano lic'ote —xi.

¹³ Jech la sna'ic o yajchanc'optac ti ja' sc'oplal Juan j'ac'vanej ta vo' laj yal li Jesuse.

Jesús la scolta jun querem yich'oj tu'p ic'

¹⁴ C'alal ic'otic yo' bu tsobol epal cristianoetique, te inopaj tal jun vinic. La squejan sba ta stojol li Jesuse, jech laj yalbe:

¹⁵ —Cajval, c'uxubinbun jnich'on yu'un yich'oj tu'p ic'. Toj ep ta xich' vocol. Ep ta velta chbalch'uj ta c'oc', xchi'uc chbalch'uj ta vo'.

¹⁶ Laj quic' tal ta stojol avajchanc'optac, pero muc xu' yu'unic la scoltabicun —xi.

¹⁷ Li Jesuse jech laj yal: —Vo'oxuc ti li' oyoxuc ta orae, mu xac'an xach'unic, solel ch'ayemoxuc. Ep xa c'ac'al li' jchi'ucoxuc. Ep xa c'ac'al la jts'icboxuc ti c'u xa'elanique. Iq'uic tal li quereme —xi.

¹⁸ Li Jesuse laj yut loq'uel li pucuje. Jech iloc' ta yo'nton li quereme, jech ta ora icol.

¹⁹ Li yajchanc'optaque jech la sjac'beic Jesús ti c'alal stuquic xa'oxe: —¿C'u yu'un muc xu' cu'uncutic la jloq'uescutic li pucuje? —xutic.

²⁰ Itac'ov li Jesuse: —Ja' ta scoj ti mu'yuc to lec ach'unojique. Melel li c'usi chacalboxuque, me oy xa xch'unojel avo'ntonic jech chac c'u cha'al biq'uit bec' moztasae, xu' avu'unic jech chavalbeic li vits li'i: ‘Loc'an batel li'i, batan le'e’, me xavutique, ta xbat avu'unic. Mu'yuc c'usi ti mu xu' avu'unique.

²¹ Pero li jchop ta pucujetic le'e, mu xloc', ja' to me chac'opanic Dios, me chavictaic ixime —xi.

Laj yal yan velta Jesús ti ta xmilate

²² C'alal jmoj xa'ox te tsobolic ta Galilea banamile, jech laj yalbe yajchanc'optac li Jesuse: —Vu'un ti Xnich'on cristiano lic'ote ta xi'ac'at ta c'abal ta sc'ob cristianoetic.

²³ Ta xismilicun, pero chicha'cuxi ta yoxibal c'ac'al —xut. C'alal laj ya'yique, bats'i ep laj yat yo'ntonic.

La stoj patan ta sventa ch'ulna li Jesuse

²⁴ C'alal ic'otic ta lum Capernaume, te italic ta stojol Pedro jayibuc jtsobtaq'uinetic sventa spatan ch'ulna. Jech la sjac'beic: —¿Me ta xac' ec li chib dracma taq'uin jchanubtasvanej avu'unique? —xutic.

²⁵ Itac'ov li Pedroe: —Ta xac' —xi. C'alal i'och ta yut na li Pedroe, ja' ba'yuc ic'opanat yu'un li Jesuse. Jech ijac'bat: —¿C'usi chanop, Simón? ¿Boch'o ta sc'anbe taq'uin li muc'tic ajvaliletic li' ta banamile? ¿Me ja' ta sc'anbe li xnich'nabe, o me yan cristianoetic ta sc'anbe? —xut.

²⁶ Itac'ov li Pedroe: —Ja' ta sc'anbe yan cristianoetic —xi. Jech i'albat noxtoc: —Ja' yu'un li nich'naletique mu persauc tstojic.

²⁷ Pero ti c'u cha'al mu soc yo'ntonic cu'untique, batan ta nab, tic'o ochel ta yut nab li snitubil choy avu'une. Li sbacotal choy chanit loq'uele jach'bo ye; te chata jsep estatero taq'uin. Ich'o tal, ja' stojol jpatantic ta jchibaltic —xut.