San Mateo 10 - Bible in Tzotzil de Chenalhó with Deuterocanon

La st'uj lajchab yajchanc'op li Jesuse

¹ Li Jesuse laj yic' li lajchab (12) yajchanc'ope. Laj yac'be svu'elic ta sloq'uesel pucujetic xchi'uc ta scoltael jchameletic xchi'uc c'usiuc no'ox c'ux cha'yic.

² Li sbiic lajchab yajtacbolaltac Jesuse ja' li'i: Li sbae ja' Simón ti Pedro xchibal sbie; xchi'uc Andrés, ja' yits'in li Pedroe; xchi'uc Santiago xchi'uc yits'in, Juan sbi; ja' xnich'nab li Zebedeoe,

³ xchi'uc Felipe, Bartolomé, Tomás xchi'uc Mateo ti jtsobpatan to'oxe, xchi'uc Santiago xnich'on Alfeo, xchi'uc Lebeo,

⁴ xchi'uc Simón ti laj to'ox xchi'in li Zeloteetique, xchi'uc Judas Iscariote, ja' ti ts'acal to lic yac' ta c'abal li Jesuse.

Itacatic batel ta xcholel sc'op Dios li lajchabique

⁵ Li lajchabique (12) lic stacan batel li Jesuse, la xchanubtas lec batel, jech laj yalbe: “Mu me xa'ochic ta jxoluc sbe li yanlumetique. Mu me xa'ochic ta junuc lum yu'un li samariaetique.

⁶ Ja' no'ox te xabatic ta stojol li jchi'iltactic ta israelale, yu'un ch'ayemic ta be jech chac c'u cha'al chijetic.

⁷ Bat albeic ti yorail xa chventainatic yu'un Diose.

⁸ Coltaic jchameletic. Cha'cuxesic animaetic. Coltaic boch'o yich'ojic c'a'el chamel. Loq'uesic pucujetic ta yo'nton cristianoetic. Amotonic laj cac'boxuc, jech ta matanal me xacoltavanic ec.

⁹ “Mu me xavich' batel ataq'uinic, me c'anal taq'uin, me saquil taq'uin, o me cobre.

¹⁰ Mu me xavich' batel anuti'ic sventa be. Mu me xavich' batel cha'lic ac'u'ic xchi'uc axonobic xchi'uc anamte'ic. Yu'un li boch'otic ta x'abtejique te ta x'ac'bat sve'elic.

¹¹ “Buyuc no'ox cha'ochic, me ta lumetic, me ta tsobtsobnaetic, q'uelic li boch'o lec yo'ntone. Xu' ja' te cha'ochic ta sna, te oyanic o, ja' to me yu'un xa chaloq'uic batel ta yan lume.

¹² C'alal cha'ochic ta snae, ‘Junuc avo'ntonic’, utic.

¹³ Me ta melel lec yo'ntonique, ta staic li jun yo'nton chavac'beique; yan me mu'yuc lec yo'ntonique, mu me xavac'beic comel.

¹⁴ Me oy boch'o mu xayic'oxuque, me mu sc'an xa'ay ac'opique, loc'anic batel ta sna, o me ta lum. Lilino comel spucucal avacanic.

¹⁵ Melel li c'usi chacalboxuque, c'alal tsta yorail chac' stojol mulil li Diose, ja' ech'em tsots stojol smul ta xich' li lum le'e. Ja' jutuc no'ox stojol smul ta xich'ic li lum Sodoma xchi'uc li lum Gomorra ta vo'onee.,

Laj yal Jesús ti ta jtatic uts'intaele

¹⁶ “A'yo ava'yic, vu'un ta jtacoxuc batel jech chac c'u cha'al chijetic ta stojol oq'uiletic, ja' yu'un bijanic me jech chac c'u cha'al orachon ti lec bije. Jech noxtoc muc'uc me avo'ntonic jech chac c'u cha'al stsumut.

¹⁷ Q'uelo me abaic ta sventa li boch'otic mu xasc'anoxuque. Yu'un chayac'oxuc ta sc'ob jchapanvanejetic ta ch'ulna; chayac'boxuc nucul te ta nail tsobobbailetic yu'unic.

¹⁸ Ic'bil chabatic c'alal ta stojol ajvaliletic xchi'uc ta stojol muc'tic ajvaliletic, pero vu'un ta jcoj, jech xu' te cha'yic o batel jc'oplal, xchi'uc jech xu' te cha'yic o batel yanlumetic noxtoc.

¹⁹ C'alal cha'ac'atic ta c'abale, mu me xlo'ilaj avo'ntonic ta sventa c'uxi chatac'ovic xchi'uc c'usi chavalic. Yu'un c'alal ja'o yorail jech chc'ot ta pasele, te cha'ac'bat ana'ic li c'usi chavalique.

²⁰ Mu vo'ocoxuc xa chac'opojic. Ja' xa chc'opoj ta atojolic li Espíritu yu'un Jtotic Diose.

²¹ “Oy xchi'il no'ox sbaic ta voq'uel ta xac' sbaic ta milel. Oy totil no'ox chac' ta milel xnich'on. Oy nich'naletic no'ox chlic tscontrain stot sme', chaq'uic ta milel noxtoc.

²² Scotol cristianoetic chopol chayiloxuc ta sventa ti acuchojbicun jbie. Pero li boch'o chcuch yu'un c'alal to ta slajebe, ja' ta xcol.

²³ Me chataic uts'intael ta junuc lume, batanic ta yan lum. Melel li c'usi chacalboxuque, mu'yuc to cuchem avu'unic sq'uelel scotol lumetic li' ta yosilal Israel c'alal chital vu'un ti Xnich'on cristiano lic'ote.

²⁴ “Li jun jchanvune mu ja'uc jeloven yu'un li jchanubtasvanej yu'une. Jech noxtoc li mozoe mu ja'uc jeloven yu'un li yajvale.

²⁵ Li jchanvune xu' no'ox me sta jech chac c'u cha'al li jchanubtasvanej yu'une. Jech ec li mozoe xu' no'ox me sta jech chac c'u cha'al li yajvale. Vu'un li totilun ta jbej na ya'yele, ‘Pucujot’, xi jc'oplal, ¡buuc xa vo'oxuc li jnich'naboxuque!

Ja' tsc'an ta jxi'tic li Diose

²⁶ “Ja' yu'un mu me xaxi'ic yu'un li cristianoetic le'e. Yu'un mu'yuc c'usi mucul chcom ti mu xvinaje; mu'yuc c'usi nac'al chcom ti mu'yuc boch'o tsna' oe.

²⁷ Li c'usi laj calboxuc atuquique, alic batel ta jamal. Li c'usi laj ava'ay ta achiquinique, puquic batel ta stojol scotolic.

²⁸ Mu me xaxi'ic yu'un li boch'o ta smil abec'talique, yu'un li ach'ulelique mu xu' ta smil. Ja' lec ja' xaxi'ic yu'un li Boch'o xu' yu'un ta smil abec'talic xchi'uc ach'ulelic ta muc'ta c'oq'ue.

²⁹ “Xana'ic ti jun centavo no'ox stojol ta cha'cot li bic'tal mutetique. Pero me jcotuc mu xbaj yalel ta banamil me mu jechuc tsc'an li Jtotique.

³⁰ Li vo'oxuque c'alal ta stsotsil ajolic lec atbil.

³¹ Ja' yu'un mu me xaxi'ic. Yu'un vo'oxuc ech'em tsots ac'oplalic jech chac c'u cha'al li bic'tal mutetique.

³² “Li boch'o jamal chalic ta stojol cristianoetic ti xch'unojbicun jc'ope, ja' no'ox jech ec li vu'une jamal chcal ta stojol Jtot te ta vinajel.

³³ Yan li boch'o chismucun ta yo'ntone, ja' no'ox jech ta jmuc ta co'nton ec ta stojol li Jtot te ta vinajele.

Vu'un ta jventa chlic scontrain sbaic li cristianoetique, xi li Jesuse

³⁴ “Mu me xanopic ti yu'un tal cac' co'lajuc yo'ntonic li cristianoetic li' ta banamile. Mu yu'unuc tal cac' co'lajuc yo'ntonic; vu'un ta jventa chlic scontrain sbaic.

³⁵ Vu'un ta jventa chlic scontrain sbaic jun vinic xchi'uc stot, xchi'uc chlic scontrain sme' li tsebe, xchi'uc chlic scontrain sme'el'alib li alibale.

³⁶ Te no'ox chlic scontrain sbaic ta snailal stuquic.

³⁷ “Li boch'o toj tsots sc'oplal cha'ay stot sme' ti ja' mu tsotsuc lec jc'oplal cha'ay li vu'une, mu xu' yu'un chists'aclinun. Li boch'o toj tsots sc'oplal cha'ay squerem, o me stseb, ti ja' mu'yuc lec tsots jc'oplal cha'ay li vu'une, mu xu' yu'un chists'aclinun noxtoc.

³⁸ Li boch'o mu sc'an xq'uech scruz, yu'un ac'o sts'aclinun batele, mu xu' chixchi'inun.

³⁹ Li boch'o ja' no'ox tsc'an ti cuxule, ja' chch'ayes li xcuxlejale. Yan li boch'o vu'un ta jventa chac' ch'ayuc li xcuxlejal li' ta banamile, ja' ta xcuxi.

Chich' smoton li boch'otic chtunic yu'un Diose

⁴⁰ “Li boch'o chayich'oxuc ta muq'ue, ja' vu'un chiyich'un o ta muc'. Li boch'o chiyich'un ta muq'ue, ja' ta xich' o ta muc' li Boch'o la stacun tale.

⁴¹ Li boch'o ta xich' ta muc' jun j'alc'op yu'un Dios, yu'un sna' ti ja' jun j'alc'ope, ja' jech chich' smoton jech chac c'u cha'al li j'alc'ope. Li boch'o ta xich' ta muc' jun vinic ti tuc' yo'ntone, ja' jech chich' smoton jech chac c'u cha'al li boch'o tuc' yo'ntone.

⁴² Li boch'o ta xac'be jun no'ox vaso siquil vo' yuch' li boch'o biq'uit ta sventa ti vu'un chists'aclinune, melel chacalboxuc, mu xch'ay li smotone”, xi li Jesuse.