Marcos 7 - Bible in Tzotzil de Chenalhó with Deuterocanon

Sc'oplal c'usi tsbolibtasbe yo'nton cristiano

¹ Te italic ta stojol Jesús li fariseoetique xchi'uc jayibuc jchanubtasvanejetic ta smantal Dios; te iliquic tal ta Jerusalén.

² Te laj yilic ti oy jayibuc yajchanc'optac Jesús ti mu'yuc la spasic c'u x'elan stalelic ta spoc sc'obic c'alal ta xve'ique, jech te lic stic'beic smul.

³ (Yu'un li fariseoetic xchi'uc scotol li judioetique ja' yich'ojbeic stalel li moletic ta vo'onee. Me mu'yuc tspasic c'u x'elan stalel tspoc sc'obique, mu xu' ta xve'ic.

⁴ C'alal me isutic tal ta ch'ivite, mu'yuc ta xve'ic ti me mu'yuc ta spasic c'u x'elan stalelique. Oy to yan c'usitic stalelic tspasic; ja' ti c'u x'elan ta suc' sbin, xbochic, xchi'uc sets'ique.)

⁵ Li fariseoetic xchi'uc li jchanubtasvanejetic ta smantal Diose jech la sjac'beic li Jesuse: —¿C'u yu'un mu'yuc yich'ojbeic stalel moletic ta vo'one li avajchanc'optaque? Yu'un xchi'uc sbolil sc'obic ta xve'ic —xutic.

⁶ Itac'ov li Jesuse: —Jlo'lavanejoxuc. Ja' ac'oplalic ti jech ts'ibabil yu'un j'alc'op Isaiase: ‘Li cristianoetic li'i chiyich'icun ta muc' ta yeic no'ox, pero li yo'ntonique bats'i nom oy ta jtojol.

⁷ Altic ti chiyich'icun ta muc' yilele, yu'un smantal no'ox cristiano ta xchanubtasvanic’, xi li Isaiase.

⁸ Yu'un li vo'oxuque ja' acomtsanojbeic smantal Dios ta scoj ti ja' avich'ojbeic stalel li cristianoetique —xi li Jesuse.

⁹ Jech laj yalbe noxtoc: —Toj lec xana'ic c'usi chapasic sventa chacomtsanbeic smantal Dios ta scoj ti ja' avich'ojbeic stalel li moletic ta vo'onee.

¹⁰ Li Moisese jech yaloj: ‘Ich'o ta muc' atot ame'’, xchi'uc ‘Li boch'o yan xich' xalbe stot sme'e, ac'o yich' milel’, xi.

¹¹ Pero li vo'oxuque lec chava'yic me jech chalbe li stot sme'ique: ‘Mu xu' ta jcoltaot, yu'un scotol li c'usi oy cu'une laj xa cal ti chcac'be ta smoton Diose’, me xutique.

¹² Xchi'uc chavalbeic ti xu' xa mu xc'uxubin o li stot sme'ique.

¹³ Ja' jech chalajesbeic sc'oplal smantal Dios ta scoj ti ja' avich'ojbeic stalel li atot ame'ique. Oy to ep yan c'usitic co'ol chapasic —x'utatic yu'un li Jesuse.

¹⁴ Li Jesuse laj yic' yan velta li epal cristianoetique, jech laj yalbe: —A'yo ava'yic li c'usi ta xcalboxuque. A'ibeic lec smelol.

¹⁵ Li c'usi ta x'och ta xch'ut cristianoe ma'uc ta xbolib o yo'nton yu'un. Ja' ta xbolib o yo'nton yu'un li c'usi ta xloc' tal ta yut yo'ntone —x'utatic yu'un li Jesuse.

¹⁷ Li Jesuse la scomtsan li cristianoetique, bat ochuc ta na. Te lic jac'batuc yu'un yajchanc'optac c'usi smelol li lo'il laj yale.

¹⁸ Jech laj yal li Jesuse: —¿Me mu xava'ibeic smelol ec li vo'oxuque? ¿Me mu xana'ic ti mu xbolibtasat yu'un li c'usi ch-och ta xch'ut cristianoe?

¹⁹ Yu'un mu x'och batel ta yo'nton; ta xch'ut no'ox ta xc'ot, ja'o ta xloc' —x'utatic. Ti jech laj yal li Jesuse, ja' laj yac' ta a'yel ti lec scotol li ve'liletique.

²⁰ Jech laj yalbe noxtoc li yajchanc'optaque: —Li c'usi chopol ta xloc' tal ta yo'nton cristianoe ja' chbolib o yo'nton yu'un.

²¹ Yu'un ta yut yo'nton cristiano ta xloc' tal li c'usi chopol ta snopique, me ta xmulivaj, me ta x'elc'aj, me ta xmilvan,

²² me c'usiuc no'ox ta sc'upin, me ven chopol c'usi tspas, me ta xlo'lavan, me mu xq'uexov ta spasel li c'usi nopen xa'ye, me xti'et yo'nton, me ta slo'ilta xchi'il, me ta stoy sba, me toj bol.

²³ Scotol li c'usitic chopol li'i, ta yut yo'nton cristiano ta xlic tal. Le'e ja' ta xbolib o yo'nton yu'un —xut yajchanc'optac li Jesuse.

Oy lec xch'unojel yo'nton yanlum ants

²⁴ Iloc' batel li Jesuse; ibat ta yosilal Tiro. Te i'och ta jun na, yu'un mu sc'an xvinaj bu oy, pero ivinaj ono'ox.

²⁵ Ta ora i'aybat sc'oplal yu'un jun ants, ochem pucuj ta yo'nton stseb. Te ital ta stojol li Jesuse; la squejan spatan sba ta stojol.

²⁶ Li antse ja' yanlum; te liquem tal ta Sirofenicia banamil. Scotol yo'nton la sc'anbe Jesús ti ac'o sloq'uesbe pucuj ta yo'nton li stsebe.

²⁷ Li Jesuse jech laj yalbe li antse: —Ac'o ve'icuc ba'yuc li nich'naletique. Mu lecuc me ta jpojbetic yotic li nich'naletique, yu'un chcac'betic sve'ic unin ts'i'etic —xut.

²⁸ Itac'ov li antse: —Jech xaval, Cajval. Pero li xch'uch'ulil yot nich'naletic ta xbaj yalel ta yolon mexae ja' ta stam sve'ic ec li unin ts'i'etique —xi li antse.

²⁹ Li Jesuse jech laj yalbe: —Ta sventa ti jech latac'ove, loq'uem xa pucuj ta yo'nton li atsebe. Junuc avo'nton batan —xut.

³⁰ C'alal ic'ot ta sna li antse, mochol xa ta svayab c'ot sta li stsebe, yu'un loq'uem xa li pucuj ta yo'ntone.

Li Jesuse la scolta jun vinic macal xchiquin xchi'uc uma'

³¹ Iloc' batel ta yosilal Tiro li Jesuse; te ijelov batel ta yosilal sidonetic. I'ech' xtuch' batel li yosilal Decapolise; te ic'ot ta nab Galilea.

³² Te laj yic'beic tal ta stojol Jesús jun uma' vinic xchi'uc macal xchiquin. La sc'anbeic Jesús ti ac'o yac' sc'ob ta sbec'tal li vinique.

³³ Li Jesuse slecoj laj yic' loq'uel li vinique; la stic' ochel sni' sc'ob ta jujun xchiquin. Xchi'uc la stubta sc'ob; la spicbe yoc' li vinique.

³⁴ La sq'uel muyel vinajel; la sjic' yo'nton, jech laj yal: “Efata”, xi. “Jaman”, xi smelol.

³⁵ Ta ora ijam xchiquin xchi'uc ye li uma'e, jech lec lic c'opojuc.

³⁶ Li Jesuse laj yalbe cristianoetic ti mu me boch'o xalbeic batele, pero muc xch'unic. C'alal me ep ta velta i'albatic ti mu me xalic batele, yo'to ech'em lic yalic batel.

³⁷ Yu'un toj labal sba laj yilic li c'usi ic'ot ta pasele, jech laj yalic: “Toj lec c'usitic la spas li Jesuse. Xu' yu'un tsjambe xchiquin li coque xchi'uc tsjambe ye li uma'e”, xiic.