Marcos 15 - Bible in Tzotzil de Chenalhó with Deuterocanon

Laj yiq'uic batel ta stojol Pilato li Jesuse

¹ C'alal isacube, la stsob sbaic scotol li j'abteletic ta ch'ulnae, ja' li banquilal paleetique, xchi'uc li jchapanvanejetique, xchi'uc li boch'otic lec xchanojic smantal Diose. Lec chucul laj yiq'uic batel li Jesuse, c'ot yaq'uic ta sc'ob li Pilatoe.

² Li Pilatoe jech la sjac'be li Jesuse: —¿Me vo'ot muc'ta ajvalilot yu'un li israeletique? —xut. —Vu'un, jech chac c'u cha'al chavale —xi itac'ov li Jesuse.

³ Li banquilal paleetique ep la stic'beic smul li Jesuse.

⁴ Ja' yu'un li Pilatoe jech la sjac'be yan velta li Jesuse: —¿Me mu'yuc c'usi chaval jbeluc? Q'uelavil ti c'u yepal ta stiq'uic amule —xut.

⁵ Me jbeluc mu'yuc c'usi laj yal li Jesuse. Ja' yu'un li Pilatoe toj ch'ayel ic'ot yo'nton.

Ichapaj ti ta xcham o li Jesuse

⁶ Li Pilatoe jech stalel o ti ta jujun q'uin Coltael ta scolta jun jchuquel ti bu junucal ta sc'anic li cristianoetique.

⁷ Te tiq'uil ta chuquel jun vinic, Barrabás sbi. Te chucajtic xchi'uc xchi'iltac, yu'un imilvanic ta scoj ti la scontrainic li ajvalile.

⁸ Li epal cristianoetic te tsobolique lic sc'anbeic Pilato ti ac'o scolta junuc jchuquel jech chac c'u cha'al ta spas ono'oxe.

⁹ Jech la sjac' li Pilatoe: —¿Me chac'anic ja' ta jcolta li muc'ta ajvalil avu'unique? —xut.

¹⁰ Yu'un sna'oj ono'ox Pilato ti ta scoj xti'et yo'ntonic yu'un Jesús li banquilal paleetic ti laj yaq'uic ta c'abale.

¹¹ Pero li banquilal paleetique la xchanubtasic cristianoetic ti ja' ac'o sc'anic coltabel li Barrabase.

¹² Li Pilatoe jech la sjac' yan velta: —¿C'usi chac'anic ta jpasbe li ajvalil avu'unic chavalique? —xi.

¹³ Tsots i'avan scotolic: —Joc'ano ta cruz —xiic.

¹⁴ —¿Pero c'usi chopol la spas? —xi li Pilatoe. Yo'to tsots lic avanicuc: —Joc'ano ta cruz —xiic.

¹⁵ Li Pilatoe tsc'an ti jun yo'nton chcom li cristianoetique, jech la scolta li Barrabase. C'alal laj yac'beic nucul li Jesuse, laj yac' ta c'abal, yu'un ac'o bat sjoc'anic ta cruz.

¹⁶ Li soldadoetique laj yiq'uic ochel ta yamaq'uil cabildo li Jesuse, pretorio sbi. Te laj yiq'uic tal scotol li xchi'iltaquic ta soldadoile.

¹⁷ La slapbeic yax'elan c'u'il li Jesuse. La sts'otic ch'ix; la xojbeic ta sjol sventa scorona.

¹⁸ La snupbeic sc'ob, jech laj yalbeic: —¿Me li'ote?, muc'ta ajvalil yu'un Israel —xutic.

¹⁹ La smajbeic sjol ta aj, la stubtaic. La squejan sbaic, la snijan sbaic ta stojol.

²⁰ C'alal laj yo'ntonic ta slabanele, la sloc'beic li yax'elan c'u'ile, la slapbeic sc'u' stuc. Laj yiq'uic batel, yu'un bat sjoc'anic ta cruz.

Ijoc'anat ta cruz li Jesuse

²¹ Te la snupic ta be jun vinic Simón sbi, liquem tal ta lum Cirene. Ja' stotic li Alejandro xchi'uc Rufoe. Ja' la sujic batel ta xq'uechbel scruzal li Jesuse.

²² Te laj yiq'uic batel yo' bu Gólgota sbie, ja' li Baquil Jolal, xi smelole.

²³ Te laj yac'beic yuch' pajal ya'lel ts'usub capal ta ch'ail poxil, mirra sbi. Pero muc xuch'.

²⁴ C'alal la sjoc'anic ta cruz li Jesuse, lic spasic canal tajimol xchi'uquic li sc'u' spoq'ue, yu'un jech chilic bu jlicucal chc'ot ta stojol jujunic.

²⁵ Ta baluneb ora ta sob la sjoc'anic ta cruz li Jesuse.

²⁶ Te ts'ibabil ta te' ta sjol scruzal li c'usi smul yu'unique: “LI'I JA' MUC'TA AJVALIL YU'UN ISRAELETIC”, xi ts'ibabil.

²⁷ Oy chib j'eleq'uetic co'ol la sjoc'anic ta cruz xchi'uc li Jesuse; jun scruzal ta sbats'ic'ob, jun scruzal ta sts'et.

²⁸

²⁹ Li boch'otic te ijelovique la slabanic. La sjimulan sjolic, jech laj yalic: —¡Ay ava'ay un! Sc'oplal ti vo'ot chavuq'ues li ch'ulnae, ti ta oxib c'ac'al chacha'va'an chavale.

³⁰ Coltao aba atuc. Yalan tal ta cruz —xutic.

³¹ Ja' no'ox jech ilabanvanic ec li banquilal paleetique xchi'uc li boch'otic lec xchanojic smantal Diose. Jech laj yalbe sbaic: —La scolta yan cristianoetic, pero mu xu' yu'un tscolta sba stuc.

³² Me ta melel ti ja' Cristoe, ti ja' muc'ta ajvalil yu'un israeletique, ac'o yaluc tal ta ora ta cruz, yu'un jech ta xquiltic, jech xu' ta jch'untic —xiic. Ja' no'ox jech ilabanvanic ec li j'eleq'uetic te joc'ajtic ta cruz xchi'uc Jesuse.

Icham li Jesuse

³³ C'alal o'lol xa'ox c'ac'ale, i'ic'ub osil ta scotol li banamile. Ic' icom c'alal to ta o'lol syalel c'ac'al.

³⁴ Ta o'lol syalel c'ac'al tsots i'avan li Jesuse: “Eloi, Eloi, ¿lama sabactani?”, xi. “Dios cu'un, Dios cu'un, ¿c'u yu'un ti laj acomtsanune?”, xi smelol.

³⁵ Oy jayibuc boch'otic te nopol va'ajtic laj ya'yic, jech laj yalic: —¡Ay ava'ay! Ja' ta xic' tal Elías —xiic.

³⁶ Jech ta anil ibat jun vinic, bat sts'aj tal ta pajal ya'lel ts'usub jun esponja. La xoj muyel ta aj; laj yac'be sts'uts' li Jesuse. Jech laj yal: —Jmalatic, jq'ueltiquic me ta xtal yalesatuc ta cruz yu'un li Eliase —xi.

³⁷ Pero li Jesuse tsots i'avan yan velta, jech iloc' o xch'ulel.

³⁸ Li muc'ta poc' te joc'ol ta yut ch'ulnae, ili' ta o'lol. Ili' yalel tal ta toyol c'alal to ta olon.

³⁹ C'alal laj yil c'u x'elan iloc' xch'ulel Jesús li banquilal soldado te va'al ta stuq'uile, jech laj yal: —Ta melel ja' xnich'on Dios li vinic li'i —xi.

⁴⁰ Te oy jayibuc antsetic ta sq'uelic tal ta nom. Ja' te oy li María liquem tal ta Magdalae, xchi'uc Salomé, xchi'uc yan María, ja' li sme'ic José xchi'uc its'inal Santiagoe.

⁴¹ Ja' li antsetic ti la xchi'inic ta xanubal Jesús te ta Galilea banamil, ti la smac'linique. Te oyic noxtoc ep yan antsetic ti la xchi'inic muyel ta Jerusalén li Jesuse.

Imucat li Jesuse

⁴² C'alal bat xa'ox c'ac'ale, ja'o yorail ta jchapan jbacutic sventa ta jcux co'ntoncutic.

⁴³ Te oy jun vinic, José sbi, liquem tal ta Arimatea. Lec ich'bil ta muc'; ja' jun j'abtel te ta ch'ulna. Smalaoj ec ti chtal ventainvanuc li Diose. Tsots yo'nton i'och sc'anbe sbec'tal Jesús ta stojol li Pilatoe.

⁴⁴ Li Pilatoe ch'ayel ic'ot yo'nton c'alal laj ya'ay ti chamen xa li Jesuse. Jech la stac ta iq'uel li banquilal soldadoe; la sjac'be me ta melel ti chamen xa li Jesuse.

⁴⁵ C'alal i'albat yu'un banquilal soldado ti chamen xa li Jesuse, laj yal mantal ti ac'o yich'be batel sbec'tal Jesús li Josee.

⁴⁶ Li Josee la sman jun lequil poc'. La syales ta cruz li Jesuse; la xpix ta lequil poc', bat smuc ta vombil ton. La xbalch'un tal jbej muc' ta ton; ja' la smacbe o comel sti' li ch'ene.

⁴⁷ Li María ti liquem tal ta Magdalae, xchi'uc li yan María sme' Josee laj yilic bu imucat li Jesuse.