Malaquías 4 - Bible in Tzotzil de Chenalhó with Deuterocanon

Sc'ac'alil chchapanvan Muc'ul Dios

¹ Li Muc'ul Dios ti tspas ta mantal scotol te ta vinajele jech chal: “A'yo ava'yic, ta xa xtal li jun c'ac'al ti tstsan jech chac c'u cha'al hornoe. Scotol li jtoybaetique xchi'uc li boch'otic tspasic c'usitic chopole ja' jech chc'otic jech chac c'u cha'al taqui jobel. C'alal chtal li jun c'ac'al le'e chchic' scotol, chlaj c'alal ta yibel c'alal ta sc'obc'ob.

² Yan li vo'oxuc ti avich'ojbicun ta muc' jbie, chlic xojobanuc ta atojolic li tuq'uil chapanel cu'une, jech chac c'u cha'al c'ac'al ti lec xojobane. Li xojobale yich'oj tal lec coltael ta atojolic. Li vo'oxuque xabitic no'ox ta xcuxetel avo'ntonic jech chac c'u cha'al jcot unin vacax ti xbit no'ox c'alal chloc' ta scorale.

³ C'alal me ital li jun c'ac'al chapal cu'un sventa ta jpas cabtele, chapech'ic ta teq'uel li boch'otic chopolique, xco'laj xchi'uc tantic cha'ay li avacanique”, xi li Muc'ul Diose.

⁴ “Vuleso me ta ajolic c'u x'elan li jmantal laj cac'be te ta vits Horeb, li cajtunel Moisese. Laj cac' lec mantal xchi'uc chanubtasel ta sventa scotol li israeletique.

⁵ “A'yo ava'yic, ba'yuc ta jtacboxuc tal j'alc'op Elías ti c'alal mu'yuc to tsta Sc'ac'alil li Muc'ul Diose, ja' li jun c'ac'al ti toj tsots, ti toj xi'bal sbae.

⁶ Li j'alc'ope ja' chtal slecubtasbe yo'nton ta stojol xnich'on li totile, ja' tslecubtasbe yo'nton ta stojol stot li nich'onile. Yu'un jech mu me xc'ot ta pasel ti chtal jsoques o li banamile, ti chtal cac'boxuc atoj amulique”, xi li Muc'ul Diose.