Malaquías 3 - Bible in Tzotzil de Chenalhó with Deuterocanon

¹ Li Muc'ul Dios ti tspas ta mantal scotol te ta vinajele jech chal: “A'yo ava'yic, ta jtac batel j'almantal cu'un, ja' chbat sjambun jbe. Jech ta ora no'ox ta xtal ochuc ta xch'ulna li Ajvalil chasa'ique. Chvul xa ta loq'uel li boch'o tacbil tal sventa chtal yal c'usi chapanbil ono'ox, ti chac'anic ac'o taluque. Le' xa nopol xtale”, xi.

² ¿Boch'o chcuch yu'un ti c'alal yorail chtale? ¿Boch'o xu' lec va'al chcom ti c'alal chvul ta loq'uele? Yu'un ja' jech chvul jech chac c'u cha'al c'oc' ti chchic' loq'uel li c'usi mu xtune; ja' jech ch-abtej chac c'u cha'al lequil xavon ti tsloq'ues scotol li ic'ubale.

³ Chlic chotluc, chlic slecubtas, chlic sloq'ues scotol li ic'ubale. Chlic slecubtas li paleetic smomnich'nab Levie, tslecubtas lec jech chac c'u cha'al boch'o tslecubtas saquil taq'uin xchi'uc c'anal taq'uin. Jech xu' chlic yac'beic smoton li Muc'ul Dios jech chac c'u cha'al yabtelic ono'oxe.

⁴ Li Muc'ul Diose toj lec chlic yil li smoton ch-ac'bat te ta Judá xchi'uc ta Jerusalén jech chac c'u cha'al toj lec ono'ox laj yil li smoton i'ac'bat ta vo'onee.

⁵ Li Muc'ul Dios ti tspas ta mantal scotol te ta vinajele jech chal: “Vu'un chtal jchapanoxuc. Vu'un ta jva'an jba ta testigo ta scontrainel li j'ac'chameletique, li jmulaviletique, li boch'otic tst'abbeic sbi Dios c'alal ch-epalc'opojique, xchi'uc li boch'otic tslo'laic j'abtel yu'unique, xchi'uc li boch'otic abul sba yu'unic me'on antsetic, xchi'uc me'on ololetique, xchi'uc li boch'o mu'yuc tuc' c'usi tspasbeic yanlumetique, ti solel mu'yuc jxi'elal cha'yic oe”, xi li Muc'ul Diose.

Laj yal Dios ti tsots sc'oplal chcac'betic li jujun ta lajunebe

⁶ “Vu'un li Muc'ul Diosune mu jna' jel o co'nton, ja' yu'un muc xaculesoxuc o vo'oxuc li smomnich'naboxuc Jacobe.

⁷ Yan li vo'oxuque laj acomtsanic xch'unel li jmantale. Ja' jech chapasic jech chac c'u cha'al la spasic li amoltot ayame'ic ta vo'onee. Mu xac'an xach'unic li c'usitic caloje. Ja' yu'un jech chacalboxuc vu'un li Muc'ul Diosune: Sutanic tal ta jtojol, jech chisut tal ta atojolic ec. Pero li vo'oxuque jech chavalic: ‘¿C'u x'elan xu' chisutcutic tal ta atojol?’, xachiic.

⁸ Jech chajac'boxuc: ¿Me xu' tsmucul elc'anic Dios li cristianoetique? Li vo'oxuque laj xa avelc'anicun. Jech chavalic: ‘¿C'usi laj quelc'anbotcutic?’, xachiic. Laj avelc'anbicun li jujun ta lajunebe xchi'uc li yantic jmotone.

⁹ Ja' yu'un chopol chacomic o, yu'un ta sjunul avosilalic chavelc'anbicun c'usi oy cu'un.

¹⁰ Ich'ic tal scotol li jujun ta lajlajunebe; la' aq'uic ta yavil cu'un, yu'un jech oy ve'lil ta jna. Pasic preva avilic; te chavilic me muc ta jamboxuc li sventanail vinajele, me muc ta jmalboxuc yalel tal li bendición sventa ch-epaj c'usitic oy avu'unique.

¹¹ Ta jtij batel scotol c'usitic tslajesic li ts'unubaltic avu'unique, jech mu xixtanic li c'usitic chloc' avu'unic ta banamile. Li ts'usubtic ta avosilique lec chac' sat.

¹² Jech scotol banamil chalic ti toj lec c'usi ataojique, yu'un toj lec c'upil sba chilic li avosilalique”, xi li Muc'ul Dios ti tspas ta mantal scotol te ta vinajele.

Li Diose mu co'oluc lec chil li boch'o lec xchi'uc li boch'o chopole

¹³ Li Muc'ul Diose jech chal: “Toj tsotsic li c'usitic chavalic ta jtojole. Pero jech to chajaq'uic noxtoc: ‘¿C'usi ti toj tsotsic chcalcutic ta atojole?’, xachiic.

¹⁴ Yu'un jech chavalic: ‘¿C'usi stu ti chijtunutic yu'un Diose? ¿C'usi chloc' o ti ta jch'unbetic smantale? ¿C'usi ta jtatic o ti solel biq'uit chcac' jbatic ta stojol li Muc'ul Dios ti tspas ta mantal scotol te ta vinajele?

¹⁵ Yu'un quilojtic lec, xchi'uc chloc' ta quetic ti ja' toj xcuxet yo'nton li boch'otic tstoy sbaique, xchi'uc ti ja' toj lec chbat yu'unic scotol li boch'o tspasic c'usitic chopole, xchi'uc ti jun yo'nton colem chcomic li boch'otic tspasbeic preva yo'nton Diose’, xachiic”, xi li Muc'ul Diose.

¹⁶ Ja' yu'un li boch'o yich'ojic ta muc' li Muc'ul Diose, lic yalbe sbaic ta jujuntal ti yich'ojic ta muq'ue. Li Diose laj ya'ay. Jech laj yich' ts'ibael ta vun te ta stojol, yu'un jech mu xch'ay ta o'ntonal li boch'o jun yo'ntonic ta stojole ti ja' no'ox yich'ojic o ta muq'ue.

¹⁷ Li Muc'ul Dios ti tspas ta mantal scotol te ta vinajele jech chal: “C'alal chc'ot sc'ac'alil c'usi ora chapal cu'un chi'abtej ta stojolique, ja' mero jc'ulejalic chc'ot; ja' cu'untac chc'otic o. Ta xc'uxubajic ta co'nton jech chac c'u cha'al jun totil ti chlic c'uxubajuc ta yo'nton xnich'on ti c'alal chtun yu'une.

¹⁸ Jech chlic avotquinic ti mu co'oluc chquil li boch'otic lec, xchi'uc li boch'otic chopolique; xchi'uc ti mu co'oluc chquil li boch'otic yich'ojicun ta muc' xchi'uc li boch'otic mu'yuc yich'ojicun ta muq'ue”, xi.