Malaquías 2 - Bible in Tzotzil de Chenalhó with Deuterocanon

¹ “Paleetic, li mantal li' chcale ja' ta aventaic:

² Me mu xach'unique, me mu'yuc tsots sc'oplal chava'yic ti tsc'an ich'bil o ta muc' li jbie, j'ech'el chopol chacomic o. Li alequilal ataojique ta jc'atajes ta chopol ta scoj ti mu xanopic leque.

³ “A'yo ava'yic, ta xcac'boxuc atojic xchi'uc li amomnich'nabique. Ta jipboxuc ta asatic li stso' xchi'uc li scomelal jmoton chavac'bicun ta q'uine; co'ol chajipoxuc loq'uel achi'uquic.

⁴ Jech chana'ic o ti vu'un laj cac' li mantal li'i, jech mu soc li c'usi la jchapan jchi'uc li Leví ta vo'onee”, xi li Muc'ul Dios ti tspas ta mantal scotol te ta vinajele.

⁵ “Li c'usi la jchapan jchi'uque ja' sventa lec chbat, sventa jun yo'nton, xchi'uc sventa ac'o yich'un ta muc'. Pero ta melel, lec laj yich'un ta muc', biq'uit laj yac' sba ta jtojol, laj yich' ta muc' li jbie.

⁶ Ja' no'ox iloc' ta ye li jmantal ti ja' melele; mu'yuc iloc' ta ye c'usi chopol. Ja' la spas c'usi lec xchi'uc c'usi tuc'. Ep boch'o laj yac'be scomtsanic li c'usitic chopole.

⁷ Yu'un li boch'o la jtiq'uic ta paleale ja' yabtel ac'o yalic, ac'o loc'uc ta yeic li bijubtasele, xchi'uc ac'o xchanubtasic ta xch'unel jmantal li xchi'iltaquique, yu'un ja' cajtuneltac, vu'un li Muc'ul Diosun ti ta jpas ta mantal scotol te ta vinajele.

⁸ “Pero li vo'oxuque paleetic, laj xa acomtsanic li bee. Ep xa boch'o laj avaq'uic ch'ayuc ta be ta sventa ti c'u x'elan laj achanubtasic ta jmantale; laj xa asoquesic c'usi jchapanoj jchi'uc li Leví ta vo'onee.

⁹ Jech ec li vu'une ta jsoquesoxuc ec, ta xcac' ti mu'yuc atuic, ti c'a'ep chayiloxuc o li achi'iltaquique, yu'un muc ja'uc xatamic o li be cu'une. Xchi'uc mu co'oluc chapasic ta stojol achi'iltaquic jech chac c'u cha'al chal li mantaletic cu'une”, xi li Diose.

Mu'yuc tuc' yo'ntonic ta stojol Dios li israeletique

¹⁰ ¿Me mu junuc no'ox jtotic jcotoltic? ¿Me mu junuc no'ox Dios la spasutic? ¿C'u yu'un ti ta jlo'laan jbatic, ti ta jmacbe jba jsatic yu'un jech ta jsoquestic o c'usi la xchapanic xchi'uc Dios li jtot jme'tic ta vo'onee?

¹¹ Li Judae muc ono'ox tuc'uc yo'nton ta stojol li Diose, yu'un la spas c'usi toj chopol ta pasel ta Israel xchi'uc ta Jerusalén. La soquesbe sc'oplal li ch'ulna ti toj lec sc'anoj li Muc'ul Diose. Yu'un li judaetique laj yic' yajnilinic li antsetic ti yich'ojic ta muc' yan diosetique.

¹² Ac'o tu'pbatuc sts'unubal yu'un Muc'ul Dios ta stojol smomnich'nab Jacob li boch'o jech tspas chac le'e, boch'ouc no'ox, ac'o me chich'beic tal smoton li Muc'ul Dios ti tspas ta mantal scotol te ta vinajele.

¹³ Oy to c'usi yan mu'yuc lec chapasic noxtoc. Chavat'esic ta ya'lel asatic li scajleb jmotone; ep cha'oq'uic, ep cha'avanic. Jech mu'yuc xa stu chquil, mu'yuc bu xcuxet co'nton ta jtsacboxuc li jmoton chavac'bicune.

¹⁴ Pero li vo'oxuque jech chavalic: “¿C'u yu'un?”, xachiic. Yu'un li Muc'ul Diose ja' testigo stuc avu'unic achi'uc li avajnil ta aqueremalic ti laj amacbe satique, yu'un muc xc'ot ta pasel avu'unic ti laj avalic ta stojol ti ja' mero avajnilic oe.

¹⁵ ¿Me mu junuc no'ox abec'talic, ach'ulelic laj yac'boxuc li Diose? Ti jech jun la spasoxuc li Diose ¿c'usi oy ta yo'nton? Yu'un tsc'an ti voc'bil chcom o li avalab anich'nabique, ja' yu'un q'uelo me abaic; mu me xavuts'intaic, mu me xamacbeic sat li avajnilic ta aqueremalique.

¹⁶ Yu'un li Muc'ul Dios yu'un Israele contra chil li boch'o ch-ictavane xchi'uc li boch'o chuts'inta yajnile. Ja' yu'un q'uelo me c'u x'elan li avo'nton atuquique; mu me jechuc xc'ot ta pasel avu'unic.

Po'ot xa tspas yabtel li Muc'ul Diose

¹⁷ Li Muc'ul Diose laj xa avaq'uic lubtsajuc ta sventa li ac'opique. Li vo'oxuque jech chavalic: “¿C'usi laj calcutic ti ilub xa cu'uncutique?”, xachiic. Ja' ta sventa ti jech chavalique: “Li boch'o tspasic c'usitic chopole, lec ch-ilatic yu'un li Muc'ul Diose, xcuxet yo'nton ta stojolic”, xachiic. Xchi'uc jech chavalic: “Mu'yuc tuc' yo'nton li Diose”, xachiic.