Malaquías 1 - Bible in Tzotzil de Chenalhó with Deuterocanon

Li muc'ul Diose ep sc'anoj li israeletique

¹ Li Muc'ul Diose ta sventa j'alc'op Malaquías laj yal c'usi chc'ot ta pasel ta stojol li israeletique.

² Jech chal: “Li vu'une toj ep jc'anojoxuc, pero li vo'oxuque jech chavalic: ‘¿C'u x'elan ti lec ac'anojuncutique?’, xachiic. Ja' jech jc'anojoxuc jech chac c'u cha'al la jc'an li Jacobe, ac'o me ja' xchi'il ta voq'uel li Esaue.

³ Pero li Esaue muc jc'an. Li yosilal Esaú ti lec toyolal te'tique la jc'atajesbe ta xocol banamil. Li c'usitic lec oy yu'une laj cac'be oq'uiletic”, xi li Muc'ul Diose.

⁴ Ac'o me jech chalic li edometic, ja' li smomnich'nab Esaue: “Solel abul jba lijcomutic, pero ta xlic jcha'va'antic lec li jlumaltique”, xiic. Pero li Muc'ul Dios ti ja' tspas ta mantal scotol te ta vinajele jech chal: “Ja' tsva'anic, pero vu'un ta jinesbeic. Li yosilalique ‘Yosilal c'usi chopol’, xi sbi chc'ot. ‘Ja' jun banamil ti sbatel osil ilintabil o yu'un Muc'ul Diose’, xi sc'oplal o”, xi li Muc'ul Diose.

⁵ Ta to xavil lec ta asat atuquic, jech chlic avalic: “Li Muc'ul Diose ac'o muq'uibuc batel sc'oplal ta nom ti bu muc xa ja'uc cosilaltic vu'utic li israelutique”, xachiic.

I'utatic yu'un Muc'ul Dios li paleetique

⁶ Li Muc'ul Diose jech chalbe li paleetique: “Li nich'onile chich' ta muc' li stote; li mozoe chich' ta muc' li yajvale. Pero vu'un li Atoticune ¿bu ti chavich'icun ta muq'ue? Vu'un li Avajvalicune ¿bu oy li jxi'elal chava'yique? Li vo'oxuque mu'yuc xa tsots sc'oplal ta avo'ntonic ti ich'biluc ta muc' li jbie, pero jech to chajaq'uic noxtoc: ‘¿C'usi la jpascutic ti mu'yuc tsots ac'oplal ta co'ntoncutique?’, xachiic.

⁷ Yu'un chavac'bicun jmotonin ta scajleb jmoton li pan ti mu'yuc leque. Jech chavalic noxtoc: ‘¿C'usi la jpascutic ti mu xaquich'otcutic ta muc' chavale?’, xachiic. Yu'un laj anopic ti mu'yuc tsots sc'oplal li mexa cu'une.

⁸ Xchi'uc ja' chavac'bicun jmotonin ti bu ma'sate. ¿Me mu chopoluc le'e? Jech noxtoc ja' chavac'bicun jmotonin li coxoe, xchi'uc ti bu oy xchamele. ¿Me mu chopoluc le'e? Bat ac'beic quic smotonin li banquilal avu'unique, jq'ueltiquic me toj lec chil, me xcuxet xa yo'nton chastsacboxuc”, xi li Muc'ul Dios ti tspas ta mantal scotol te ta vinajele.

⁹ Ja' yu'un li' ta orae c'anbeic Dios ti ac'o xc'uxubinoxuque. Pero jech chal li Muc'ul Diose: “¿C'u x'elan xu' lec chaquiloxuc ti jech chapasic chac le'e?

¹⁰ Ja' lec ti oyuc boch'o junucal avu'unic tsmac li ti'ch'ulnae, yu'un jech mu xa me x'och atsanic c'oc' ta jech no'ox te ta sba li scajleb jmotone. Yu'un mu xa xcuxetuc co'nton avu'unic; mu'yuc xa bu ta jtsacboxuc o li matanaletic chavac'bicune.

¹¹ Yu'un li jbie toj ech'em smuc'ul ta sbejel banamil, xlic ta sloq'uem c'ac'al c'alal to ta smaleb c'ac'al; ta sbejel banamil ta buyuc no'ox chixchic'bicun pom ta jtojol, xchi'uc ja' chiyac'bicun jmotonin ti bu lequique, yu'un toj ech'em smuc'ul jbi ta scotol banamil.

¹² Pero li vo'oxuque chasoquesbicun sc'oplal jbi ti c'alal jech chavalique: ‘Toj chopol li mexa yu'un Muc'ul Diose, xchi'uc mu'yuc lec li ve'lil te oye’, ti xachiique.

¹³ Xchi'uc jech chavalic noxtoc: ‘Solel i'ech' xa co'ntoncutic yu'un scotol li c'usitic li' oye’, xachiic. Solel mu'yuc jtu chavilicun, ja' chavac'bicun jmotonin noxtoc li aveleq'uique, li coxoe, xchi'uc ti oy xchamele. ¿Me chacuyic ti ta jtsacboxuque?

¹⁴ Li boch'o chlo'lavane, ti chal ta jamal ti ja' chiyac'bun jmotonin li xchij te ta scoralil ti toj leque, pero ts'acal ja' chiyac'bun ti bu mu'yuc leque, ac'o c'otuc o ta stojol li c'usi chopole. Yu'un vu'un li Muc'ul Ajvalilune, xi'bilun ta scotol banamil”, xi li Muc'ul Diose.