San Lucas 18 - Bible in Tzotzil de Chenalhó with Deuterocanon

Lo'il sventa jun me'on ants xchi'uc jun chopol jchapanvanej

¹ Li Jesuse laj yalbe jun lo'il li yajchanc'optaque. Ja' sventa ti tsots sc'oplal li sc'opanel Diose, ti tsc'an mu x'ech' yo'ntonique.

² Jech laj yal: “Oy jun jchapanvanej ta jun lum. Mu xich' ta muc' li Diose; mu xich' ta muc' noxtoc li cristianoetique.

³ Oy jun me'on ants te nacal ec. Ep velta i'ay sc'opan li jchapanvaneje, jech laj yalbe: ‘Avocoluc coltaun, yu'un oy boch'o chiscontrainun’, xut.

⁴ Li jchapanvaneje ep c'ac'al muc stuc'ulanbe sc'op li me'on antse. Ts'acal to jech la snop: ‘Mu xixi' yu'un li Diose, mu xixi' yu'un li cristianoetique.

⁵ Ja' no'ox yu'un li' xva'vun tsa'bun xc'uxul jol li me'on antse, jech ta jchapan. Yu'un ch-ech' co'nton yu'un ti li' no'ox xva'vune’, xi”, xi li Jesuse.

⁶ Jech laj yal noxtoc li Cajvaltique: “Laj ava'yic c'usi chal li jchapanvanej ti chopol yo'ntone.

⁷ Yan li Dios ti tuc' yo'ntone, ¿me mu ja'uc jech ta xchapan c'usi tsc'anic ta c'ac'al ta ac'ubal li boch'otic t'ujbilic yu'une? Li stuque mu xjalij yu'un.

⁸ Ta ora chaxchapanboxuc. Pero c'alal chicha'tal, vu'un ti Xnich'on cristiano lic'ote, ¿me yoquel to jech oy xch'unojel avo'ntonic chvul jtaoxuc ec?”, xi li Jesuse.

Lo'il sventa fariseo xchi'uc jtsobpatan

⁹ Li Jesuse laj yal jun lo'il noxtoc ta sventa li boch'otic tuc' yo'nton yalojique, ti mu'yuc stu chilic li yantique. Jech laj yal:

¹⁰ “Oy chib viniquetic bat sc'opanic Dios ta ch'ulna. Li june ja' fariseo; li yane ja' jtsobpatan.

¹¹ Li fariseoe te c'ot sva'an sba ti c'alal la sc'opan Diose, jech laj yal: ‘Dios, colavalbun ti mu jechuc co'nton jech chac c'u cha'al li yan cristianoetique. Yu'un li stuquique ta x'elc'ajic, mu'yuc tuc' yo'ntonic, ta xmulivajic. Mu jechuc co'nton noxtoc jech chac c'u cha'al li jtsobpatan li'i.

¹² Li vu'une chib velta ta xquicta ixim ta jun xemuna. Scotol li c'usitic ta jtae ta jloq'ues jun ta lajlajuneb sventa amoton’, xut li Diose.

¹³ Yan li jtsobpatane nom no'ox va'al icom. Mu sc'an stoy sat ta vinajel. Ja' no'ox la smajilan sna yo'nton, jech la sc'opan Dios: ‘Dios cu'un, c'uxubinun, yu'un jpasmulilun’, xut.

¹⁴ Chacalboxuc ava'yic, li jtsobpatane mu'yuc xa smul ch-ilat yu'un Dios ti c'alal isut batel ta snae. Yan li fariseoe mu jechuc. Yu'un li boch'otic tstoy sbaique ja' ta sbic'tajesatic. Yan li boch'otic biq'uit ta xac' sbaique ja' ta x'ac'atic ta ich'el ta muc' yu'un li Diose”, xi li Jesuse.

Laj yac'be bendición ololetic li Jesuse

¹⁵ Li cristianoetique laj yiq'uic tal ololetic ta stojol li Jesuse, yu'un ac'o yac' sc'ob ta stojolic. C'alal laj yilic li yajchanc'optaque, la spajesic.

¹⁶ Pero li Jesuse laj yic' li ololetique, jech laj yal: —Ac'o talicuc ta jtojol li ololetique; mu xapajesic. Yu'un li boch'o jech yo'ntonic jech chac c'u cha'al ololetique, ja' ta xventainatic yu'un Dios.

¹⁷ Jamal chacalboxuc, li boch'o mu sc'an xac' sba ta ventainel yu'un Diose, me mu jechuc yo'nton jech chac c'u cha'al li olole, mu xu' chich' ventainel o yu'un Dios —xi li Jesuse.

Sc'oplal jun jc'ulej vinic

¹⁸ Oy jun banquilal jech la sjac'be li Jesuse: —Lequil jchanubtasvanej, ¿c'usi ta jpas ti xu' chicuxi o sbatel osile? —xut.

¹⁹ Itac'ov li Jesuse: —¿C'u yu'un chavalbun ti lecune? Mu'yuc ono'ox boch'o lec; ja' no'ox lec stuc li Diose.

²⁰ Xana' ti jech chal li mantaletique: ‘Mu me xamulivaj; mu me xamilvan; mu me xa'elc'aj; mu me xanopbe smul achi'il; ich'o ta muc' atot ame'’, xi”, x'utat yu'un li Jesuse.

²¹ Itac'ov li vinique: —Scotol le'e ta jbic'tal ono'ox jch'unoj tal —xi.

²² C'alal laj ya'ay Jesús ti jech itac'ove, jech laj yalbe: —Pero oy to jun c'usi sc'an avu'un. Chono scotol li c'usitic oy avu'une; q'uelanbo me'onetic. Jech chata ac'ulejal te ta vinajel. Jech xu' chtal achi'inun —xut.

²³ C'alal laj ya'ay jech li vinique, lic yat yo'nton, yu'un toj ep sc'ulejal.

²⁴ C'alal laj yil Jesús ti ep chat yo'ntone, jech laj yal: —Toj vocol chac' sbaic ta ventainel yu'un Dios li jc'ulejetique.

²⁵ Ja' mu vocoluc ta xjelov jcot camello ta chac acuxa; ja' toj vocol ch-ochic yo' bu chventainvan Dios li jc'ulejetique —xi li Jesuse.

²⁶ Li boch'otic laj ya'yique jech la sjaq'uic: —¿Boch'o ono'ox xu' ta xcol cha'e? —xutic.

²⁷ Itac'ov li Jesuse: —Li c'usi mu xu' yu'un cristianoe, li Diose xu' yu'un —xut.

²⁸ Li Pedroe jech laj yal ec: —Cajval, li vu'uncutique laj xa jcomtsancutic scotol li c'usitic oy cu'uncutique. Li' xa jchi'inojotcutic —xut.

²⁹ Itac'ov li Jesuse: —Melel li c'usi chacalboxuque, li boch'o laj xa scomtsan sna, me yajnil, me xchi'iltac ta voq'uel, me stot sme', me xnich'nab, ti ja' tsots sc'oplal cha'ay chac' sba ta ventainel yu'un Diose,

³⁰ ta stabe ep xq'uexol li' ta banamil, xchi'uc ta xcuxi sbatel osil —xi li Jesuse.

Li Jesuse laj yal yoxibal velta ti ta xmilate

³¹ Li Jesuse slecoj laj yic' loq'uel li yajchanc'optaque, jech laj yalbe: “Q'uelavilic, chijbat xa ta Jerusalén. Vu'un ti Xnich'on cristiano lic'ote, ja' te chc'ot ta pasel scotol li jc'oplal la sts'ibaic comel yaj'alc'optac Dios ta vo'onee.

³² Chi'ac'at ta sc'ob yanlumetic; ta xixchopolc'optaicun; ta xislabanicun; ta xistubtaicun.

³³ Ta xac'bicun nucul; ta xismilicun; pero ta xicha'cuxi ta yoxibal c'ac'al”, xi li Jesuse.

³⁴ Pero li yajchanc'optaque muc xa'ibeic smelol ti jech i'albatique. Muc x'ac'bat sna'ic c'usi smelol. Yu'un muc to chc'ot ta yo'ntonic.

Li Jesuse la sjambe sat jun ma'sat te ta nopol Jericó

³⁵ C'alal nopol xa x'ech'ic batel ta lum Jericó li Jesuse, te chotol la staic ta ti'be jun ma'sat; te ta sc'an limosna.

³⁶ C'alal laj ya'ay ta xjelov ep cristianoetique, la sjac' c'usi chc'ot ta pasel.

³⁷ I'albat ti ja' te ta xjelov batel li Jesús liquem ta Nazarete.

³⁸ Jech tsots lic yapta li Jesuse: —¡Jesús, smomnich'on David, avocoluc c'uxubinun! —xut.

³⁹ Li boch'otic ba'yucbeique laj yutic, yu'un ac'o ch'abiuc. Pero yo'to tsots lic avanuc, jech laj yal: —¡Smomnich'on David, avocoluc c'uxubinun! —xi.

⁴⁰ Li Jesuse iva'i, la stac ta iq'uel. C'alal ivul yo' bu oye, jech la sjac'be:

⁴¹ —¿C'usi chac'an ta jpasbot? —xut. Itac'ov li ma'sate: —Cajval, ta jc'an ac'o jamuc jsat —xi.

⁴² Li Jesuse jech laj yalbe: —Lec oy, ac'o jamuc li asate. Ta sventa xch'unojel avo'nton ti lacole —xut.

⁴³ Jech ta ora ijam li sate. La xchi'in batel li Jesuse; laj yalbe batel slequilal Dios. C'alal laj yil scotol li cristianoetique, laj yalbeic slequilal Dios ec.