Levítico 14 - Bible in Tzotzil de Chenalhó with Deuterocanon

Chanubtasel ta sventa c'u x'elan chich'ic lecubtasel li boch'otic ip cha'yic c'a'el chamele

¹ Li Muc'ul Diose la sc'opan yan velta li Moisese, jech laj yalbe:

² “Li'i ja' chanubtasel ta sventa c'u x'elan chich' lecubtasel li boch'o ip cha'ay c'a'el chamele: Li boch'o ip cha'ye, ac'o yich' iq'uel batel ta stojol li palee.

³ Li pale ac'o yic' loq'uel ta spat to ti bu apasoj acarpanaique yu'un ja' te ac'o sq'uel lec. Me laj yil ti colem xa li sc'a'el chamele,

⁴ ac'o stac ta ich'el cha'cotuc bic'tal mut ti bu lequique, xchi'uc ch'ut te', tsajal poc', xchi'uc hisopo te' sventa chich' lecubtasel o.

⁵ Ac'o yal mantal ti ac'o yich' milel jcotuc li mute. Te ac'o yich' milel ta jun bin ti oy ya'lel lupbil tal ta nio'e.

⁶ Li palee ac'o stsac li jcot unin mut cuxule, xchi'uc li ch'ut te'e, li tsajal poq'ue xchi'uc li hisopo te'e. Ac'o sts'aj ta xch'ich'al li chamen mut te ta vo' ti lupbil tal ta nio'e.

⁷ Ts'acal ac'o svij ta ch'ich' vucub velta li boch'o chich' lecubtasel ta sventa c'a'el chamele. Ac'o yal ti lec xa icome. Li jcot mut cuxul icome ac'o scolta batel.

⁸ “Li boch'o chich' lecubtasele, ac'o xchuc' lec sc'u'. Ac'o xjux scotol stsotsil sbec'tal xchi'uc sjol; ac'o atinuc lec, jech lecuben xa chcom o. Jech xu' xa ch-och batel te yo' bu apasoj acarpanaique, pero vucub c'ac'al te no'ox ac'o oyuc ta osilaltic. Mu to xu' ch-och ta scarpana.

⁹ Ta svucubal c'ac'al ac'o xjux yan velta li stsotsil sjole, li yisime, li smotsobe xchi'uc scotol li stsotsile. Ac'o xchuc' lec sc'u'; ac'o atinuc lec, jech lecubtasbil xa chcom o.

¹⁰ Ta xvaxquibal c'ac'al ac'o yich' tal cha'cotuc ch'ium chij ti bu ven lequique, xchi'uc jcot tsebal chij ti bu leque, ti jun to jabil svoq'uele, xchi'uc o'lol svucubal kilo lequil arina vots'bil ta aceite, xchi'uc jutuc mu sta o'lol litro aceite.

¹¹ Li pale ti oy ta sventa tslecubtasvane ac'o sva'an ta jtojol li boch'o chich' lecubtasele xchi'uc li c'usi yich'oj tale. Te ac'o sva'an ta sti' ch'ulna pasbil ta nucul.

¹² Ac'o stsac jcotuc li ch'ium chije xchi'uc li aceite ti jutuc mu o'loluc litroe. Ja' milbil matanal ta sventa li c'unil mulil staoje. Ac'o sye'bun ta jtojol, vu'un li Muc'ul Diosune.

¹³ Ts'acal ac'o smil te yo' bu chich' ono'ox milel li matanal sventa mulile xchi'uc li chic'bil matanaletique. Li milbil matanal ta sventa c'unil mulile ja' chich' li palee, xchi'uc ja' chich' noxtoc li milbil matanal ta sventa mulile yu'un ja' bats'i lequil ch'ul matanal xa c'otem.

¹⁴ “Li palee ac'o stsac jutebuc xch'ich'al li milbil matanal ta sventa c'unil mulile. Ac'o sbonbe ta slajeb xlechlechil sbats'ichiquin li boch'o chich' lecubtasele, xchi'uc ta sme' sbats'ic'ob xchi'uc ta sme' sbats'i-acan.

¹⁵ Ac'o xloch' jutebuc ta sts'et c'ob li aceitee. Ac'o sts'aj jun sbic'tal sbats'ic'ob ta aceite ti te xloch'oj ta sts'et c'obe.

¹⁶ Ac'o svij vucubuc velta ta jtojol, vu'un li Muc'ul Diosune.

¹⁷ Ti c'u x'elan chcom ta sc'ob li aceitee, ac'o xjaxbe ta slajeb xlechlechil sbats'ichiquin li boch'o chich' lecubtasele, xchi'uc ta sme' sbats'ic'ob, xchi'uc ta sme' sbats'i-acan. Ja' co'ol chich' pasel jech chac c'u cha'al li xch'ich'al milbil matanal ta sventa c'unil mulile.

¹⁸ Li scomelal aceite te ta sc'obe ac'o xjaxbe ta sjol li boch'o chich' lecubtasele. Ac'o yac' ta ch'aybel smul ta jtojol, jech ch'aybil chc'ot smul li boch'o ip cha'ye.

¹⁹ Li palee ac'o yac'bun noxtoc li milbil matanal sventa mulile yu'un ja' jech chac' ta ch'aybel o smul li boch'o ta xich' lecubtasele. Ts'acal ac'o smil li chij chich' chiq'uel ta sventa jmotone.

²⁰ Te co'ol ac'o yac' ta sba scajleb jmoton xchi'uc li c'usitic co'oltic jech chac c'u cha'al trigoe. Li palee ac'o yac' ta ch'aybel smul li boch'o ip cha'ye, jech lecubtasbil xa chcom o.

²¹ “Me me'on no'ox li boch'o ip cha'ye, ac'o yic' tal jcotuc ch'ium chij sventa c'unil mulil, xchi'uc ac'o yich' ye'el ta jtojol jech jech chac c'u cha'al matanal sventa xch'ayubil smul, jech ch'aybil smul chc'ot. Ac'o yac'be xchi'ilin ech'em jutuc ta chib kilo arina ti bu ven leque, ti vots'bil ta aceitee. Xchi'uc ac'o yac' jutuc mu o'loluc litro aceite,

²² xchi'uc cha'cot puruvoc stsu, o me cha'cot stsumut, ja' ti c'u x'elan xu' yu'une. Li jcote ja' milbil matanal ta sventa smul; yan li jcote ja' chic'bil matanal chc'ot.

²³ Ta xvaxquibal c'ac'al ac'o yich' batel ta stojol pale scotol yu'un ja' sventa chich' lecubtasel o. Te ac'o yac' ta jtojol ta sti' ch'ulna pasbil ta nucul.

²⁴ Li palee ac'o stsac li jcot chij matanal sventa c'unil mulile xchi'uc li aceite ti jutuc mu sta o'lol litroe. Ac'o yac' ta jtojol, ja' jech chc'ot jech chac c'u cha'al ye'bil matanal.

²⁵ Li palee ac'o smil li chij sventa c'unil mulile. Li xch'ich'ale ac'o stsac jutebuc, ac'o sbonbe ta slajeb xlechlechil sbats'ichiquin li boch'o chich' lecubtasele, xchi'uc ta sme' sbats'ic'ob, xchi'uc ta sme' sbats'i-acan.

²⁶ Ts'acal ac'o xloch' ta sts'et c'ob jutebuc li aceitee.

²⁷ Ac'o sts'aj jun sbic'tal sbats'ic'ob ta ch'ich' ti te xloch'oje; ac'o svij vucub velta ta jtojol, vu'un li Muc'ul Diosune.

²⁸ Xchi'uc ac'o sbonbe ta aceite slajeb xlechlechil sbats'ichiquin li boch'o chich' lecubtasele, xchi'uc ta sme' sbats'ic'ob, xchi'uc ta sme' sbats'i-acan, ja' te yo' bu chich' bonbel li xch'ich'al milbil matanal ta sventa c'unil mulile.

²⁹ Li scomelal aceitee ac'o xjaxbe ta sjol li boch'o chich' lecubtasele yu'un jech ch'aybil smul chc'ot ta jtojol.

³⁰ Li palee ac'o yac' ta jtojol jcotuc li puruvoc stsue, o me ja' li stsumute, ja' li c'usi xu' yu'un chich' tal li boch'o chich' lecubtasele.

³¹ Li jcot mute ja' milbil matanal sventa mulil; li yan jcote ja' sventa chic'bil matanal. Xchi'uc ac'o yac' li matanal ti co'ol jech chac c'u cha'al trigoe. Li palee ac'o xch'aybe smul ta jtojol, jech ch'aybil chc'ot smul li boch'o ta xich' lecubtasele”, xi li Muc'ul Diose.

³² Ja' jech li mantal ta sventa boch'otic ip cha'yic c'a'el chamel ti mu xu' yu'unic chaq'uic ep matanal ta sventa chich'ic lecubtasel oe.

Chanubtasel sventa c'u x'elan chich' lecubtasel me oy chlic sc'a'el chamel naetique

³³ Li Muc'ul Diose la sc'opan yan velta li Moisés xchi'uc Aarone, jech laj yalbe:

³⁴ “C'alal me ochemoxuc xa'ox batel ta Canaán banamil ti bu chacac'boxuc ta ac'obique, ta jtac batel c'a'el chamel ta junuc na te ta avosilalic.

³⁵ Li boch'o jech chc'ot ta pasel ta snae, ac'o bat yalbe ya'ay li palee. Jech ac'o yalbe: ‘Ja' c'a'el chamel yilel ti te xa chvinaj ta jnae’, ac'o yut c'otel.

³⁶ “Li palee ac'o yal batel mantal ti ac'o sloq'uesic c'usitic te oy ta na ti c'alal mu'yuc to chbat sq'uel me ja' li c'a'el chamele yu'un jech mu soc scotol li c'usitic te oy ta nae. Ts'acal ac'o och sq'uel li palee.

³⁷ “Me laj yil ti toj tsots chvinaj li chamel te ta c'alnae, xchi'uc me yaxlebantic sba chvinaj, o me chacmuyantic sbae xchi'uc me chch'opq'uij ochele,

³⁸ ac'o loc'uc ta yut na li palee. Ac'o yal mantal ti ac'o macluc vucubuc c'ac'al li nae.

³⁹ Ta svucubal c'ac'al ac'o bat sq'uel yan velta. Me laj yil ti yantic no'ox ta xpuc batel ta scotol c'alnae,

⁴⁰ ac'o yal mantal ti ac'o yich' loq'uesel li tonetic bu xcuchojan xa li chamele. Te ac'o bat yich' ch'ayel ti bu mu'yuc lec li banamil ta spat to alumalique.

⁴¹ Xchi'uc ac'o yal mantal ti ac'o yich' josel loq'uel scotol ti c'u smuc'ul yut nae. Te ac'o bat yich' ch'ayel ti bu mu'yuc lec li banamil ta spat to alumalique.

⁴² Ac'o yich' aq'uel yan tonetic sventa chich' meltsanel ti bu laj yich' loq'uesele, xchi'uc ac'o yich' ac'bel yan slumal sventa chich' nojesel li yut nae.

⁴³ “Me ts'acal chlic yan velta li chamel c'alal loq'uesbil xa'ox li tonetic bu chopolique, xchi'uc me josbil xa loq'uel scotol li banamil c'u smuc'ul yut nae,

⁴⁴ li palee ac'o och sq'uel lec yan velta. Me laj yil ti spucoj xa sba ta scotol li nae, yu'un ja' xa li c'a'el chamel ti toj chopole; li nae mu xa stac' nainel.

⁴⁵ Ac'o yich' vuq'uesel scotol. Li stanale, li ste'eltaque, xchi'uc scotol li c'usitic pasbil oe, ac'o bat yich' ch'ayel scotol yo' bu mu'yuc lec li banamil ta spat to alumalique.

⁴⁶ Li boch'o ta x'och ta yut na ti c'alal yaloj mantal pale ti macal o vucub c'ac'ale, chopol xa chcom o c'alal to ch-och ac'ubal.

⁴⁷ Li boch'o te ta xve', o te ta xvay ta yut li nae, ac'o xchuc' lec sc'u' yu'un jech lec ta xcom.

⁴⁸ “C'alal me la sq'uel lec na li palee, me laj yil ti muc yanticuc ta x'epaj li chamel c'alal cha'meltsanbil xa'ox li nae, ac'o yal ti stac' xa nainele yu'un te no'ox ipaj li chamele.

⁴⁹ C'alal chich' lecubtasel li nae, ac'o yich'ic tal cha'cotuc bic'tal mut, xchi'uc xch'ut te', tsajal poc', xchi'uc hisopo te'.

⁵⁰ Li palee ac'o smil jcotuc li mute. Te ac'o smil ta bin ti oy ya'lel lupbil tal ta nio'e.

⁵¹ Ts'acal ac'o stsac li ch'ut te'e, li hisopo te'e, li tsajal poq'ue, xchi'uc li jcot mut ti cuxul toe. Ac'o sts'aj ta xch'ich'al li chamen mute xchi'uc ta vo' ti lupbil tal ta nio'e. Ac'o svij o vucub velta li nae.

⁵² Jech lecubtasbil chcom o ta xch'ich'al mut li nae, xchi'uc ta vo' ti lupbil tal ta nio'e xchi'uc ta sventa li jcot mut ti cuxul icome, xchi'uc ta sventa li ch'ut te'e, li hisopo te'e, xchi'uc li tsajal poq'ue.

⁵³ Li mut ti cuxul comene ac'o bat scolta ta spat to alumalic. Ja' jech tsc'an pasel ta sventa chich' lecubtasel li nae”, xi li Muc'ul Diose.

⁵⁴ Ja' jech li chanubtasel ta sventa se'p, o ta sventa c'usiuc no'ox c'a'el chamelale.

⁵⁵ Ta sventa sc'a'el chamel c'u'iletic xchi'uc naetic,

⁵⁶ xchi'uc ta sventa sital, ta sventa chinetic, xchi'uc ta sventa c'usitic lebajtic chlic ta jnuculiltique.

⁵⁷ Jech xu' chich' otquinel bu chopol xchi'uc bu lec. Ja' no'ox jech yepal mantal ta sventa scotol li chameletic le'e.