Lamentaciones 5 - Bible in Tzotzil de Chenalhó with Deuterocanon

Oq'uel ta stojol Dios ta sventa li judaetic chich'ic vocole

¹ Muc'ul Dios, na'o me li c'usi c'otem ta pasel ta jtojolcutique; q'uelavil ti c'u x'elan jvocolcutic ta uts'intaele.

² Scotol li c'usi oy cu'uncutique ochem ta sc'obic li yanlum cristianoetique; li jnacutique yan cristiano xa snainoj.

³ Me'on ololuncutic xa, mu'yuc xa jtotcutic; li jme'cutique comenic ta me'on antsetic.

⁴ Li vo' chcuch'cutique manbil xa ta jpascutic; li jsi'cutique ta jmancutic noxtoc.

⁵ Toj tsots uts'intael chca'icutic; ista xa co'ntoncutic, yu'un mu'yuc ta jcuxcutic o jutuc.

⁶ Ta stojol xa egiptoetic xchi'uc asiriaetic la jbech jc'obcutic yo' jech ta jta jve'elcutique.

⁷ Li jtot jme'cutique la sa' smulic, jech ichamic; vu'uncutic la jcuchbecutic comel li smulique.

⁸ Ja' yu'un li' ta orae mozoinbiluncutic xa yu'un ec li mozoetique; mu'yuc boch'o chisloq'uesuncutic ta sc'obic.

⁹ Jutuc xa mu teuc chichamcutic ta sa'el jve'elcutic, ta scoj ti ep jmilvanejetic ta xocol banamile.

¹⁰ Ic'al nucul xa jnuculilcutic ta scoj li stsatsal vi'nale; ja' xa jech ta q'uelel jech chac c'u cha'al jun horno ti ic'uben ta ch'ayile.

¹¹ Li antsetic ta Sión xchi'uc li tsebetic ta lumetic te ta Judae ilajic ta tsaquel; ep laj yich'ic uts'intael.

¹² Li banquilaletic cu'uncutique ta sc'obic laj yich'ic joc'anel ta te'; li moletique muc x'ich'atic ta muc'.

¹³ Li viniquetic ti lec to tsots xu' yu'unique isujatic ta juch'nej; li queremetique ipasic ta yavinic ta cuch si'.

¹⁴ Mu'yuc xa tstsob sbaic banquilaletic te ta lum ti bu to'ox chchapanvanique; mu'yuc xa bu chvinaj chq'uejin querem tsebetic.

¹⁵ Mu'yuc xa boch'o xcuxet yo'nton te ta lum; li ac'ot ta jpascutic to'oxe ic'ataj ta at-o'nton.

¹⁶ Ibaj yalel ta banamil li scoronail jolcutique; ¡ay, toj abul jbacutic ta scoj ti la jsa' jmulcutique!

¹⁷ Ja' yu'un toj ven chopol co'nton chca'aycutic; xmaclajet xa jsatcutic ta scoj ti ep chloc' ya'lele.

¹⁸ Yu'un li vits Sione yav xa icom ta jyalel; puru vetetic xa te yalel muyelic.

¹⁹ Pero li vo'ote, Muc'ul Dios, te oyot o sbatel osil; vo'ot chapas o mantal ti jayc'ol cristianoetic chjelovic ta banamile.

²⁰ ¿C'u yu'un ti j'ech'el chach'ayuncutic o ta avo'ntone? ¿C'u yu'un ti toj ep c'ac'al chacomtsanuncutique?

²¹ Muc'ul Dios, ic'uncutic sutel ta atojol yan velta, ta jc'an chisutcutic tal; ac'buncutic yan velta jech chac c'u cha'al oyuncutic ono'ox avu'un ta sliquebe.

²² ¿Me yu'un j'ech'el laj abajuncutic o? ¿Me yu'un la'ilin o ta jtojolcutic?