Lamentaciones 4 - Bible in Tzotzil de Chenalhó with Deuterocanon

Toj tsots vocol laj yich' li lum Jerusalene

¹ ¿C'uxi isoc li c'anal taq'uine? ¿C'uxi ich'ay xojobal li lequil c'anal taq'uine? Li xch'ul tanaltac ch'ulnae jatsa xa bu bejajtic batel ta chiquin xoraltic.

² Li yajvaltac Sione lec to'ox ich'bilic ta muc'; xjelov to'ox slequil ch-ilatic jech chac c'u cha'al bats'i lequil c'anal taq'uin. Pero tana ja' xa jech ch-ilatic jech chac c'u cha'al jbej bin ti patbil ta lum yu'un jpatbine.

³ Li me' oq'uiletique ta stuc'ulanic, ta xchu'untasic lec li yolique, pero li jchi'iltac ta jlumale toj ven chopolic ta jyalel; co'ol xa stalelic jech chac c'u cha'al avestruz mutetic xch'i ta xocol banamil.

⁴ Li jchu'unom ololetique ipac'tsaj ta spac'oic li yoq'uic ta scoj taqui o'nale; li bic'tal ololetique ta sc'an sve'elic, pero mu'yuc boch'o chac'.

⁵ Li boch'otic lec to'ox noj xch'utique chchamic xa ta vi'nal ta xoraltic; li boch'otic toj jun yutsil to'ox bu ich'iic tale ta c'a'eptic xa nacalic batel.

⁶ Li jchi'iltac ta jlumale ijelov to smulic jech chac c'u cha'al smulic li cristianoetic ta Sodoma ta vo'onee, ja' li lum ti ta anil no'ox i'ulesate, ti ma'uc to uts oy boch'o ay scontraine.

⁷ Li banquilaletic yu'unic ta Jerusalene lec to'ox saquic jech chac c'u cha'al tayo; mu to'ox sna' xatinic ic'ubal, jech chac c'u cha'al saquil ya'lel chu' vacax. Lec to'ox chac ch'oxan sbec'talic, yu'un lec sololic; toj to'ox lec c'upil sbaic jech chac c'u cha'al lequil ton.

⁸ Pero li' ta orae i'ic'um satic jech chac c'u cha'al si'bac; mu xa x'otquinatic ti c'alal chloq'uic ta xoraltique. Ibacubic ta jyalel, jeche' xa pac'ajtic ta bac li snuculilique. Solel itaquij xa sbec'talic jech chac c'u cha'al te'.

⁹ Ja' jutuc no'ox svocolic li boch'otic chchamic ta espadae; ja' toj tsots svocolic li boch'otic chchamic ta vi'nale, yu'un li stuquique ta c'unc'un ch-ochbajic batel ta be ta scoj ti mu'yuc bu sta c'usitic tstunique.

¹⁰ Li lequil antsetic to'oxe, stuquic lic stsac li yolique; yol stuquic lic span sti'ic ti c'alal ja'o tsots svocol li jlumale.

¹¹ Yu'un tsots i'ilin li Muc'ul Diose, la sloq'ues tal scotol li sc'ac'al yo'ntone; jech la stsanbe tal sc'ac'al li Sione; la xchic'be o c'alal ta snacleb.

¹² Li ajvaliletic ta banamil xchi'uc scotol li cristianoetic nacalic ta sbejel banamile, xch'unojic ti mu xu' ch-ochentaat o yu'un yajcontra li lum Jerusalene.

¹³ Ja' ta smul j'alc'opetic xchi'uc paleetic yu'unic, yu'un la smalbeic xch'ich'al te ta lum li boch'otic mu'yuc smulique.

¹⁴ Ja' yu'un jeche' xmachlajet chanovic ta xoraltic jech chac c'u cha'al ma'sat; pixilic ta ch'ich', me jutuc mu stac' picbel li sc'u'ique.

¹⁵ Jech ch-albatic: “¡Loc'anic batel li'i! ¡Voc'o abaic ta jtojolcutic!”, x'utatic. “Mu xa x'iq'uinic ta jyalel, mu xapiquic”, xi ch-albat sc'oplalic. Jech ijatovic batel, la spuc sbaic batel ta yantic banamil. “Mu xu' chcomic li'i”, xi sc'oplalic yu'un li yanlum cristianoetique.

¹⁶ Li Muc'ul Diose stuc la sjip loq'uel ta sc'ac'al yo'nton; mu xa sc'an sq'uel batel. Muc xa x'ich'eic o ta muc' li paleetique; mu'yuc bu abul sba i'ilatic li moletique.

¹⁷ Altic ilub jsatcutic ta smala-malael li coltaele; te jmala-mala chtal scoltauncutic li jun lume, pero mu xu' yu'un chcoltavan.

¹⁸ Solel pamuc'tabiluncutic bu chixanovcutic, jech mu xu' chiloc'cutic ta xoraltic. Icomaj xa corailcutic, ic'ot xa jc'ac'alilcutic; ja' xa jlajebcutic o.

¹⁹ Li jnutsvanejetic cu'uncutique ta vilel no'ox chtalic ta anil jech chac c'u cha'al xiquetic; snutsojuncutic batel ta vitsetic, la smacuncutic ta be te ta xocol banamil.

²⁰ Laj xa yich' chuquel li st'ujbil ajvalil Muc'ul Diose ti la jnoptic ja' chispojutic yu'un jech mu xijchame; ja' li boch'o jech laj caltic ta stojole: “Ja' ta xyaxinal xu' chijcuxiutic te ta stojol li yantic lumetique”, ti xijchiutique.

²¹ Edom, vo'ot ti te nacalot ta yosilal Uze, tse'inan, cuxetuc no'ox avo'nton, yu'un te chtal ta atojol ec li sbel bis ti toj ch'a ta uch'ele; yacuben chacomic, solel t'anal chacomic yu'un.

²² Lum Sión, its'aqui xa li stojol amul c'u yepal sc'oplal chavich'e; mu'yuc xa chabat o ta chuquel yan velta. Pero li vo'ote Edom, ta xavich' avocol ec ta scoj li amule; ta xavich' vinajesbel scotol li c'usi chopol apasoje.