Lamentaciones 3 - Bible in Tzotzil de Chenalhó with Deuterocanon

Ta slequil yo'nton Dios laj to yich'ic coltael li israeletique

¹ Vu'un laj quil lec li vocoletic ital ta scoj sc'ac'al yo'nton Muc'ul Diose.

² Laj yic'un batel ta ic'al osil, laj yac' xanovcun batel ti bu mu'yuc sac osile.

³ Solel scotol ora, scotol c'ac'al te cajal o ta jba yalal sc'ob li Diose.

⁴ Laj yuts'inta li jbec'tale, tuch'ultic sba yu'un li jnuculile; solel la slilinbun scotol li jbaquiltaque.

⁵ Solel la setuun lec ta tsots at-o'nton, ta tsots vocolajel;

⁶ laj yac'un ta ic' osil jech chac c'u cha'al li boch'otic vo'one xa yochelic ta ch'ene.

⁷ La smacun ta jujujot, mu xa bu xu' xijelov o; la xchucun ta alal cadena.

⁸ Ac'o me tsots xi'avet ta sc'anel vocol ta stojol, pero muc stuc'ulanbun li jc'ope.

⁹ La smacbun ta muc'tic ton li jbee; la soquesun o ta be ta xanubal.

¹⁰ Ja' jech la spas sba ta jtojol jech chac c'u cha'al jcot león ti lec xa snac'oj sbae, xchi'uc jech chac c'u cha'al jcot oso ti tsc'an xa chvoch'ivane.

¹¹ Laj yac' ch'aycun o ta be, biq'uitic la slilinun; toj ven abul jba, jtuc licom yu'un.

¹² La st'ilesbun tal li sflechae; la scuyun jech chac c'u cha'al xchanubil sc'ob.

¹³ Li flechaetic yu'un Diose mats'ajtic ic'ot ta yut jbec'tal.

¹⁴ Solel na'lebilun yu'unic li jchi'iltaque; scotol c'ac'al tslabanicun ta q'ueoj.

¹⁵ Li Diose toj tsots jvocol laj yac'bun; toj ch'a ta jyalel li c'usi laj yac'bun cuch'e.

¹⁶ Toj jtsiq'uel ic'ot stanal que ta tontic yu'un; la sbalilanun ta pucuctic.

¹⁷ Laj xa sc'oplal ti jun to'ox co'ntone; ich'ay o ta co'nton ti lec to'ox oyune.

¹⁸ Laj nop ti ich'ay xa o stsatsal li co'nton, ti jmalaoj chiscoltaun li Muc'ul Diose.

¹⁹ C'alal ta jnop ti toj c'ux jvocole, ti yalemun o ta lume, mu xa xcuch cu'un chca'ay li yipale.

²⁰ Mu xch'ay o ta co'nton, yu'un snet'ojun o yalel chca'ay.

²¹ Pero oy c'usi yan ti mu xch'ay o ta co'ntone, ja' yu'un ja' cochel smalael:

²² Li c'uxubinel yu'un Muc'ul Diose mu'yuc slajeb; mu sna' xlaj o li slequil yo'ntone.

²³ Ta jujun sob ta ach'um yan velta; solel mu sna' xjel o li yo'ntone.

²⁴ Ja' yu'un jech chcal: ja' no'ox te ta jta o coltael ta stojol li Muc'ul Diose, ja' yu'un ja' no'ox jpatoj o co'nton ta stojol.

²⁵ Li Muc'ul Diose toj lec c'usi tspas ta stojol li boch'otic ja' no'ox tspat yo'ntonic ta stojole, ti ja' no'ox ta sa'ic coltael yu'une.

²⁶ Ja' lec ti ac'o no'ox jmala ca'itic chiscoltautic stuc li Muc'ul Diose.

²⁷ Toj lec li boch'o ta sbic'tal ono'ox ta xcuch yu'un tsots taq'uiele.

²⁸ Te no'ox ac'o ch'anxiuc, yu'un ja' Dios chac' tal li c'usi chtal ta stojole.

²⁹ Ac'o no'ox spatan sba ta banamil, yu'un jech xu' to tsta li coltaele.

³⁰ Ac'o no'ox yac' ta majel xocon sat me oy boch'o tsc'an tsmaje; ac'o sts'ic li tsots na'leel ch-ac'bate.

³¹ Yu'un mu j'ech'eluc chiscomtsanutic o li Cajvaltique.

³² Ac'o me chijyac'butic jvocoltic, pero chixc'uxubinutic noxtoc, yu'un toj ep li slequil yo'ntone.

³³ Yu'un mu xcuxetuc xa yo'nton c'alal chac'be svocol, c'alal chac'be yat yo'nton li cristianoetique.

³⁴ Me chich' pech'el ta teq'uel li jchuqueletic li' ta banamile,

³⁵ me chmacbat c'usi tsc'an jun cristiano ta stojol li Boch'o oy ta toyole,

³⁶ me mu'yuc tuc' chapanel chich' jun cristianoe, le'e mu sc'an jech li Cajvaltique.

³⁷ ¿Boch'o xu' yu'un oy c'usi chac' c'otuc ta pasel me mu'yuc chal mantal stuc li Diose?

³⁸ Me lec, me chopol c'usi chtale, yu'un ja' jech chloc' ta ye stuc li Boch'o oy ta toyole.

³⁹ Me cuxul li jun jpasmulil cristianoe, ¿c'u yu'un xbic'tal vulvun c'alal oy c'usi chc'ot ta pasel ta stojole?

⁴⁰ Jnoptic lec c'u x'elan li be jtamojtique; sutcutic batel yan velta ta stojol li Muc'ul Diose.

⁴¹ Ja' te ac'o cac' jol co'ntontic ta stojol li Dios te oy ta vinajele; ac'o jtoy jc'obtic ta stojol, ac'o jc'opantic Dios jech chac li'i:

⁴² “Li vu'uncutique ep jtaoj jmulcutic ta atojol; ep la jtoy jbacutic ta atojol, muc xats'icbuncutic.

⁴³ “Laj apixuncutic ta sc'ac'al avo'nton, laj anutsuncutic batel; laj amiluncutic, mu'yuc laj ats'icbuncutic.

⁴⁴ Laj apix aba lec ta toc, yu'un jech mu xava'ay ti xivocoletcutic to ta atojole.

⁴⁵ Laj acomtsanuncutic jech chac c'u cha'al c'a'ep ta stojol li yantic cristianoetique.

⁴⁶ “Scotol li cajcontracutique la sloq'uesic scotol li c'usi tsc'an yo'nton chalic ta jtojolcutique;

⁴⁷ puru xi'el, milel, tubesel, vocolajel xa no'ox oy ta jtojolcutic.

⁴⁸ Xco'laj xa xchi'uc uc'um chloc' ya'lel jsat c'alal chquilbe xc'uxul svocolic li jchi'iltaque.

⁴⁹ “Scotol c'ac'al xmalmun o ya'lel jsat; me jutuc mu xcux ta oq'uel ta sventa ti mu'yuc coltael chquile,

⁵⁰ ja' to me la sq'uelun yalel tal ta vinajel stuc li Muc'ul Diose.

⁵¹ Isol xa ta scotol jbec'tal ta scoj ti toj ep chi'oc' c'alal chquil c'usi c'otem ta pasel ta stojolic li antsetic ta jlumale.

⁵² “Li cajcontrataque ta jech no'ox la stsaquicun jech chac c'u cha'al jcot mut.

⁵³ Cuxul la stiq'uicun ta jun natil joc'; la smaquic ta ton li sti'e.

⁵⁴ Solel limuc ta vo' jcotlijil; laj nop ti te xa licham oe.

⁵⁵ “Muc'ul Dios, la jc'anbot tal vocol ta atojol ti c'alal te tiq'uilun ta yut natil joq'ue.

⁵⁶ Laj ava'ibun li jc'ope; muc xamac achiquin ti c'alal xivocolet ta atojole.

⁵⁷ C'alal la jc'opanote, lanopaj tal ta jtojol, jech laj avalbun: ‘Mu xaxi'’, xavutun.

⁵⁸ “Cajval, vo'ot laj ava'an aba ta jcoltael ti c'alal laj quich' tsots vocole; vo'ot laj apojun ti jech muc xichame.

⁵⁹ Muc'ul Dios, vo'ot aviloj lec scotol ti toj c'ux jvocole, ja' yu'un pojun me.

⁶⁰ Aviloj scotol li c'usi chopol tsc'an chispasbicune, xchi'uc li c'usi xchapanojic ta jtojole.

⁶¹ “Muc'ul Dios, ana'oj scotol li c'usitic chopol chalbicune, li c'usi chchapanic ta mucul ta jtojole.

⁶² Ava'yoj scotol li c'usitic chloc' ta yeique; scotol ora puru ta jcontra chc'opojic.

⁶³ Q'uelavil, c'alal chchotiic, c'alal chva'iique, chislabanicun, sq'uejimolicun cha'yic o.

⁶⁴ “Muc'ul Dios, ac'bo stojol li yabtelique; ja' jech xavac'be ti c'u x'elan lec xtojolin chavile.

⁶⁵ Pasbo ta tsots yo'ntonic, yu'un jech ac'o c'otuc ta stojolic li c'usi chopole.

⁶⁶ Muc'ul Dios, nutso ta sc'ac'al avo'nton, ac'o ch'ayuc o sts'unubalic li' ta banamil”, xi chcaltic.