Jueces 8 - Bible in Tzotzil de Chenalhó with Deuterocanon

Li Gedeone la xchuc ajvaliletic ta Madián

¹ Pero li jchop liquemic ta Efraine tsots lic svulilanic Gedeón ta sventa ti muc x'ic'atic batel ta scontrainel li madianetique.

² Li Gedeone jech itac'ov: —Q'uelavilic, vo'oxuc toj ep laj apasic jech chac c'u cha'al la jpas li vu'une. Ac'o me mu'yuc ep c'usi laj apasic, pero ja' toj tsots sc'oplal; ja' jutuc no'ox tsots sc'oplal li c'usitic ep la jpascutic vu'uncutique.

³ Yu'un li Diose laj yac' ta ac'obic li chib banquilaletic yu'un madianetic, ja' li Oreb xchi'uc Zeebe. ¿C'usi ep la jpas vu'un ti toj tsots sc'oplal jech chac c'u cha'al laj apasic li vo'oxuque? —xut. C'alal laj ya'yic c'usi laj yal li Gedeone, te i'ech' batel sc'ac'al yo'ntonic.

⁴ Li Gedeón xchi'uc oxib ciento (300) xchi'iltaque ic'otic ta uc'um Jordán. La xtuch'ic jelovel li uc'ume ac'o me lubenic xa ta snutsel li yajcontraique.

⁵ C'alal ic'otic ta Sucote, li Gedeone jech laj yalbe li boch'otic te nacajtique: —Avocolicuc ac'beic jutuc sve'elic li jchi'iltaque yu'un lubenic xa. Xchi'uc yu'un ta to jnutscutic batel li ajvaliletic yu'un madianetique, ja' li Zeba xchi'uc Zalmunae —xut.

⁶ Pero li banquilaletic te ta Sucote jech laj yalic: —¿Me yu'un tsaquem xa avu'unic li Zeba xchi'uc Zalmuna ti chac'an ta jmac'lincutic achi'iltaque? —xiic.

⁷ Itac'ov li Gedeone: —C'alal me laj yac' ta jc'ob Zeba xchi'uc Zalmuna li Muc'ul Diose, li' chisut tal; ta jlilin ta xch'ixtical xocol banamil xchi'uc ta zarza ch'ixetic li abec'talique —xut.

⁸ Imuyic batel ta Peniel; te c'ot sc'an jutuc ve'lil noxtoc. Pero co'ol itac'bat jech chac c'u cha'al itac'bat te ta Sucote.

⁹ Li Gedeone jech laj yalbe: —C'alal me la jpas tal canale, ta xvul jvuq'ues li toyol q'uelub osil li'i —xut.

¹⁰ Li ajvalil Zeba xchi'uc Zalmunae te oyic ta Carcor xchi'uc vo'lajunmil (15,000) viniquetic, ja' li soldadoetic liquemic ta stuq'uil sloq'ueb c'ac'al ti icolic to ta milele, yu'un li yantic xchi'iltaque ilajic ta milel vacvinic (120,000) ta mil.

¹¹ Li Gedeone te ibatic ta be xbat ta stuq'uil sloq'ueb c'ac'al yu'un Noba xchi'uc Jogbeha. La stsalic comel scotol li boch'otic te nacajtique, yu'un li soldadoetique mu'yuc chapalic.

¹² Li Zeba xchi'uc Zalmunae, ja' li chib ajvalil yu'un Madiane, ijatovic batel. Pero li Gedeone la snutsic batel, jech itsac yu'unic. Scotol li yajsoldadotaque ixi'ic ta jyalel.

¹³ C'alal isutic tal ta pleito li Gedeone, te ijelovic tal ta sbelal Heres.

¹⁴ Te la stsac jun querem liquem ta Sucot; oy c'usi la sjac'be. Li quereme laj yac'be sbi scotol li banquilaletic xchi'uc li moletic te ta Sucote; ts'ibabil ta vun laj yac'. Ja' vuclajuneb xchanvinic (77) ta scotol.

¹⁵ Li Gedeone jech bat yalbe li jnaclumetic te ta Sucote: —Q'uelavilic, li' oy li Zeba xchi'uc Zalmuna ti laj alabanicun ta sventae. Jech laj avalbicun: ‘¿Me yu'un chucbil xa avu'un li Zeba xchi'uc Zalmuna ti chac'anbuncutic sve'el achi'iltac ti lubenic xa ta xanubale?’, xavuticun. Pero q'uelavilic, li' xa oye —xut.

¹⁶ Jech li Gedeone la stsac li ch'ixetic liquem ta xocol banamile; ja' laj yac'be o stoj smulic li banquilaletic te ta Sucote.

¹⁷ Jech noxtoc la svuq'ues li toyol q'uelub osil ta Peniele, xchi'uc la smil li yajvaltac lume.

¹⁸ Ts'acal jech lic sjac'be li Zeba xchi'uc Zalmunae: —¿C'u x'elanic avil li viniquetic laj amil te ta Tabore? —xut. Itac'ovic: —Co'ol x'elanic jech chac c'u cha'alot. Li jujunique xco'laj xchi'uc xnich'on ajvalil —xiic.

¹⁹ Li Gedeone tsots lic avanuc: —Ja' jchi'iltac ta voq'uel ti laj amilique; ja' yalab li jme'e. Ta stojol cuxul Dios chacalboxuc: Ti manchuc laj amilique, mu'yuc chajmiloxuc ec ti jechuque —xut.

²⁰ Li Gedeone ta ora jech laj yalbe li sba xnich'on Jeter sbie: —¡Lican, bat milo! —xut. Pero li Jetere muc sc'an sloq'ues yespada; ixi', yu'un querem to.

²¹ Ja' yu'un li Zeba xchi'uc Zalmunae jech laj yalbeic li Gedeone: —¡Miluncutic atuc! Yu'un li vo'ote toj tsots avo'nton —xutic. Jech iva'i li Gedeone; la smil. Laj yich'be comel li xotajtic taq'uinetic spasojic ta xnichimal snuc' scamelloique.

²² Li israeletique jech lic yalbeic li Gedeone: —Vo'ot chacajvalinotcutic achi'uc anich'on xchi'uc amomnich'nabtac, yu'un vo'ot laj acoltauncutic loq'uel ta sc'ob li madianetique —xutic.

²³ Itac'ov li Gedeone: —Mu xavajvalinicun vu'un xchi'uc jnich'nab. Ja' xavajvalinic stuc li Muc'ul Diose.

²⁴ Li c'usi no'ox ta jc'anboxuque, ja' no'ox ac'bicun li nats'iletic ti laj apojic tale —xut. Li nats'iletique, pasbilic ta c'anal taq'uin; ja' tstunesic li yajcontraic la smilique, yu'un ja' jech stalelic li boch'otic te nacajtic ta xocol banamile.

²⁵ Li israeletique la sq'uiic poc' ta banamil; te la slamanic scotol li nats'iletic la staic tal jujunique. Scotol yo'nton laj yac'beic li Gedeone.

²⁶ Li nats'iletic pasbilic ta c'anal taq'uine jutuc mu sta balunlajuneb (19) kilo yalal. Ja' mu'yuc tsacbil ta venta li xnichimaltaque, li bic'tal lequil tonetic ti toj c'upilic sbae, xchi'uc li poq'uetic ti tsojtsojtic sba ti tstunesic li ajvaliletic ta Madiane, xchi'uc li nats'iletic ti yac'ojbeic ta snuc' scamelloique.

²⁷ Li Gedeone ja' lic spas o jun efod. Te la snac' ta Ofra, ta slumal. Li israeletique ja' lic yich'ic ta muc' li efode, jech ic'ataj ta svocolic te ta sjunul sna li Gedeone.

²⁸ Ja' jech i'och ta sc'ob israeletic li madianetique; mu'yuc xa bu xlic ayinuc stsatsalic yan velta. C'alal cuxul cha'vinic (40) jabil li Gedeone mu'yuc pleito laj ya'yic te ta yosilalic.

Icham li Gedeone

²⁹ Li Jerobaal, ja' li Gedeone, ibat naquiuc ta sna stuc.

³⁰ Li Gedeone oy lajuneb xchanvinic (70) xnich'nab, yu'un la sa' ep yajnil.

³¹ Jech i'ayin jun xnich'on ta sventa li yan ants yu'un te ta Siqueme; Abimelec laj yac'be sbi li xnich'one.

³² Li Gedeone icham, ven mol xa'ox. Te la smuquic ta smuquinal li stote, ja' li Joase; ja' te ta Ofra ta slumalic li abiezeretique.

³³ C'alal icham li Gedeone, li israeletique lic scomtsanic yan velta li Diose. Ja' lic yich'ic ta muc' li Baaletique, xchi'uc ja' la st'ujic ta sdiosic li Baal-berite.

³⁴ Muc xa xvul ta sjolic li Muc'ul Dios yu'unic ti ja' icoltaatic loq'uel ta sc'ob scotol li yajcontraic te setel ta spat xoconique.

³⁵ Muc xaq'uic ta ilel ta stojol yalab xnich'nab Jerobaal, ja' li Gedeone, ti toj xcuxet yo'ntonic yu'un li c'usi lec la spas ta stojolique.