Jueces 7 - Bible in Tzotzil de Chenalhó with Deuterocanon

La stsal madianetic li Gedeone

¹ Li Gedeón, ja' li Jerobaal yan sbie, sob iliquic xchi'uc scotol li boch'otic te xchi'inoje; te bat spas scarpanaic ta nopol nio' Arod. Yan li madianetique te spasoj scarpanaic ta stuq'uil norte ta stenlejaltic ta yoc vits More.

² Li Muc'ul Diose jech laj yalbe li Gedeone: “Li achi'iltac avic'oje toj ep; mu xu' chacac'bot ta ac'ob li madianetique. Yu'un naca me chlic atoy abaic, me jech chlic avalic: ‘Ivu' cu'un jtuctic’, naca me xachiic.

³ Ja' yu'un albo ti ac'o suticuc batel ta snaic sob oc'om li boch'otic ta xi'ique”, x'utat. Jech li Gedeone lic yalbe li xchi'iltaque. Jech isutic batel ta snaic chib xcha'vinic (22) ta mil. Ja' xa no'ox icom lajunmil (10,000).

⁴ Pero li Muc'ul Diose jech laj yal: “Ep to li achi'iltaque. Ja' lec ic'o batel ta uc'um. Ja' te ta xcac' ta ilel senyail; te chacalbot li boch'otic xu' chavic' batele xchi'uc li boch'otic mu xu' chavic' batele”, xut.

⁵ Li Gedeone laj yic' batel ta yuch'el yoxo' li xchi'iltaque. Li Muc'ul Diose jech laj yal: “Li boch'otic ta xloch' ta sc'obic li vo'e, ti ta slec' no'ox ochel ta yoq'uic c'alal chuch'ic jech chac c'u cha'al ts'i'etique, slecoj xavac'. Li boch'o ta xquejiic ta snijan sbaic ta xuch'ique slecoj xavac' noxtoc”, xut.

⁶ Li boch'otic la xloch' no'ox ta sc'obic laj yuch'ic vo'e ja' oxib ciento (300) ta scotol. Li yantique la snijan sbaic laj yuch'ic li vo'e.

⁷ Ja' yu'un li Muc'ul Diose jech laj yalbe li Gedeone: “Li oxib ciento (300) viniquetic le'e, lec xu' chajcoltaoxuc o acotolic, xchi'uc xu' chatsalic o li madianetique. Li yantique xu' ac'o suticuc batel ta snaic”, xut.

⁸ Jech li Gedeone laj yalbe ti xu' xa ac'o suticuc batel ta snaic li yantic xchi'iltaque. Pero c'alal mu'yuc to chbatique, la stsobbe comel li sjarroique xchi'uc li xcachuique. Ja' xa no'ox te com xchi'in li oxib ciento (300) viniquetic t'ujbilique; te spasoj scarpanaic ta cajal yo' bu oyic ec li madianetic ta stenlejaltique.

⁹ Ta yac'ubalil jech i'albat yu'un Muc'ul Dios li Gedeone: “Lican me; yalan batel yo' bu oy li madianetique yu'un cac'ojbot xa ta ac'ob.

¹⁰ Me chaxi' chava'ay ti chayal batele, ic'o batel achi'in li amozo Furae,

¹¹ bat a'yo ava'ay c'usi chalic. C'alal me laj ava'ye, te ta stsatsub o avo'nton”, x'utat. Jech li Gedeone iyalic batel xchi'uc smozo Fura te yo' bu oyic li yajcontraique.

¹² Li madianetic, li amalequetic, xchi'uc li cristianoetic talemic ta stuq'uil sloq'ueb c'ac'ale te lamalic scotolic ta stenlejal, pero bats'i epic ta jyalel jech chac c'u cha'al c'ulub. Xchi'uc bats'i ep li scamelloique jech chac c'u cha'al epal yi'tic ta ti'nab.

¹³ Li Gedeone inopaj batel ta scarpanaic; te laj ya'ay ti oy boch'o ta xalbe ya'ay jun xchi'il c'usi la xvaychine. Jech chalic: —Ta jvayech laj quil jun pan pasbil ta cebada; ibalch'uj yalel tal li' ta jcarpanatic. C'alal la sta jun carpanae, toj butq'uijel no'ox ic'ot yu'un —xut sbaic.

¹⁴ Itac'ov li yane: —Le'e ja' senyail yespada li Gedeone, ja' li xnich'on israel vinic Joase. Li Diose yac'ojutic xa ta sc'ob Gedeón xchi'uc scotol li jcarpanatique —xi.

¹⁵ C'alal laj ya'ay Gedeón ti c'u x'elan ta xalbe sba xvayechique, xchi'uc ti c'u x'elan ta sloq'uesbeic smelole, la stojbe ta vocol li Muc'ul Diose. Isut tal ta scarpanaic, jech vul yalbe li xchi'iltaque: —Licanic, yu'un li Muc'ul Diose yac'ojbutic xa ta jc'obtic scotol li madianetique —xut.

¹⁶ Li Gedeone ta ora lic svoc' ta oxvoc' li oxib ciento (300) svinictaque; laj yac'anbe xcachuic xchi'uc sjarroic, yu'un ja' te tstiq'uic batel tsanbil tojetic ta yut.

¹⁷ Jech laj yalbe: —C'alal me lic'ot ta jot sti' scarpanaic li cajcontratique, q'uelic lec avilic ti c'u x'elan ta jpase; ja' jech xapasic ec.

¹⁸ C'alal me la jupan jcachucutic ava'yic xchi'uc li boch'otic jchi'inoje, jupano acachuic ec ta sjoylijil ti c'u smuc'ul scarpanaique. Avanan acotolic, jech xavalic: “¡Ja' ta sventa li Muc'ul Diose xchi'uc li Gedeone!”, chianic —xut.

¹⁹ Li Gedeón xchi'uc vo'vinic (100) xchi'iltaque ic'otic ta jot sti' scarpanaic li yajcontraique. Ja' to no'ox la sjel sbaic li boch'otic ta xchabivanic ta sventa o'lol ac'ubale. Jech lic sjupan li xcachuique, xchi'uc la svoq'uic li sjarroic te stsacojic batel ta jun sc'obique.

²⁰ Jech co'ol la spasic yoxvoc'alic, xchi'uc la svoq'uic li sjarroique. Li stojic stsanojic batele ja' ta sts'etc'ob stsacojic. Yan li xcachuique ja' ta sbats'ic'ob stsacojic batel. Tsots i'avanic: ‘¡Pleito ta sventa Muc'ul Dios xchi'uc ta sventa Gedeón!’, xiic.

²¹ Li israeletique te va'ajtic icomic o ta sjoylijil carpanaetic ti bu ono'ox va'ajtique. Jech li madianetique ijatovic batel; x'avlajetic batel ta anil ta xi'el.

²² Li oxib ciento (300) israeletique te tsjupanic o li xcachuique, jech li Muc'ul Diose laj yac' ti ac'o yac'be sba espada stuquic li madianetic te ta scarpanaique. Li madianetique ijatovic batel c'alal to ta Bet-sita ta stuq'uil Zerera xchi'uc c'alal to ta sts'aquil yosilal Abel-mehola ta lum Tabat.

²³ Jech la stsob sbaic scotol li boch'otic liquemic ta Neftalí, ta Aser xchi'uc ta Manasese yu'un ac'o bat snutsic li madianetique.

²⁴ Li Gedeone la stac batel j'almantaletic ta vitsetic ta yosilal Efraín, yu'un ac'o bat yalbeic li jchop liquemic ta Efraín ti ac'o yalicuc batel ta ora, ac'o bat smaquic ta be li madianetique. Xchi'uc laj yalbe ti ac'o smaquic li xtuch'ubil uc'um Bet-bara xchi'uc li uc'um Jordane yu'un yo'to mu'yuc chjelovic. Jech li boch'otic liquemic ta Efraine la xch'unic li mantal i'albatique.

²⁵ La stsaquic li chib banquilaletic yu'un madianetique; ja' Oreb xchi'uc Zeeb sbiic. Li Orebe la smilic te ta ch'entic, Oreb laj yac'beic comel sbi ti bu la smilique. Yan li Zeebe te la smilic ta Zeeb. C'alal ilaj yo'ntonic ta snutsel li madianetique, laj yich'beic tal ta stojol Gedeón te ta jot uc'um Jordán li sjol Oreb xchi'uc Zeebe.