Jueces 6 - Bible in Tzotzil de Chenalhó with Deuterocanon

I'ic'at yu'un Dios li Gedeone

¹ Pero li israeletique lic spasic yan velta c'usitic chopol ta stojol li Muc'ul Diose. Jech li Muc'ul Diose laj yac' ochicuc ta sc'ob madianetic vucub jabil.

² Li madianetique tsots lic yac'beic svocol li israeletique. Jech li israeletique lic xi'icuc yu'un li madianetique, lic snac' sbaic ta vitsetic, ta nailch'enetic ti bu vocolic ta sa'ele.

³ Li israeletique oy ono'ox c'usitic sts'unojic, pero li madianetic, li amalequetic, xchi'uc li cristianoetic te nacajtic ta stuq'uil sloq'ueb c'ac'ale tal slajesic scotol.

⁴ Te la spas scarpanaic ta yosil li israeletique. La slajesic scotol li c'usitic sts'unojic c'alal to ta yosilal Gazae. Solel mu'yuc c'usi la scomtsanic sventa tsve'ic li israeletique, xchi'uc mu'yuc c'usi tsve' xchijic, xvacaxic, xchi'uc sburoic.

⁵ Yu'un italic xchi'uc scotol xvacaxic, xchijic, xchi'uc scarpanaic. Bats'i ep italic jech chac c'u cha'al c'ulub; mu staq'uic atel xchi'uc li scamelloique. Jech ilaj yu'unic scotol.

⁶ Li israeletique lic pasicuc ta me'on ta scoj li madianetique. Ts'acal to lic sc'anbeic vocol li Muc'ul Diose.

⁷ C'alal la sc'anbeic vocol Muc'ul Dios israeletic ta scoj li madianetique,

⁸ li Muc'ul Diose la stacbe tal jun j'alc'op, jech laj yal: “Jech chal li Muc'ul Diose, ja' li Dios yu'un Israele: ‘Vu'un la jloq'uesoxuc tal ta Egipto banamil yo' bu tiq'uiloxuc to'ox ta mozoile.

⁹ Ma'uc no'ox la jloq'uesoxuc tal ta sc'ob li egiptoetique; la jloq'uesoxuc tal ta sc'obic noxtoc scotol li boch'otic laj yuts'intaoxuque. Vu'un la jnuts loq'uel ta atojolic; vo'oxuc laj cac'boxuc li yosilalique.

¹⁰ Laj calboxuc ti vu'un Muc'ul Diosun avu'unique, xchi'uc ti mu me xavich'ic ta muc' li diosetic yu'un amorretic, vo'oxuc ti te nacaloxuc ta yosilalique, pero muc xach'unbicun’, xayutoxuc li Diose”, xi li j'alc'ope.

¹¹ Li j'almantal yu'un Muc'ul Diose te ital chotluc ta yolon jpets tulan te ta Ofra ta yosil Joás, ja' li jchop sbiic abiezeretique. Li Gedeón, xnich'on Joase, ja'o te ta xic'a strigo ta nac'alaltic ta yav spits'ubil ya'lel ts'usub, yu'un jech mu x'ilat yu'un li madianetique.

¹² Te laj yac' sba ta ilel ta stojol li j'almantal yu'un Muc'ul Diose, jech laj yalbe: —Li' xchi'inojot li Muc'ul Diose, vo'ot ti lec xu' avu'une, ti oy lec stsatsal avo'ntone —xut.

¹³ Itac'ov li Gedeone: —Ay cajval, ti li'uc xchi'inojun li Muc'ul Dios chavale, ¿c'u yu'un toj ep chquich'cutic vocol ti jechuque? ¿Bu oy svu'el stsatsal li Diose? Li jmoltot jyame'cutic ta vo'onee jech ono'ox laj yalbuncutic: ‘Mu me xch'ay ta avo'ntonic ti ja' Muc'ul Dios la sloq'uesutic tal ta Egipto banamile’, xiyutuncutic. Pero tana li'i laj xa scomtsanuncutic li Muc'ul Diose; laj xa yac'uncutic ta sc'ob li madianetique —xut.

¹⁴ Li Muc'ul Diose la sq'uelbe lec sat li Gedeone, jech laj yalbe: —Bat tuneso li atsatsal cac'ojbote. Bat coltao loq'uel ta sc'ob madianetic li achi'iltac ta israelale. Vu'un jtuc chajtacot batel —xut.

¹⁵ Itac'ov li Gedeone: —Ay Cajval, ¿c'u x'elan xu' ti vu'un ta jcolta li jchi'iltaque? Q'uelavil, li jchop jbicutic ti liquemuncutic ta Manasese, vu'uncutic toj me'onuncutic, xchi'uc vu'un its'inalun te ta jnacutic noxtoc —xut.

¹⁶ Itac'ov li Muc'ul Diose: —Xu' avu'un, yu'un vu'un chajchi'inot batel. C'alal chc'ot amil li madianetique, ja' no'ox jech chac c'u cha'al jun vinic chava'ay —xut.

¹⁷ Itac'ov li Gedeone: —Ta jc'anbot vocol ta atojol. Me ta melel ti c'uxun ta avo'ntone, ac'bun quil senyail me vo'ot ti chac'opanune.

¹⁸ Mu to me xabat. Chbat quich'bot tal amoton; chvul cac'bot ta atojol —xut. Itac'ov li Diose: —Lec oy, li' chajmalaote —xut.

¹⁹ Ibat li Gedeone, bat smeltsan tal jcot tentsun xchi'uc pan mu'yuc yich'oj svolesubil xch'ut; ja' jtob (20) kilo arina yich'oj. Laj yich' tal ta jun unin moch li sbec'tale; yan li ya'lele ta jun bin laj yich' tal. Te vul yac' scotol ta yolon li te'e.

²⁰ Li yaj'almantal Diose jech laj yalbe li Gedeone: ‘Ich'o batel li ti'bol xchi'uc li pan ti mu'yuc yich'oj svolesubil xch'ute, bat busano ta ba ton le'e; te xamalbe noxtoc li ya'lele’, xut. Li Gedeone la spas jech.

²¹ Li yaj'almantal Muc'ul Diose te yich'oj jch'ix snamte'. Jech la stijan sni' snamte' ta sba li ti'bol xchi'uc pane, jech te iloc' tal c'oc' ta ton; la xchic' li ti'bol xchi'uc pane. Li j'almantal yu'un Muc'ul Diose ta ora no'ox te isacch'ay batel.

²² C'alal la sna' Gedeón ti ja' j'almantal yu'un Muc'ul Dios la sc'opan sba xchi'uque, jech laj yal: —Ay, Cajval Muc'ul Dios, laj xa quilbe jba jsatcutic xchi'uc li j'almantal avu'une —xi.

²³ Li Muc'ul Diose jech laj yal: —Mu me xaxi', junuc avo'nton; mu xacham o —xut.

²⁴ Ja' yu'un li Gedeone lic spas jun scajleb smoton Muc'ul Dios. “Li Muc'ul Diose ja' chac' jun o'ntonal”, xi sbi laj yac'be. Li scajleb smoton Muc'ul Diose te to oy o tana ti bu Ofra sbi li banamil te ta lum yu'unic li jchop abiezeretique.

²⁵ Te no'ox ta yac'ubalil li Muc'ul Diose jech laj yalbe li Gedeone: —Tsacbo jcotuc xvacax atot, ja' li xchibal ti vucub jabil yich'oje. Bat jinesbo li scajleb smoton Baal smeltsanoj atote. Ts'eto noxtoc li te' te spajoj ti spasojbe ta sloc'obal Aserae.

²⁶ Te xapasbun scajleb jmoton ta sjol li ch'ene, vu'un li Muc'ul Diosun avu'une. Milbun jmotonin li xchibal vacaxe; te xachic'bun. Ja' xavac'be si'ilin li te' chats'et te spajoj atote —xut.

²⁷ Jech li Gedeone laj yic' batel lajuneb smozo, bat spas jech chac c'u cha'al i'albat yu'un li Muc'ul Diose. Ja' no'ox ti muc ta c'ac'alticuc la spase; ta ac'ubaltic bat spas yu'un ta xi' yu'un li xchi'iltac ta voq'uele xchi'uc li cristianoetic te ta lume.

²⁸ Ta yoc'omal c'alal iliquic scotol li cristianoetic te ta lume, ja' to laj yilic ti jinesbil xa li scajleb smoton Baale, xchi'uc ti ts'etbil xa li te' te pajajtic ta nopol ti pasbil o ta sloc'obal Aserae. Xchi'uc laj yilic noxtoc ti oy xa yan scajleb matanal te pasbile, xchi'uc ti te xa chic'bil li xchibal vacaxe.

²⁹ Jech laj yalbe sbaic: “¿Boch'o la spas jech le'e?”, xut sbaic. C'alal ep xa la sjaq'uilanic, la st'unilanbeic yajvale. Ts'acal laj ya'yic ti ja' la spas li Gedeón, xnich'on Joase. Jech bat sc'opanic li Joase, jech laj yalbeic:

³⁰ —Ic'o loq'uel tal li anich'one; ac'o chamuc. Yu'un la sjinesbe scajleb smoton li Baale, xchi'uc la sts'et noxtoc li sloc'obal Asera te pajajtique —xutic.

³¹ Itac'ov li Joase: —¿Me yu'un vo'oxuc chapojic li Baal ti vo'oxuc chac'opojic yu'une? Li boch'o tspoj li Baale ac'o chamuc c'alal muc to tsacub li osile. Me melel ja' Dios li Baale, ¿c'u yu'un muc spas stuc xchi'uc li boch'o ay jinesbatuc scajleb smotone? —xi.

³² Li Gedeone ja'o yorail te lic jeluc sbi, Jerobaal sbi ic'ot. Jech laj yalic: “Li Baale ac'o spas stuquic xchi'uc li Gedeone”, xiic. Yu'un li Gedeone ja' la sjinesbe li scajleb smotone.

³³ Li madianetic, li amalequetic, xchi'uc li cristianoetic ta stuq'uil sloq'ueb c'ac'ale la stsob sbaic tal scotolic. Ijelovic tal ta jot uc'um Jordán; te vul spas scarpanaic ta stenlejaltic Jezreel.

³⁴ Pero li espíritu yu'un Muc'ul Diose la sventainbe yo'nton li Gedeone, jech la sjupan xcachu yu'un ac'o stsob sbaic tal li jchop sbiic abiezeretique.

³⁵ Jech noxtoc la stac ta iq'uel scotol li jchop liquemic ta Manasese, jech la stsob sbaic tal scotolic. Jech noxtoc la stac ta iq'uel li boch'otic liquemic ta Aser, ta Zabulón, xchi'uc ta Neftalie, jech scotolic la stsob sbaic tal ta stojol li Gedeone.

³⁶ Li Gedeone jech laj yalbe li Diose: “Me ta melel ti vu'un chatunesun sventa ta jcolta loq'uel li jchi'iltac ta israelal jech chac c'u cha'al laj avalbune,

³⁷ li' ta jq'ui snuculil jchij ta yav smajubil trigo. Me ja' no'ox ach'em tsacub ta job osil oc'om li jnucule, me ja' taquin li banamil ta spat xocone, jech ta jna' o ti vu'un chitun avu'un sventa ta jcolta loq'uel li jchi'iltac jech chac c'u cha'al laj avalbune”, xut.

³⁸ Li c'usi la sc'ane, jech ic'ot ta pasel. Ta yoc'omal c'alal ilic li Gedeone, la spits' li snucule; jun taza inoj ta sjob osil.

³⁹ Pero li Gedeone jech to laj yalbe li Diose: “Mu me xa'ilin ta jtojol yu'un ta to jc'opanot junuc velta, yu'un ta to jc'an yan junuc senyail. Ja' ta jc'an ti ja' xa no'ox ac'o ach'uc ta job osil li banamile; yan li jnucule taquin ac'o comuc”, xut.

⁴⁰ Li Diose la spas jech noxtoc. C'alal isacub ta yoc'omale, li nucule taquin; yan li banamil ta spat xocone ach'em ta job osil.