Jueces 5 - Bible in Tzotzil de Chenalhó with Deuterocanon

Iq'uejin Débora xchi'uc Barac

¹ C'alal ja'o jech orae, ja'o te iq'uejin li Débora xchi'uc Baraque, ja' li xnich'on Abinoame. Jech chal li sq'ueojique:

² “Ta sventa ti oy boch'o lec chapal sventa pleito yu'unic li israeletique, xchi'uc ta sventa ti oy boch'o xu' yu'un tsva'an sba ta pleitoe, jech ac'o ich'atuc ta muc' li Muc'ul Diose.

³ Ajvaliletic, a'ibicun jc'op; banquilaletic, a'yic c'usi chcal. Li' ta jq'uejinta li Muc'ul Diose. Li' chiq'uejin yu'un li Muc'ul Dios, ja' li Dios yu'un Israele.

⁴ “Muc'ul Dios, c'alal laloc' tal ta Seire, c'alal labat ta yosilal edometique, inic li banamile; iyal tal vo' ta vinajel. Iyalan tal ya'lel li toquetique.

⁵ Vo'ot Muc'ul Dios, Dios yu'un Israel, vo'ot ta aventa inic li vitsetique; vo'ot ta aventa inic li vits Sinaie.

⁶ C'alal yorail cuxul li Samgar, xnich'on Anate, xchi'uc c'alal yorail cuxul li Jaele, li jxanubaletique la scomtsanic ta anil li bee; ja' la stamic batel li chucul bee.

⁷ Li tsobtsobnaetic yu'un Israele, mu'yuc yajval icom. Ja'o lilic ec li vu'une; vu'un li Deboraune; vu'un me'il yu'un Israel lic'ot.

⁸ “C'alal la sa'ic yan diosetic yu'unique, te tsacbilic o ta pleito. Me junuc smaquic, me junuc lanza, muc xvinaj te ta stojol li cha'vinic ta mil (40,000) israeletique.

⁹ “Te oy co'nton ta atojolic, vo'oxuc li banquilaloxuc yu'un Israele, xchi'uc ta stojol li jchi'iltic ti ta yutsil yo'nton icoltavan ta pleitoe. Ich'ic ta muc' acotolic li Muc'ul Diose.

¹⁰ “C'opojanic vo'oxuc jc'ulejetic ti cajaloxuc ta saquil buroe, xchi'uc vo'oxuc ti chachapanvanique, xchi'uc vo'oxuc ti abul abaic jxanubaloxuc no'oxe.

¹¹ Alic te ta o'lol uch'um vo'altic, tijic li taq'uinetique. Alic ti ja' jtsalvanej li Muc'ul Diose, alic ti ja' ivu' yu'unic li jnaclumetic ta Israele.

¹² “Débora, julovan, lican; lican, q'uejintao junuc q'ueoj. Vo'ot Barac, xnich'on Abinoam, lican; ic'o batel li jchuqueletic avu'une.

¹³ “Jech iliquic batel li israeletic te to comenique; bat scontrainic li boch'otic toj ech'em stsatsalique. Liyalcutic batel jchi'uc li soldadoetic yu'un Diose, bat jcontraincutic li jpaspleitoetique.

¹⁴ Oy jun chib soldadoetic liquemic ta Efraín iyalic batel ta yosilal Amalec; ja' te nabal batel ta spatic li svinictac Benjamine. Ja' iyal batel banquilaletic yu'un li Maquire; ja' iyal batel jpasmantaletic yu'un li Zabulone.

¹⁵ Li banquilaletic yu'un Isacare ja' la xchi'inic batel li Deborae. Li Isacare ja' scoltaubbailtac li Baraque; ja' la xchi'inic batel ta stenlejaltic. “Me oy viniquetic liquemic ta Rubén ti lec tsots yo'ntonique,

¹⁶ ¿c'u yu'un te icomic ta yavilic, c'u yu'un te no'ox yabinojic tspiubta xchijic li jchabichijetique? Li boch'otic liquemic ta Rubene oy ep viniquetic ti mu sc'an stic' sbaique.

¹⁷ “Li Galaade te icomic ta jot uc'um Jordán. Li Dane te icomic xchi'uc li barcoetique. Li Asere te icomic ta ti'nab; muc xa stotsic o yo' bu scotleb li barcoetique.

¹⁸ Li Zabulón xchi'uc Neftalie, sq'uelanoj sbec'talic ta milel te ta toyol vitsetic.

¹⁹ “Jech italic li ajvaliletique, tal spasic pleito ta Taanac ta nopol vo'etic ta Meguido. Li ajvaliletic ta Canaane lec chapalic tal ta sventa pleito, pero me jutuc muc staic batel sc'ulejalic.

²⁰ C'alal ta vinajel la spasic tal pleito li c'analetique; li c'analetique te to ta yavilic la scontrainic tal li Sisarae.

²¹ Imesatic batel scotolic yu'un li bevo' Cisone, ja' li poco' bevo' Cisone. ¡Vu'un la jmich'be ta sbe yiq'uic li boch'otic toj tsotsique!

²² “Xc'ojlajet no'ox tal svoy li ca'etique; xc'uletic no'ox ta anil li muc'tic ca'etique.

²³ Li yaj'almantal Muc'ul Diose jech laj yal: ‘Ac'o taluc tsots vocol ta stojol li Meroze xchi'uc li jnaclumetic tee.’ Yu'un muc xtalic ta scoltael li Muc'ul Diose; muc xtal scoltaic ta scontrainel li tsatsal cristianoetique.

²⁴ “Ac'o lecuc sc'oplal ta scotol antsetic li Jaele, ja' li yajnil Heber Ceneo vinique. Ac'o lecuc sc'oplal yu'un li antsetic te ta carpanaetique.

²⁵ Li Sisarae vo' no'ox la sc'an, pero li Jaele lequil ya'lel xchu' vacax laj yac'. Ta jun lequil muc'ta taza laj yac'be li ya'lel xchu' vacax ti lec xa spatoj sbae.

²⁶ Ja'o la stsac ta sts'etc'ob jch'ix te'. Ja' ta sbats'ic'ob la stsac smarzu; ja' la spajbe ochel ta sjol li Sisarae. La svombe ochel li sjole.

²⁷ Smutsoj yacan iyal ta lum; la xot sba yu'un xc'uxul. Ti bu iyal ta lume te mochol icham o.

²⁸ “Li sme' Sisarae ep laj yat yo'nton. Inach'i loq'uel ta ventana, jech laj yal: ‘¿C'u yu'un ti ijalij xa xchi'uc li caretaetic yu'une? ¿C'u yu'un ti ipaj yacan li scareta sventa pleitoe?’, xi.

²⁹ Itac'bat yu'un jayibuc stsebetic ti lec bijique. Jech laj yalic:

³⁰ ‘Yu'un ta svoq'uilanbe sbaic c'usitic la staic ti c'alal itsalvanic ta pleitoe. Jun, o me chib tseb chiq'uic jujunic. Li c'u'iletic ti c'upil sba sbone ja' yu'un li Sisarae. Ja' li c'u'il ti ep ta chop scape; ja' sventa tsts'ot o snuc' li boch'o itsalvane’, xi.

³¹ “Ja' jech chavules scotol avajcontra, vo'ot li Muc'ul Diosote. Pero li boch'o chasc'anote ac'o yac' xojobal jech chac c'u cha'al lec xojoban li c'ac'ale”, xi li sq'ueojique. C'alal i'ech' scotol le'e, cha'vinic (40) jabil ipaj pleito te ta yosilalic.