Jueces 4 - Bible in Tzotzil de Chenalhó with Deuterocanon

Li Débora xchi'uc Baraque lec ivu' yu'unic pleito

¹ C'alal chamen xa'ox li Aode, li israeletique lic spasic yan velta c'usitic chopol ta stojol li Muc'ul Diose.

² Ja' yu'un li Muc'ul Diose lic yac' ochicuc ta sc'ob ajvalil Jabín, ja' li canaán vinic ochem ta ajvalilal ta lum Hazore. Li banquilal soldado yu'une Sísara sbi; te nacal ta Haroset-goim.

³ Li ajvalil Jabine oy baluneb ciento (900) ta cot scareta pasbil ta tsatsal taq'uin. Li israeletique jtob (20) xa'ox jabil i'ochic ta sc'ob li ajvalile; tsots uts'intael laj yich'ic. Ts'acal to lic sc'anbeic vocol li Muc'ul Diose yu'un ac'o coltaaticuc.

⁴ Ja'o ochem ta pasmantal yu'un israeletic jun ants Débora sbi; ja' j'alc'op yu'un Dios. Ja' yajnil jun vinic Lapidot sbi.

⁵ Li Deborae nopen xa'ay te chbat chotluc ta yolon jtec' xan (li xane, ja' “xan yu'un Débora”, xi sbi) ta vitsetic yu'un Efraín; ja' cacal ta o'lol yu'unic li Ramá xchi'uc Betele. Li israeletique te chbatic ta stojol ti c'alal tsc'anic chapanele.

⁶ Li Deborae oy jun velta la stac ta iq'uel jun vinic Barac, xnich'on Abinoam, te nacal ta lum Cedes ta yosilal Neftalí. Jech laj yalbe: —Li Muc'ul Dios, ja' li Dios yu'un Israele, jech chayalbot: ‘Batan te ta vits Tabor; tsobo batel lajunmiluc viniquetic liquemic ta Neftalí xchi'uc ta Zabulón.

⁷ Vu'un ta xquic' tal te ta bevo' Cisón li Sisarae, ja' li banquilal soldado yu'un Jabine. Te ta xtal xchi'uc scareta xchi'uc yajsoldadotac. Pero vu'un ta xcac'bot ta ac'ob’, xayutot li Diose —xut.

⁸ Itac'ov li Baraque: —Me chabat li vo'ote, chibat ec. Yan me mu'yuc chabate, mu'yuc chibat ec —xi.

⁹ Itac'ov li Deborae: —Lec oy, ta xbat jchi'inot. Ja' no'ox muc me vo'ocot ich'bil ta muc' chac'ot, yu'un li Muc'ul Diose ja' chac'be ta sc'ob jun ants li Sisarae —xut. Jech li Deborae ibatic ta Cedes xchi'uc li Baraque.

¹⁰ Li Baraque la stsob batel ta Cedes li lajunmil (10,000) liquemic ta Neftalí xchi'uc ta Zabulone; ja' la sventain li Baraque. Te xchi'uquic batel li Deborae.

¹¹ Li Heber, ja' li queneo vinique, ja' li yalab xnich'nab smuni' Moisese, te la spas scarpanaic ta stenlejaltic Zaanaim ti c'alal la svoc' sbaic xchi'uc li yantic quenetique. Li Zaanaime te oy ta nopol Cedes.

¹² Li Sisarae laj ya'ay ti te xa chmuyic batel ta vits Tabor li Baraque.

¹³ Jech lic stsob ta ora li baluneb ciento (900) ta cot scareta pasbil ta tsatsal taq'uine xchi'uc scotol li yajsoldadotaque. Te iliquic tal ta Haroset-goim c'alal to ta bevo' Cisón.

¹⁴ Li Deborae jech laj yalbe li Baraque: —Tsotsan me, yu'un ja' xa sc'ac'alil chayac'bot ta ac'ob Muc'ul Dios li Sisarae. Li Muc'ul Diose ja' ba'yucbe ta xbat yu'unic li avajsoldadotaque —xut. Li Baraque iyalic batel ta vits Tabor xchi'uc li lajunmil (10,000) yajsoldadotaque.

¹⁵ Li Muc'ul Diose la stic'be xi'el ta stojolic c'alal ta yajsoldadotac, xchi'uc c'alal ta caretaetic yu'un li Sisarae. C'alal ic'ot li Baraque, iyal ta anil ta scareta li Sisarae; ijatov batel ta yacan.

¹⁶ Pero li Baraque la snuts batel c'alal to ta Haroset-goim li soldadoetic xchi'uc scaretaique. La smilbe comel scotol li yajsoldadotac Sisarae; me junuc mu'yuc cuxul icom.

¹⁷ Pero li Jabine co'ol ono'ox yo'nton xchi'uc li xnich'nabtac Heber, ja' li queneo vinique. C'alal ijatov batel ta anil li Sisarae, te ic'ot ta sna Jael, ja' li yajnil Hebere.

¹⁸ Li antse iloc' snup ta be, jech laj yalbe: —Li' xatale Cajval, li' xatale; mu xaxi' —xut. Li Sisarae i'och ta anil. Li Jaele la snac' lec; la smac ta jlic poc'.

¹⁹ Li Sisarae jech laj yal: “Ac'bun jutebuc ava'al cuch' yu'un toj taquin co'nton”, xut. Li antse lic sjam li yav ya'al pasbil ta nucule, nojem ta ya'lel xchu' vacax; laj yac'be yuch'. Ts'acal lic smac lec.

²⁰ Li Sisarae jech laj yal: —Te oyan ta ti'na. Me oy boch'o itale, me la sjac'bot me oy boch'o li' oy ta yut anae, albo ti mu'yuque —xut.

²¹ Li Sisarae solel luben ta xanubal, jech i'och svayel, pero toj pim ibat li svayele. Ja' yu'un li Jaele lic stsac jun smarzu xchi'uc jch'ix te' lec ts'ubts'ub sni' sventa snituoj o scarpana. Nacasta i'och batel yo' bu oy li Sisarae. La spajbe ochel ta sjol; toj jelovel c'alal ta banamil, jech icham o.

²² C'alal ic'ot ta st'unel li Baraque, li Jaele iloc' snup ta be ta ora jech laj yalbe: —La' me, chacac'bot avil li boch'o chat'une —xut. I'och batel ta yut carpana li Baraque; ja' to laj yil te mochol ta lum li Sisarae, chamen xa, te pajal ta sjol li te'e.

²³ Li Muc'ul Diose ja'o yorail te la sbic'tajesbe sc'oplal ta stojol israeletic li Jabine, ja' li ajvalil yu'un canaanetique.

²⁴ Ja' yu'un li israeletique itsatsub lec yo'ntonic ta scontrainel li ajvalil Jabine, jech ivu' yu'un laj yulesic o.