Jueces 3 - Bible in Tzotzil de Chenalhó with Deuterocanon

Sc'oplal lumetic icomic ta Canaán banamil

¹ Li'i ja' li lumetic te laj yac' comuc Muc'ul Dios sventa tspasbe o preva li israeletique. Ja' li israeletic ti mu'yuc to'ox voq'uemic c'alal laj yich' pojel ta pleito li Canaán banamile.

² Li Muc'ul Diose te la scomtsan, yu'un chac'be yotquinic, chac'be xchanic pleito li israeletic ti mu'yuc yilojic paspleitoe.

³ Ja' te icomic li vo'ob banquilaletic yu'un filistaetique, xchi'uc scotol li canaanetique, li sidonetique, xchi'uc li hevetic ti te nacajtic ta vitsetic ta Líbano xlic ta vits Baal-hermón xc'ot c'alal to ta Hamate.

⁴ Li cristianoetic le'e ja' itun yu'un Muc'ul Dios sventa tsq'uelbe o yo'nton israeletic me chch'unic li mantaletic yu'une. Ja' li smantaltac laj yac'be smoltotaquic ta vo'one ta sventa li Moisese.

⁵ Ja' yu'un li israeletique te inaqui xchi'uquic li canaanetique, li hetetique, li amorretique, li ferezetique, li hevetique, xchi'uc li jebusetique.

⁶ Te laj yic'be sba squerem stsebic ta jujujot, xchi'uc te lic yich'beic ta muc' li diosetic yu'unique.

Li Otoniele la scolta loq'uel ta sc'ob ajvalil Cusan-risataim li xchi'iltac ta israelale

⁷ Li israeletique chopol c'usi lic spasic ta stojol li Muc'ul Diose; ja' lic tunicuc yu'un li sloc'obaltac dios Baale xchi'uc li sloc'obaltac dios Aserae. Ja' la scomtsanic o li Muc'ul Diose.

⁸ Jech li Muc'ul Diose tsots lic ilinuc ta stojol li israeletique. Jech laj yac' ochicuc ta sc'ob li Cusan-risataime, ja' li ajvalil ta Mesopotamiae. Jech li israeletique vaxquib jabil lic tunicuc yu'un li ajvalile.

⁹ Li israeletique lic sc'anbeic vocol li Muc'ul Diose. Li Muc'ul Diose lic st'uj jun vinic te ta stojolic yu'un ac'o coltaaticuc loq'uel ta sc'ob li ajvalile. Li boch'o la st'uje ja' Otoniel, xnich'on Cenaz. Li Cenaze ja' xc'ox its'in li Calebe.

¹⁰ Li Muc'ul Dios ti mu'yuc sbec'tale ital ta stojol li Otoniele, jech ivu' yu'un la spoj li xchi'iltaque. Li Otoniele iloc' batel ta pleito, li Muc'ul Diose laj yac' ti ac'o tsalatuc li Cusan-risataime.

¹¹ Jech ipaj pleito cha'vinic (40) jabil te ta yosilalic; jun yo'nton icomic. Ts'acal icham li Otoniel xnich'on Cenaze.

La scolta xchi'iltac ta israelal te ta Moab li Aode

¹² Li israeletique lic spasic yan velta c'usitic chopol ta stojol li Muc'ul Diose. Ja' yu'un li Muc'ul Diose laj yac'be stsatsalic li Eglón, ja' li ajvalil ta Moabe, yu'un ac'o scontrain li israeletic ta scoj ti chopol c'usi la spasique.

¹³ Li Eglone la spas ta co'ol yo'nton xchi'uc li amonetique, li amalequetique, jech co'ol tal scontrainic li israeletique, xchi'uc laj yich'ic o comel li lum ti xantic sbie.

¹⁴ Jech li israeletique vaxaclajuneb (18) jabil itunic yu'un li Eglone, ja' li ajvalil yu'un moabetique.

¹⁵ Ts'acal to lic sc'anbeic vocol li Muc'ul Diose. Ja' yu'un li Muc'ul Diose lic st'ujbe jun boch'o chcoltaatic loq'uel ta sc'ob li ajvalile. Li boch'o la st'uje ja' Aod, xnich'on Gera, liquem ta jchop yu'un Benjamín. Ja' jun vinic ta sts'et sna' x'abtej. Li israeletique oy jun velta la stacbeic batel spatanic li Eglone; ja' la stacbeic batel li Aode.

¹⁶ Li Aode oy spasoj jun espada lec cha'jot ye, jutuc mu sta o'lol metro snatil; la xch'ic batel ta xch'ut ta yut sc'u' ta stuq'uil sbats'ic'ob.

¹⁷ Jech ibat yac'be Eglón li patan yich'oj batele. Li Eglone lec muc', yu'un toj juben.

¹⁸ C'alal laj yac'be comel li spatanique, li Aode iloq'uic tal xchi'uc li xchi'iltaque.

¹⁹ C'alal ic'otic yo' bu oy sloc'obaltac sdiosic te ta nopol Gilgale, li Aode isut batel ta stojol li Eglone, jech c'ot yalbe: —Ajvalil, oy c'usi ta jc'an chacalbot, pero atuc no'ox ta jc'an chacalbot —xut. Li ajvalile lic yalbe li boch'otic te ch-abtejic yu'un ti ac'o ch'anxiicuque xchi'uc ti ac'o loq'uicuc batel jliqueluque.

²⁰ Li Aode stuquic xa te oyic xchi'uc Eglón ta jun scuarto ti siquet no'ox ta yorail q'uepelaltique. Jech inopaj batel ta stojol, jech laj yalbe: —Li a'yej quich'ojbot tale, ajvalil, ja' liquem tal ta stojol Dios —xut. C'alal laj ya'ay li Eglone, iva'i ta ora.

²¹ Pero li Aode lic sloq'ues ta ora ta sts'etc'ob li espada ch'iquil batel ta xch'ut ta stuq'uil sbats'ic'obe; la spajbe ochel ta xch'ut li Eglone.

²² Toj yipal la spajbe batel. Ma'uc no'ox i'och ti c'u snatile; i'och c'alal ta yoc. Ti c'u snatil li espadae, muc xvinaj bu mucul ic'ot ta scoj ti toj jubene. Jech te mats'al la scomtsan o li Aode.

²³ Li Aode la sbaj lec comel li ti'nae; li stuque iloc' batel ta ventana.

²⁴ C'alal loq'uem xa'ox batel li Aode, italic li smozotaque; lec bajal vul staic li sti' cuartoe. La snopic ti sbajoj lec li cuarto yu'un batem ta ch'aybaile.

²⁵ C'alal jal xa la smalaique, lic lo'ilajuc yo'ntonic ta sventa ti mu'yuc bu tsjam o li sti' scuartoe. Jech laj yich'ic tal li llavie; la sjamic li cuartoe. Ja' to laj yilic te mochol ta lum li yajvalique, chamen xa.

²⁶ C'alal te to ijalijique, li Aode ijatov tal ta ora. Te ijelov tal yo' bu oy sloc'obal sdiosique; te bat snac' sba ta Seirat.

²⁷ C'alal te xa'ox ochem ta Seirat li Aode, lic sjupan xcachu te ta vits yu'un Efraín. Jech scotol israeletic iyalic batel; ja' ba'yucbe ibat yu'unic li Aode.

²⁸ Li Aode jech laj yalbe li xchi'iltaque: “Ts'aclinicun me, yu'un li Muc'ul Diose laj xa yac'butic ta jc'obtic li cajcontratique, ja' li moabetique”, xut. Jech la sts'aclinic batel; te ic'otic ta ti' uc'um Jordán ta yosilal Moab. Me junuc mu'yuc boch'o laj yac' jelovicuc tal ta jot uc'um.

²⁹ C'alal jech orae, laj van smilic lajunmiluc (10,000) moabetic li israeletique; ja' la smilic li soldadoetic ti lec xu' yu'unique, ti lec tsots yo'ntonique.

³⁰ Ja' jech icolic loq'uel ta sc'ob ajvalil yu'un Moab li israeletique yu'un ivu' yu'unic stsalel. Chanvinic (80) jabil la xcux yo'ntonic ta paspleito; jun yo'ntonic icomic.

Li Samgare la scolta loq'uel ta sc'ob filistaetic li israeletique

³¹ Ts'acal ilic yan jpojvanej yu'unic li israeletique, ja' Samgar sbi; ja' xnich'on Anat. Ja' la smil vaquib ciento (600) filista viniquetic ta stijubil vacax. Ja' jech la scolta ec li xchi'iltac ta israelale.