Jueces 21 - Bible in Tzotzil de Chenalhó with Deuterocanon

C'an xa tubuc o sts'unubal li jchop liquemic ta Benjamine

¹ Li israeletique jech laj yalic ta stojol Dios ti c'alal te oyic ta Mizpae: “Mu'yuc boch'o xu' chac'be yic' stseb cu'untic li jchop liquemic ta Benjamine”, xiic.

² Scotol li israeletique italic ta ch'ulna te ta Betel. Te oyic o ta stojol Dios c'alal to i'och ac'ubal. Te ch-oc' ch-avanic, jech laj yalic:

³ “Muc'ul Dios, vo'ot Diosot yu'un li Israele, ¿c'u yu'un ti jech ic'ot ta pasele yu'un ch-ul xa li jchop jchi'ilcutic ta israelale?”, xiic.

⁴ Ta yoc'omal sob ilic li israeletique; la spasbeic scajleb smoton Muc'ul Dios. Te la xchic'beic, la smilbeic smoton sventa lec ch-ilatic.

⁵ Jech te lic sjac'be sbaic: “¿Boch'o muc x'ay cu'untic ti c'alal la jtsob jbatic ta stojol Muc'ul Dios te ta Mizpae?”, xiic. Yu'un laj caltic ta stojol Muc'ul Dios ti chich' milel li boch'otic mu'yuc te oye.

⁶ Li israeletique ep laj yat yo'ntonic ta sventa li jchop xchi'ilic liquemic ta Benjamine. Jech laj yalic: “Li' ta orae i'ul xa jchop jchi'iltic.

⁷ ¿C'uxi chcutic tsta yajnilic li boch'otic icomic toe? Yu'un laj xa caltic ta stojol Muc'ul Dios ti mu xu' chcac'betic yic' jtsebtic li jchop liquemic ta Benjamine.

⁸ ¿Me oy boch'o jchopucal cu'untic li'i ti muc x'ay ta stojol Muc'ul Dios te ta Mizpae?”, xiic. Te ivul ta sjolic ti ja' mu'yuc boch'o x'ay yu'unic li Jabes te ta Galaade.

⁹ Yu'un c'alal iloc' sbiique, mu'yuc boch'o la stac' yu'unic.

^10-11 Ja' yu'un li israeletique la staquic batel lajcha'mil (12,000) viniquetic ti lec sna'ic pleitoe, jech laj yalbeic: “Batanic ta Jabes-galaad, bat milic scotol li boch'otic te nacajtique. Milic scotol li viniquetic, antsetic, ololetic, xchi'uc tsebetic ti picbilic xa ta vinique”, xutic.

¹² Ta scotol li Jabes-galaade, te la staic chanib ciento (400) tsebetic ti mu'yuc to yilojic vinique, jech laj yiq'uic tal ta scarpanaic te ta Silo ta Canaán banamil.

¹³ Jech scotol israeletic ta ora la staquic ta iq'uel li smomnich'nab Benjamín ti te snac'oj sbaic ta Rimón Ch'ene. Laj yalbeic ti mu'yuc xa tspasic pleitoe.

¹⁴ Jech te la xch'unic tal. Ja' laj yac'beic yiq'uic li tsebetic ti la staic tal ta Jabes-galaade, pero muc xloq'uic o.

¹⁵ Yu'un li israeletique ic'uxubaj ta yo'ntonic li benjaminetique, yu'un li Muc'ul Diose c'an xa stu'p o li jchop israeletique.

¹⁶ Li banquilaletic yu'un israeletique jech laj yalic: “¿C'usi chcutic tsta yajnilic li boch'otic comenic toe? Yu'un icham scotol li tsebetic yu'unic ti liquemic ta Benjamine.

¹⁷ Yu'un li boch'otic cuxajtic to icomique tsc'an ja' ac'o sventainic li yosilic comen ta sventaic li' ta jtojoltic ti jaychoputique, yu'un jech mu x'ul o sts'unubal li jchop jchi'iltique.

¹⁸ Yu'un li vu'utique mu xu' chcac'betic yic' jtsebtic, yu'un calojtic xa ta stojol Muc'ul Dios ti ac'o stoj smul li boch'o chac'be yic' stseb li smomnich'nabtac Benjamine.

¹⁹ Pero q'uelavilic, jujun jabil chich' pasel jun muc'ta q'uin sventa Muc'ul Dios te ta Silo. Ja' li Silo ti te xcom ta stuq'uil norte yu'un Betele, ti te xcom ta sloq'ueb c'ac'al yu'un li be xbat ta Betel c'alal ta Siqueme, xchi'uc ti te xcom ta stuq'uil sur yu'un li Lebonae”, xiic.

²⁰ Ja' yu'un jech laj yalbeic li benjaminetique: “Batanic, te xanac' abaic ta ts'usubaltic.

²¹ Pero ch'anchianic. C'alal chavilic ch-ac'otajic loq'uel tal ta jujutsob tsebetic te ta Siloe, loc'anic batel ta mucul; iq'uic batel jujunuc ta avosilalic sventa avajnilic.

²² C'alal me chtal sc'opanuncutic li stotic, o me xi'melique, xu' jech chcalbecutic: ‘Vu'uncutic ta jc'ancutic vocol ta atojol ti ac'o ach'aybe ta avo'nton li smulique. Yu'un muc sta o yajnilic cu'uncutic ti c'u yepal tsebetic laj quic'cutic tal ta Jabes c'alal la jpascutic pleitoe. Pero ta sventa ti muc vo'ocoxuc xavac' atuquic li tsebetique, jech mu'yuc amulic chcom’, xu' xcutcutic”, xutic.

²³ Li smomnich'nabtac Benjamine la spasic jech. Laj yelc'anic batel li tsebetic te ch-ac'otajic tale. Ja' jech yepal laj yiq'uic batel ti c'u yepal oyique. Jech ibatic, isutic batel ta yosilalic; c'ot xcha'va'anic yan velta li lumetic yu'unique; ja' te inaquiic o.

²⁴ Jech scotol li yantic israeletique te lic svoc' sbaic o; ta jujuchop sts'unubalic xchi'uc ta jujuchop sbiic isutanic batel ta yosilalic.

²⁵ C'alal jech orae, mu'yuc ajvalil yu'unic li israeletique, jech ta jujuntal la spasic li c'usi lec cha'yique.