Jueces 20 - Bible in Tzotzil de Chenalhó with Deuterocanon

Li israeletique la snop c'usi tspasic ta sventa li jun ants ichame

¹ Scotol li israeletic xlic ta Dan c'alal ta Beerseba xchi'uc c'alal ta Galaade la stsob sba scotolic te ta Mizpa ta stojol li Muc'ul Diose. Jech chac c'u cha'al jun no'ox vinic laj ya'ay sba ta scotolic.

² Li banquilaletic ta jujuchop israeletique te oyic scotolic. Oy chanib ciento ta mil (400,000) ta scotolic yich'ojic lec yespadaic.

³ Li yalab xnich'nab Benjamine laj ya'yic ti te xa stsoboj sbaic ta Mizpa li yantic jaychop israeletique. Li israeletique lic sjac'beic leví vinic c'uxi ilic li mulil le'e.

⁴ Itac'ov li leví vinique: —Te lic'otcutic ta lum Gabaa jchi'uc li yan ants cu'une; ja' li lum yu'un Benjamine yu'un te chivaycutic.

⁵ Pero te italic jayibuc viniquetic ta lum yu'un tsc'an chismilicun, vul setuic li na bu oyune. Ja' laj yuts'intaic li yan ants cu'une, jech te icham o.

⁶ Ja' yu'un laj quich'be tal li sbec'tale; biq'uitic la jboj. La jtac batel ta scotol cosilaltic yu'un ac'o yilic scotolic c'u x'elan li mulil oy ta jtojoltique.

⁷ Ja' yu'un vo'oxuc ti co'ol israelutique nopic c'usi lec ta pasel ta sventa ti jech la spasique —xut.

⁸ Scotolic iva'iic jmoj yo'nton scotolic jech laj yalic: —Tana li'i, me junuc mu'yuc boch'o tsut batel ta sna cu'untic.

⁹ Li c'usi tsc'an ta jpastique, la' jpastic canal tajimol; jq'ueltiquic boch'o chbat yac'be cu'untic li Gabaae.

¹⁰ Scotol li yantique, jujun ta lajlajuneb ac'o loc'uc ta jujuchop; ja' tsventainic sa'el tal ve'lil. Li yantique ja' chbatic ta Gabaa, chbat spaquic c'usi toj chopol la spasic ta jtojoltic vu'utic li israelutique —xiic.

¹¹ Scotol li israeletique la stsob sbaic batel jech chac c'u cha'al jun no'ox vinic ibatic ta scontrainel li lum Gabaae.

¹² La staquic batel j'almantaletic ta scotol yosilalic li yalab xnich'nab Benjamine, jech bat yalbeic: “Toj chopol c'usi la spasbuncutic jayibuc li achi'iltaquic tee.

¹³ Ac'bun ta jc'obcutic li viniquetic te ta Gabaa ti toj chopol c'usi la spasique yu'un jech ac'o uluc o li c'usi chopol ta stojol li Israele”, xutic. Pero li smomnich'nabtac Benjamine muc xich'beic ta muc' c'usi laj yalic li yantic xchi'ilic ta israelale.

¹⁴ La stsob sba scotolic te ta Gabaa ta buyuc no'ox lumal nacajtic, yu'un chbat spasic pleito xchi'uc li yantic israeletique.

¹⁵ Ti c'u yepal la stsob sbaic ta scotolic c'u smuc'ul yosilalic li benjaminetique ja' vaquib xcha'vinic ta mil (26,000), yich'anoj yespadaic. Ja' slecoj o li vucub ciento (700) t'ujbilic te ta lum Gabaae.

¹⁶ Ta scotolic le'e, t'ujbilic vucub ciento (700) ta puru sts'et sna' x'abtejic. Lec sna'ic spiquel jimich'. C'alal tsjipic batel bejuc tone, me jutuc mu stselbuj yu'unic.

¹⁷ Li yan jvoc' israeletique ja' chanib ciento ta mil (400,000) viniquetic ta scotolic; lec xchanojic pleito.

La spasic pleito li smomnich'nabtac Benjamine

¹⁸ Li yan jvoc' israeletique ibatic ta Betel. Te lic sjac'beic Dios boch'o jchopucal yu'unic ba'yuc chbat spas pleito xchi'uc li benjaminetique. Te i'albatic yu'un Muc'ul Dios ti ja' ba'yuc ac'o baticuc li Judae.

¹⁹ Sob iliquic ta yoc'omal li israeletique, yu'un chbat spasic pleito ta yeloval Gabaa.

²⁰ Jech iloq'uic batel, bat yac'beic li benjaminetique. Te la xchapan sbaic ta nopol Gabaa sventa pleito.

²¹ Pero li benjaminetique iloq'uic tal ta lum. La smilic chib xcha'vinic (22) ta mil li israeletique.

^22-24 Li israeletique isutic ta Betel, bat yoc'ta sbaic ta stojol li Muc'ul Diose. Te oyic o c'alal to i'och ac'ubal. Te lic sjac'beic Dios me xu' chbat scontrainic yan velta li xchi'ilic ta israelal ti liquemic ta Benjamine. C'alal i'albatic yu'un Muc'ul Dios ti xu' ac'o baticuque, itsatsub yo'ntonic. Jech ta yoc'omal la stsob sbaic batel yan velta; la xchapan sbaic lec te yo' bu ono'ox la xchapan sbaic ta ba'yuque. Bat spasic pleito xchi'uc li benjaminetique.

²⁵ Pero li benjaminetique iloq'uic tal ta Gabaa noxtoc, tal spasic pleito. La smilic ta espada vaxaclajunmil (18,000) li israeletique.

²⁶ Ja' yu'un li israeletique isutic batel yan velta ta Betel, c'ot yoc'ta sbaic ta stojol Muc'ul Dios te ta ch'ulna. Sbejel c'ac'al te oyic; mu'yuc xve'ic o. Te la xchic'beic smoton Muc'ul Dios, xchi'uc la smilbeic smoton sventa lec ch-ilatic.

^27-28 Ja'o ochem ta paleal yu'unic li Finees, xnich'on Eleazar, ja' li smomnich'on Aarone, xchi'uc ja'o te oy ta Betel li xcaxail smantal Diose. Li israeletique jech la sjac'beic yan velta li Muc'ul Diose: “¿Me chbat jpascutic pleito yan velta xchi'uc li jchi'ilcutic ta israelal, ja' li xnich'nabtac Benjamine, o me ja' lec ti te tsalbil chicomcutique?”, xutic. Li Muc'ul Diose jech laj yal: “Batanic, oc'om chacac'boxuc xa ta ac'obic”, xi.

²⁹ Ja' yu'un li israeletique j'o'lol bat snac' sbaic ta sjoylejal li lum Gabaae.

³⁰ Scotol li yantique iloq'uic batel yan velta ta yoxibal c'ac'al sventa chbat yac'beic li benjaminetique. Lec la xchapan sbaic batel te ta yeloval Gabaa jech chac c'u cha'al la spasic li chib veltae.

³¹ Li benjaminetique iloq'uic tal ta lum yan velta, tal staic li yantic israeletique. Ivu' to yu'unic la smilic lajuneb xcha'vinic (30) israeletic te ta sbelal Betel, xchi'uc ta Gabaa, xchi'uc te ta jamal-jobeltic.

³² La snopic ti chjatov to batel yu'unic li israeletique, xchi'uc ti tstsalic jech chac c'u cha'al la spasic chib veltae. Pero li israeletique la snamajes sbaic tal ta lum, yu'un ac'o nutsaticuc tal ta be yu'un li yajcontraique.

³³ Ts'acal lic xchapan sbaic lec scotolic te ta Baal-tamar, yu'un xa chlic yac'beic li yajcontraique. Jech ec li boch'otic te snac'oj sbaic ta sjoylejal Gabaae iloq'uic tal scotolic.

³⁴ Oy lajunmiluc ta scotolic; ja' toj lec xchanojic pleito. Laj yac'beic li lum Gabaae. Bats'i tsots li pleito la spasique. Li benjaminetique muc sna'ic me jutuc xa sc'an stsalatic o.

³⁵ Li Muc'ul Diose laj yac'be o ta sc'ob israeletic li benjaminetique, jech ivu' yu'un la smilic vo'ob xcha'vinic ta mil xchi'uc vo'vinic (25,100) li xchi'iltaquic ti liquemic ta jchop yu'un Benjamine.

³⁶ Li benjaminetic te laj yilic ti ich'ayic xa oe. Li yantic israeletique yantic no'ox la snamajes sbaic batel ti c'alal ch-ac'batic yu'un li benjaminetique. Yu'un ja' spatoj yo'ntonic yu'un li xchi'ilic te snac'oj sbaique yu'un jech xu' chulesic o li lum Gabaae.

³⁷ Li boch'otic te snac'oj sbaique la smilic ta espada scotol li boch'otic te oyic ta lume; ch'ayem yo'nton itaatic.

³⁸ Li boch'otic snac'oj sbaique yalojbe xa ono'ox sbaic xchi'uc yan xchi'iltaquic ti te chvinaj jun muc'ta ch'ayil c'alal me ochem xa ta sc'obic li lume.

³⁹ Li israeletique ijatovic tal yilel ta sventa li pleitoe. Jech li benjaminetique la smilic lajuneb xcha'vinic (30) li israeletique. La snopic ti ta xa spasic o c'anal jech chac c'u cha'al ta ba'yuque.

⁴⁰ Pero ja'o lic loc'uc muc'ta ch'ayil te ta slumalic. C'alal la sq'uelic sutel spatique, laj yilic ti solel yan sba xch'ayilal chloc' li slumalique.

⁴¹ Jech li yantic israeletique ijoybijic scotolic, tal sva'lebin sbaic xchi'uc li benjaminetique. Li smomnich'nabtac Benjamine i'och xi'el ta yo'ntonic; laj yilic ti te xa chich'ic oe.

⁴² Jech ijatovic batel ta sbelal xocol banamil, pero muc xa xu' yu'unic, yu'un li boch'otic te oyic ta lume tal smaquic ta be; te no'ox la smilic o.

⁴³ Lec cacal ta o'lol ic'ot yu'unic, jech lic snutsic batel; te no'ox lic snet'ic ta Menúha c'alal to ta sloq'ueb c'ac'al yu'un Gabaa.

⁴⁴ Jech te icham vaxaclajunmil (18,000) li smomnich'nabtac Benjamín ti lec sna'ic pleitoe.

⁴⁵ Li yantique ijatovic to batel ta xocol banamil ta stuq'uil Rimón ch'en, pero te imilatic batel ta be vo'mil (5,000) viniquetic noxtoc. Laj to snutsic batel c'alal to ta Gidom; te la smilic yan cha'mil (2,000).

⁴⁶ Jech te ichamic o vo'ob xcha'vinic ta mil (25,000) smomnich'nabtac Benjamín ti lec sna'ic paspleitoe.

⁴⁷ Pero oy vaquib ciento (600) ijatovic batel ta xocol banamil; chanib u te la snac' sbaic ta Rimón ch'en.

⁴⁸ Li israeletique isutic tal, tal smilic noxtoc li yantic te to comenique. La smilic ta espada scotol li viniquetic ta jujun lume, xchi'uc xvacaxic, xchijic, xchi'uc scotol c'usitic la staic ti butic ijelovic tale. La xchic'anic comel noxtoc li lumetique.