Jueces 19 - Bible in Tzotzil de Chenalhó with Deuterocanon

Sc'oplal leví vinic xchi'uc yan ants yu'un

¹ C'alal ja'o mu'yuc ajvalil yu'unic li israeletique, oy jun leví vinic te nacal batel ta slajeb xa vitsetic yu'un Efraín ti bu toj nom xae. Laj yic' batel yan ants yu'un. Li antse te liquem ta Belén ta yosilal Judá.

² Pero li antse mu'yuc jun yo'nton, jech isut batel ta sna stot te ta Belén. Chanib u te la xchi'in li stote.

³ Li vinique ibat sq'uel li yajnile, bat slequilc'opan yu'un chic' sutel. Laj yic' batel jun smozo xchi'uc cha'cot sburo. Li antse laj yic' ochel ta sna stot li smalale.

⁴ Jech li totile xcuxet no'ox yo'nton laj yic' ec li sni' c'alal laj yile; laj yalbe ti te ac'o comuque. Li leví vinic xchi'uc smozoe oxib c'ac'al te icomic ta sna stot li tsebe. Te ive'ic, laj yuch'ic vo'; te ivayic.

⁵ Ta xchanibal c'ac'al sob iliquic yu'un chbatic xa. C'alal ta xa'ox xbatique, li stot tsebe jech laj yalbe li sni'e: —Ve'an batel jutuc pan, yu'un jech mu xavi'naj batel —xut.

⁶ Jech ichotiic xchibalic. Ive'ic, laj yuch'ic vo'. Li totile jech laj yalbe li sni'e: —Coman to junuc ac'ubal yu'un jech xcuxet avo'nton —xut.

⁷ Li quereme ta xa'ox xbat. Pero li totile muc xlaj yo'nton ta yalbel ti ac'o to comuque, jech te icom.

⁸ Ta yo'bal c'ac'al sob ilic noxtoc yu'un chbat, pero li totile laj yalbe noxtoc ti ac'o ve'uc batel jutuque yu'un jech mu xvi'naj ta be. Jech te ive'ic xchibalic; te ibat o c'ac'al yu'unic.

⁹ C'alal yu'un xa'ox chbatic xchi'uc li yan ants yu'une xchi'uc li smozoe, li totile jech laj yal noxtoc: —Q'uelavil, bat xa c'ac'al, mu xa jaluc sac; xquechet no'ox batel li c'ac'ale. Ja' lec comanic xa junuc ac'ubal li'i, yu'un jech jun avo'ntonic; oc'om sob xabatic —xut.

¹⁰ Pero li vinique muc xa sc'an xcom, jech ibatic yoxibalic xchi'uc cha'cot sburo cajajtic batel syavartaic. Te ic'otic ta stuq'uil Jebús; ja' li Jerusalene.

¹¹ C'alal te oyique, jech laj yalbe yajval li mozoe: —Q'uelavil, bat c'ac'al. ¿Me mu ja'uc lec ti li' no'ox chijvayutic ta slumalic li jebusetique? —xut.

¹² Itac'ov li leví vinique: —Mu xu' li' chijcomutic ta slumalic li boch'otic muc ja'uc israeletique. Batic c'alal ta Gabaa.

¹³ Te vayal xijc'ot ta Gabaa, o me ta Ramá —xut.

¹⁴ Jech ibatic; te ich'ay c'ac'al yu'unic ta Gabaa. Ja' lum yu'unic li jchop liquemic ta Benjamine.

¹⁵ Jech te i'och vayicuc ta Gabaa. Li leví vinique te bat chotluc ta ch'ivit, yu'un mu'yuc boch'o i'ic'unuc ochel ta vayel ta sna.

¹⁶ Ts'acal te ijelov jun mol, yu'un ic' xa isut batel ta yabtel. Li mole te liquem tal ta vitsetic yu'un Efraín. Jch'om osil no'ox c'otem ti te nacale. Yu'un li yajvaltac Gabaae ja' yalab xnich'nab Benjamín.

¹⁷ C'alal laj yil te chotol ta ch'ivit li jxanubale, jech la sjac'be: —¿Bu lalic tal? ¿Bu chabat? —xut.

¹⁸ Itac'ov: —Chijelovcutic no'ox batel. Te lilicutic tal ta Belén ta yosilal Judá, yu'un chibatcutic ta slajeb xa vitsetic yu'un Efraín ti bu toj nom xae yu'un ja' to te nacalun. Te li'aycutic tal ta Belén; li'i suteluncutic xa batel ta jnacutic. Pero mu'yuc boch'o chiyic'uncutic ochel ta vayel ta sna.

¹⁹ Oy cu'uncutic taqui jobeletic sventa sve'el li jburoe. Xchi'uc oy jpancutic sventa ta jve'cutic jchi'uc li avixlale xchi'uc li jmozo li' jchi'uque. Lec chapaluncutic —xut.

²⁰ Itac'ov li mole: —Mu c'u xal avo'nton. Vu'un ta jventain li c'usi sc'an avu'une. Mu xcac' ti li' no'ox chavayic ta ch'ivite —xut.

²¹ Jech te laj yic' batel ta sna. Te laj yac'be sve'el li sburoe, xchi'uc te laj yac'be spoc yacanic; te ive'ic laj yuch'ic vo'.

²² C'alal toj xcuxet no'ox yo'ntonique, ja'o te ic'otic jayibuc bol viniquetic ta lum; c'ot setubeic sna li mole, c'ot spojilanic li ti'nae. Jech laj yalbeic: —Loq'ueso tal li vinic te ochemic ta anae yu'un ta jchi'incutic ta vayel —xutic.

²³ Itac'ov li mole: —Jchi'iltac, avocolicuc mu xapasic jech li c'usi toj chopole, yu'un li vinic li'i ja' jch'omna cu'un.

²⁴ Q'uelavilic, li' oy jun jtseb; ja' stsebal to. Xchi'uc li' oy li yan ants yu'un li vinique. Ja' ta jloq'uesboxuc tal; pasbeic li c'usi tsc'an avo'ntonique. Pero li vinic li'i mu xapasbeic li c'usi toj chopol ta pasele —xut.

²⁵ Pero muc xich'ic ta muc' c'usi laj yal li mole. Ja' yu'un li leví vinique la sloq'ues batel ta xoral li yan ants yu'une. Jech li viniquetique sbejel ac'ubal laj yuts'intaic, la spasbeic li c'usi tsc'an yo'ntonique. Ja' to la scomtsanic ti c'alal ta xa'ox sacube.

²⁶ C'alal sac xa'oxe, li antse isut tal ta sna li mol yo' bu oy li smalale. Te vul yaluc ta lum ta ti'na; te icham o.

²⁷ C'alal isacube, ilic li vinique yu'un tstam batel sbe yan velta. C'alal la sjam li ti'nae, ja' to laj yil te telel ta ti'na li yan ants yu'une; te cajajtic sc'ob ta smarcoal ti'na.

²⁸ Jech laj yalbe: —Lican, batic xa —xut. Pero muc xtac'ov. La stotsbe li sbec'tale. La scajan batel ta jcot sburo; laj yic' batel c'alal ta sna.

²⁹ C'alal ic'ote, la stsac jun xcuchilo; la sbojbe li sbec'tale. La spas ta lajcha'voc'; laj yac' batel ta scotol yosilal Israel.

³⁰ Scotol li boch'o laj yilique, jech laj yalic: —Mu'yuc ono'ox baq'uin xquiltic jech c'alal lijloc'utic tal ta Egipto, xchi'uc c'alal to tana. Tsc'an ta jnoptic c'u yu'un, xchi'uc c'usi tsc'an ta jpastic ta sventa —xiic.