Jueces 18 - Bible in Tzotzil de Chenalhó with Deuterocanon

Sc'oplal Micaía xchi'uc yalab xnich'nab Dan

¹ C'alal jech ic'ot ta pasele, ja'o mu'yuc ajvalil yu'unic li israeletique. Jech noxtoc li jchop liquemic ta Dane la sa'ilanic bu xu' ta xnaquiic, yu'un mu'yuc staoj yosil stuquic te ta stojol li yantic israeletique.

² C'alal te oyic ta Zora xchi'uc ta Estaole, la staquic batel vo'ob viniquetic ti lec tsots yo'ntonique, yu'un ja' chbat sq'uelic tal c'u x'elan li banamile. Jech laj yalbeic batel: —Batanic, bat q'uelic tal c'u x'elan li banamile —xutic. Jech ibatic ta vitsetic te ta yosilal Efraín. Te ic'otic ta sna li Micaiae; te ivayic.

³ C'alal nopol xa'ox x'ech'ic ta sna li Micaiae, laj ya'ibeic ta sc'op ti ja' leví te oye, jech bat sjac'beic: —¿Boch'o laj yic'ot tal li'i? ¿C'u yu'un ti latal li' ta banamile? ¿C'usi tal asa'? —xutic.

⁴ Li leví vinique te lic yal c'usi la xchapanic xchi'uc li Micaiae, xchi'uc c'usi chapal yu'unic ti jech ch-abtej ta paleal yu'unique.

⁵ Jech lic sjac'beic: —Jac'bo ca'tic Dios me lec chic'otcutic xana' ti bu jnopoj chibatcutique —xutic.

⁶ Li palee itac'ov: —Junuc avo'nton batanic; ja' Muc'ul Dios ta xchabioxuc batel ti buyuc no'ox chabatique —xut.

⁷ Jech iloq'uic batel; ibatic ta lum Lais. Li cristianoetic tee jun no'ox yo'ntonic jech chac c'u cha'al stalelic ono'ox li sidonetique. Mu sna'ic me oy boch'o chbat uts'intaaticuc, yu'un mu'yuc c'op cha'yic.

⁸ Li vo'ob viniquetique isutic tal yo' bu comenic li xchi'iltaquic te ta Zora xchi'uc ta Estaole. Jech c'ot jac'baticuc: —¿C'u x'elan avilic? —xiic. Itac'ovic:

⁹ —La jxancutic lec scotol li banamile, pero toj lec. Batic, bat ochcutic te. Mu me li'uc no'ox ch'anxi chotol xacomic. Bat jpojtic li banamil le'e.

¹⁰ C'alal me lijc'ot tee, li cristianoetique jun yo'ntonic ta jtatic; mu'yuc c'usi sc'an cha'yic, yu'un staoj ep yosilic. Ja' te chijyac'butic jlumaltic li Diose —xiic.

¹¹ Jech iloq'uic batel ta Zora xchi'uc ta Estaol vaquib ciento (600) viniquetic ti liquemic ta Dane; lec chapalic batel xchi'uc yabtejebic.

¹² Te ic'otic ta Judá; te la spas scarpanaic ta smaleb c'ac'al yu'un Quiriat-jearim. Ja' ti bu Yav Scarpanaic Dan, xi sbi li' ta orae.

¹³ Te iliquic batel noxtoc; ibatic ta vitsetic yu'un Efraín. Te ic'otic ta sna li Micaiae.

¹⁴ Li vo'ob viniquetic ti i'ay ono'ox sq'uelic ba'yuc li osil te ta Laise, jech laj yalbe li xchi'iltaquique: —¿Me xana'ic ti oy jlic mocan c'u'il li' ta nae, xchi'uc ti oy diosetic yu'unic sventa jujuchop sbiique, xchi'uc jun sloc'obal dios lec muc' lec macbil ta saquil taq'uine? ¿C'usi ta jpastic xana'ic? —xutic.

¹⁵ Li vo'ob viniquetique ibatic ta na yo' bu oy li querem levie, ja' li sna Micaiae, te c'ot sc'opanic.

¹⁶ Pero li vaquib ciento (600) soldadoetique te chmalavanic ta ti'na, lec chapalic xchi'uc yabtejebic.

¹⁷ Li vo'ob viniquetic ti i'ay sq'uelic ba'yuc li osile i'ochic ta na; la stsaquic loq'uel li sloc'obal sdiosic lec bisbil smuc'ule, ti macbil lec ta saquil taq'uine, xchi'uc li mocan c'u'ile, xchi'uc li yantic diosetic te oy ta snae. Yan li palee ja'o te comen ta ti'na xchi'uc li vaquib ciento (600) viniquetique.

¹⁸ Li palee laj yil ti i'ochic ta na li vo'ob viniquetique xchi'uc ti la stsaquic loq'uel li sloc'obal sdiosique, xchi'uc li mocan c'u'ile, xchi'uc li yantic diosetic yu'unic te oy ta yut nae. Jech laj yalbe: —¿C'usi chapasic le'e? —xut.

¹⁹ Itac'ovic: —Ch'anchan, maco ave. La' chi'inuncutic. Vo'ot chacom ta paleal xchi'uc ta totil cu'uncutic. Ja' lec ti vo'ot paleot yu'un jchop israeletique; ja' mu lecuc ti ochemot ta paleal yu'un jun no'ox vinic ta jbej nae —xutic.

²⁰ Li palee lec laj ya'ay, jech laj yich' batel li sloc'obal sdiosique, li mocan c'u'ile xchi'uc li yan diosetic te ta nae; bat xchi'in li jchop liquemic ta Dane.

²¹ Jech itotsic batel; la sjelubtasic batel ta ba'yucbe li ololetique, xchi'uc li xchijique, li xvacaxique, xchi'uc li c'usitic oy yu'unique.

²² C'alal nat xa'ox ixanovic batele, li Micaiae la stsob li boch'otic nopol nacajtic xchi'uque, bat snutsic ta anil.

²³ C'alal laj ya'yic ch-avanic batel li jnutsvanejetique, li danetique ijoyijic, jech la sjac'beic li Micaiae: —¿C'usi chapasic? ¿C'u yu'un ti atsoboj abaic tale? —xut.

²⁴ Itac'ov: —Yu'un laj avich'bicun tal li diosetic pasbil cu'une xchi'uc li pale cu'une; te xa achi'uquic batel. Mu'yuc xa c'usi icom cu'un. ¿C'u yu'un ti ta to xajac' c'usi tal jpase? —xut.

²⁵ Itac'ovic li yalab xnich'nab Dane: —Mu xavaptauncutic tal ta jpatcutic. Naca me oy boch'o xlic sc'ac'al yo'nton cu'uncutic tana, jech xu' li' no'ox chachamic achi'uc li achi'iltaque —xutic.

²⁶ Li Micaiae laj yil ti ja' toj ven epique, jech isut batel ta sna. Yan li danetique la stam batel sbeic.

²⁷ Te yich'ojic o batel li c'usi pasbilic yu'un Micaiae, xchi'uc te yic'ojbeic batel li pale yu'une; te ic'otic ta Lais. Li yajvaltac lum le'e jun yo'ntonic; mu'yuc c'u cha'al sba cha'yic. Li danetique lec laj ya'yic, la smilic comel ta espada, xchi'uc la xchiq'uic li lume yu'un mu'yuc chapalic.

²⁸ Mu'yuc boch'o xtal pojvanicuc, nom yiloj sbaic noxtoc xchi'uc li sidonetique, mu'yuc boch'o lec xil sba xchi'uquic. Yu'un li slumalique ta stenlejaltic oy te ta nopol Bet-rehob. Li danetique lic xcha'pasic lec li lume; ja' te inaquiic o.

²⁹ Li lume Dan laj yac'beic sbi. Ja' laj yich'be sbi li stotique, ja' li xnich'on Israele. Ja' yu'un Dan la sbiin li lume; ja' li Lais to'ox sbie.

³⁰ Li yalab xnich'nab Dane lic yich'ic ta muc' li sloc'obal sdiosic ti lec bisbil smuc'ule. Ja' la stiq'uic ta paleal li Jonatán, xnich'on Gersone; ja' li smomnich'on Moisese. Ja' i'ochilanic o ta paleal xchi'uc smomnich'nabtac c'alal to chucbil ibatic ta yan banamil.

³¹ Ti jayib c'ac'al te va'al li ch'ulna yu'un Dios ta Siloe, te oy o yu'unic ec li sloc'obal sdiosic pasbil yu'un Micaiae.