Jueces 17 - Bible in Tzotzil de Chenalhó with Deuterocanon

Sc'oplal pale xchi'uc diosetic yu'un Micaía

¹ Oy jun vinic te nacal ta vitsetic yu'un Efraín, Micaía sbi.

^2-3 Jech laj yalbe li sme'e: —Li jmil xchi'uc vo'vinic (1,100) ta sep saquil taq'uin ich'ay avu'un chavale, ti lachopolc'opoj o ta stojol li j'eleq'ue, pero vu'un li' quich'oj li taq'uine; vu'un laj quelc'an. Ta jsutesbot, yu'un laj ca'ay ti laj aval ti avoc'oj xa ta sventa Muc'ul Dios, yu'un chavac' ta pasel jun dios avu'un ti lec bisbil smuc'ule xchi'uc ti lec pixbil ta saquil taq'uine —xut. Jech la sutesbe li saquil taq'uine. Li sme'e jech laj yal: —Ac'o yac'bot bendición li Muc'ul Diose, col —xut.

⁴ C'alal laj xa sutesbe staq'uin sme' li Micaiae, li me'ile bat yac'be chib ciento (200) ta sep saquil taq'uin li boch'o sna' smeltsanel c'usiticuc ta saquil taq'uine. Laj yalbe ti ac'o spas jun dios ti lec bisbil smuc'ule, xchi'uc ac'o xpix ta saquil taq'uin. C'alal imeltsaje, li me'ile te bat yac' ta sna li Micaiae.

⁵ Li Micaiae oy sna yo' bu chich' ta muc' li sdiostaque, xchi'uc la spas jlic mocan c'u'il sventa pale xchi'uc diosetic sventa yajnil xnich'nab. Xchi'uc la st'uj jun xnich'on; laj yac'be yabtel ta paleal.

⁶ Yu'un ja'o yorail mu'yuc ajvalil yu'unic li israeletique jech ta jujuntal lic spasic li c'usi lec cha'yique.

⁷ Oy jun querem te ta Belén; ja' no'ox te xnabet ta stojol li jchop liquemic ta Judae. Ja' leví querem.

⁸ Li quereme iloc' tal ta Belén, yu'un tal sa' yan bu xu' chnaqui. Te ixanov tal ta vitsetic yu'un Efraín; te ivul ta loq'uel ta sna Micaía.

⁹ —¿Bu lalic tal? —xi li Micaiae. —Lilic tal ta Belén. Vu'un leviun, yu'un ta jsa' bu chinaqui —xi.

¹⁰ Jech laj yal li Micaiae: —Li' xcom achi'inuncutique. Vo'ot chacom ta totil, ta paleal cu'uncutic. Ta jtojot lajunsep saquil taq'uin ta jun jabil, xchi'uc chacac'bot ave'el xchi'uc ac'u' apoc' —xut.

¹¹ Li leví vinique la xch'un, jech te icom ta sna li Micaiae. Li Micaiae la scuy jech chac c'u cha'al xnich'on li quereme.

¹² Ja' icom ta paleal yu'un, jech te icom nacluc o li quereme.

¹³ Li Micaiae la snop ti ch-ac'bat lec bendición yu'un li Muc'ul Diose, yu'un mero leví xa ochem ta paleal yu'un.