Jueces 16 - Bible in Tzotzil de Chenalhó with Deuterocanon

Li Sansone ibat ta lum Gaza

¹ Li Sansone ibat ta Gaza; te laj yil jun jmulavil ants, jech te bat xchi'in.

² C'alal laj ya'yic yajvaltac lum ti te xa c'otem li Sansone, ital setuic sbejel ac'ubal; la xchabiic lec li sti' scoralil lume. Sbejel ac'ubal ch'anxiic, yu'un la snopic ti ta sacubel osil xu' ta smilique.

³ Pero li Sansone o'lol no'ox ac'ubal te ivay. Ilic batel, ech' stotsbe loq'uel sti' li scoraltonal lume. Laj yich' batel c'alal ta yoyaltac, c'alal ta smac. La scajan batel ta snecub, bat yac' ti bu ven toyol vits te ta stuq'uil Hebrone.

Sansón xchi'uc Dalila

⁴ Ts'acal to li Sansone lec laj yil jun tseb te nacal ta stenlejaltic Sorec, Dalila sbi.

⁵ Li banquilaletic yu'un filistaetique jech bat yalbeic li Dalilae: —Lo'lao li Sansone; jots'ol jaq'uilanbo c'u yu'un ti toj tsots slomoe, xchi'uc c'u x'elan xu' ta jtsalcutic, yu'un jech xu' ta jchuccutic. Chacac'botcutic lec atojol; ta xcac'cutic jmil xchi'uc vo'vinic (1,100) ta sep saquil taq'uin jujununcutic —xutic.

⁶ Li Dalilae jech lic yalbe li Sansone: —Avocoluc albun ca'ay c'uxi chavut ti toj tsots alomoe, xchi'uc c'u x'elan xu' chavich' chuquel chavich' tsalel —xut.

⁷ Itac'ov li Sansone: —Me ta xchuquicun ta vuclic ac' ti yoxic toe, ta xch'ay li jtsatsale; co'ol xa chic'ot jech chac c'u cha'al yantic viniquetic ti mu'yuc tsots slomoique —xi.

⁸ Li banquilaletic yu'un filistaetique laj yich'beic batel vuclic yaxal ac' li Dalilae. Jech li Dalilae ja' la xchuc o li Sansone.

⁹ Li Dalilae te xa'ox nac'al yu'un viniquetic ta yut sna. C'alal chucul xa'ox yu'une, jech laj yal: —¡Sansón, ta xa xtal stsacot li filistaetique! —xut. Li Sansone la xtuch' ta ora li aq'uetique; xco'laj no'ox xchi'uc c'aq'uem no laj ya'ay. Ja' yu'un li filistaetique muc sna'ic c'u x'elan oy stsatsal li Sansone.

¹⁰ Li Dalilae jech laj yalbe li Sansone: —¡Laj alo'laun; mu meleluc li c'usi laj avale! Avocoluc albun ta jamal c'u x'elan xu' chavich' chuquel —xut.

¹¹ Itac'ov li Sansone: —Me chixchuquicun ta ach' lasu ti mu'yuc to picbile, ta xch'ay o li jtsatsale; co'olun xa chic'ot jchi'uc yantic viniquetic ti mu'yuc tsots slomoique —xi.

¹² Li Dalilae la stsac ach' lasuetic; ja' la xchuc o li Sansone. Tsots i'avan jech laj yal: —¡Sansón, ta xa xtal stsacot li filistaetique! —xut. Te xa'ox snac'oj sbaic ta sna noxtoc li jtsacvanejetique. Pero li Sansone la xtuch' li ach' lasuetique; xco'laj no'ox xchi'uc jich'il no laj ya'ay.

¹³ Li Dalilae jech laj yalbe li Sansone: —¡Yoquel to puru lo'lael chavac'bun, yoquel to puru epalc'op chapasbun! Albun ca'ay ta melel c'u x'elan xu' chavich' chuquel —xut. Itac'ov li Sansone: —Me chacap ta jalel vucnet'eluc ta sjalubil poq'uetic li stsotsil jole, xchi'uc me lec tsots chapajbe li yoyaltaque, mu'yuc xa jtsatsal chicom jech chac' c'u cha'al yantic viniquetic ti mu'yuc tsots slomoique —xi.

¹⁴ Jech lic spas noxtoc li Dalilae. C'alal lec xa tsots pajajtic yu'un li yoyale, tsots i'avan: —¡Sansón, ta xa xtal stsaquicot li filistaetique! —xi. Pero li Sansone la sbul loq'uel li yoyale xchi'uc li jolobile.

¹⁵ Jech laj yal noxtoc li Dalilae: —¡J'epalc'op! Altic chaval ti ac'anojune yu'un yoxibal xa velta laj alo'laun; mu xavalbun c'u x'elan oy li alomoe —xut.

¹⁶ Ta sventa ti jujun c'ac'al te xvulvun o ta sjaq'uel jbel ya'yej li Dalilae, jech te i'ech' yo'nton li Sansone la snop ti ac'o xa chamuque.

¹⁷ Jech ta slajeb c'op jamal xa lic yalbe o: —Ja' ta sventa ti mu'yuc boch'o sloc'ojbun o li jole yu'un t'ujbilun ono'ox yu'un Dios ti c'alal mu'yuc to'ox chivoq'ue. Pero me oy boch'o tsloc'bun li jole, mu'yuc xa jtsatsal chicom o; bats'i c'un chicom o jech chac c'u cha'al yantic viniquetic ti mu'yuc tsots slomoique —xi.

¹⁸ Li Dalilae la sna' ti ja' xa melel oe. Jech laj yic'an li banquilaletic yu'un filistaetique jech laj yalbe: —La'ic xa me; li Sansone laj xa yalbun o ta jamal c'u x'elan oy li slomoe —xut. Jech italic, yich'ojic tal li staq'uinique.

¹⁹ Li Dalilae la svayubtas ta sba yo' li Sansone. Laj yic' jun vinic boch'o tsloc'be li sjole. C'alal loc'bil xa sjole, lic slaban, yu'un li stsatsal Sansone loq'uem xa'ox batel.

²⁰ Jech laj yal li Dalilae: —¡Sansón, ta xa xtal stsaquicot li filistaetique! —xut. Ijulov li Sansone; la snop ti xu' to yu'un jech chac c'u cha'al ono'oxe. Muc sna' me icomtsanat xa yu'un li Muc'ul Diose.

²¹ Li filistaetique la stsaquic; la sloq'uesbeic xchibal sbec' sat. Laj yiq'uic batel ta lum Gaza. La xchuquic ta cadena; laj yaq'uic juch'najuc te ta yut chuquinab.

²² Pero te lic ch'iuc yan velta li sjole.

Icham li Sansone

²³ Li banquilaletic yu'un filistaetique la stsob sbaic, yu'un tspasic jun q'uin ta sventa ti laj xa spasic canale, chac'beic smoton li sdiosic Dagone. Te iq'uejinic jech laj yalic: “Li dios cu'untique laj xa yac'butic ta jc'obtic li Sansone, ja' li cajcontratique”, xiic.

²⁴ C'alal laj yilic li yantic xchi'iltaquique, iq'uejinic ec; laj yich'ic ta muc' li sdiosique, jech laj yalic: “Li dios cu'untique laj xa yac'butic ta jc'obtic li Sansone, ja' li cajcontratique; ja' li jsoquesej banamile ti ep la smil jchi'iltactique”, xiic.

²⁵ Toj xcuxet no'ox yo'ntonic, jech la sc'anic loq'uesbel tal ta stojolic li Sansone yu'un tsc'an chuts'intaic. Jech la sloq'uesic ta chuquel li Sansone; te lic yuts'intaic, la slabanic. Te laj yaq'uic ta o'lol yoyaltac na.

²⁶ Li Sansone jech laj yalbe li querem ti initat batel yu'une: —Nopajesun batel yo' bu li yoyaltac na ti yich'oj o lec yipe, yu'un te ta jquican jba ta jcux co'nton —xut.

²⁷ Li muc'ta na yu'unique noj ta vinic antsetic; te oyic scotol ec li banquilaletique. Te ta xcha'cojal jolnae oy van oxmiluc vinic antsetic te oyic noxtoc. Te tsq'uelic yalel tal ec c'alal tslabanic li Sansone.

²⁸ Li Sansone lic sc'anbe vocol li Muc'ul Diose jech laj yalbe: “Cajval, Muc'ul Dios, avocoluc na'un to me li' ta orae; ac'bun jtsatsal. Ja' slajeb velta li' ta jc'anbot vocol ta atojol, yu'un jech j'ech'el ac'o bat stojic o li filistaetic ti la sloq'uesbicun xchibal sbec' jsate”, xut.

²⁹ Jech lic stsac li chib yoyal na te ta o'lol ti ja' te yich'oj o yip ta scotole. Jujun laj yac' sc'ob ta jujubej,

³⁰ jech tsots lic avanuc: “¡Co'ol ac'o chamcun jchi'uc li filistaetique!”, xi. Lic yac' scotol slomo li Sansone jech ilom yalel li nae. Te inet'ujic scotol li banquilaletique xchi'uc scotol li boch'otic te oyique. Ja' xjelov to yepal la smil c'alal icham li Sansone; ja' mu'yuc ep la smil ti c'alal cuxul to'oxe.

³¹ Te italic xchi'iltac ta voq'uel li Sansone xchi'uc li yuts' yalaltaque, tal yich'beic batel li sbec'tale; bat smuquic te ta smuquinal Manoa, ja' li stote. Li smuquinalique ja' cacal ta o'lol yu'unic li Zora xchi'uc Estaole. Li Sansone jtob (20) jabil i'och ta jchapanvanej yu'un li israeletique.