Jueces 15 - Bible in Tzotzil de Chenalhó with Deuterocanon

¹ C'alal i'ech' xa'ox jayibuc c'ac'ale, li Sansone ibat sq'uel li yajnile; ja'o ta yorail tuch' trigoaltic. Yich'ojbe batel jcot unin tentsun, jech c'ot yalbe li smuni'e: —Ch-och jq'uel li' ta scuarto li cajnile —xut. Pero li smuni'e muc xa xac' ochuc,

² jech laj yalbe: —La jnop ti yu'un xa mu xac'an o li avajnile, jech laj cac'be yic' jun achi'il ti lec xac'opan aba achi'uque. Pero te oy li muquile; ja' toj ven c'upil sba noxtoc jech chac c'u cha'al li avajnile. Ja' lec ja' ic'o ta xq'uexol —xut.

³ Itac'ov li Sansone: —Li' tanae, muc vu'cun jmul me chopol c'usi bat jpasbeic li filistaetique —xi.

⁴ Li Sansone bat stsac tal oxib ciento (300) ta cot vet. La xchucanbe sne ta cha'cha'cot, xchi'uc te capal la xchucan jujusil toj ta o'lol sneic li cha'cha'cot vete.

⁵ Lic stsan li tojetique; la stij batel ta trigoaltic yu'un filistaetic, jech ic'ac' scotol li strigoic ti bu jmoj xa tsopajtic yu'unique xchi'uc ti tec'ajtic toe. Ic'ac' c'alal ta ts'usubtic xchi'uc c'alal ta oliva te'etic yu'unic.

⁶ Li filistaetique lic sa'ilanic boch'o ti jech la spase. C'alal it'un yu'unic ti ja' la spas jech li Sansón ta sventa la spac ti i'ac'bat ta yan vinic yajnil yu'un li smuni'e, ja' li timnat vinique, jech bat xchiq'uic li antse xchi'uc li stote.

⁷ Li Sansone jech laj yal: —Ta sventa ti jech laj apasbicune, jamal chacalboxuc ta stojol Dios, mu'yuc ch-ech' co'nton o ti jech ta jpase, ja' to me laj apacbicun sutel ec li vo'oxuque —xut.

⁸ Jech lic yac'anbe lec comel ta scub xchi'uc ta yo'; ep ichamic yu'un. Jech iyal batel, bat nacluc ta nailch'en ta Etam.

Ta sbaquil ye buro no'ox la stsal filistaetic li Sansone

⁹ Li filistaetique italic; te vul spas scarpanaic ta yosilal Judá xc'ot c'alal to ta Lehi.

¹⁰ Li boch'otic te nacajtic ta Judae jech la sjac'beic: —¿C'u yu'un ti tal acontrainuncutique? —xutic. —Ja' no'ox tal jtsaccutic li Sansone, yu'un ac'o spas ya'ay ec li c'usi la spasbuncutique —xiic.

¹¹ C'alal laj ya'yique, ibat oxmil (3,000) viniquetic te ta nailch'en ta Etam yo' bu oy li Sansone, ja' li boch'otic liquemic ta Judae, jech c'ot yalbeic: —¿C'u yu'un ti laj asa'butic jvocoltique? ¿Me mu xana' ti ja' toj ech'em xaq'uic li filistaetique? —xutic. Itac'ov li Sansone: —Ja' la jpacbeic ec jech chac c'u cha'al la spasbicune —xi.

¹² Jech laj yalbeic: —Li' litalcutic, tal jchucotcutic batel yu'un chbat cac'otcutic ta sc'ob li filistaetique —xutic. Itac'ov li Sansone: —Albicun ta stojol Dios ti mu'yuc chamilicun li vo'oxuque —xut.

¹³ Jech laj yalbeic ta jamal: —Ta melel mu'yuc chajmilotcutic. Ja' no'ox ta jchucotcutic batel, chbat cac'otcutic ta sc'ob li filistaetique —xutic. Jech la xchuquic lec ta cha'lic ach' lasu; laj yiq'uic loq'uel ta nailch'en.

¹⁴ Laj yiq'uic batel c'alal ta Lehi. C'alal laj yilic li filistaetique, xcuxet no'ox yo'ntonic; x'avlajetic no'ox bat snupic tal ta be. Pero li Sansone ta ora i'ac'bat stsatsal yu'un espíritu yu'un Muc'ul Dios, jech ivu' yu'un la xtuch' li lasuetique; xco'laj no'ox xchi'uc c'aq'uem te'el lino laj ya'ay. Li xmochbenaltaque te xbajlajet yalel ta sc'ob.

¹⁵ Te la sta jun sbaquil ye buro lec to yox; la stam, ja' la smil o jmil (1,000) filista viniquetic.

¹⁶ Ts'acal jech laj yal: “Ta sbaquil ye buro no'ox la jpas ta cha'ox tsop; ta sbaquil ye buro no'ox la jmil o jmil (1,000) viniquetic”, xi.

¹⁷ C'alal laj yal jeche, la sjip yalel li baquil ye buroe, jech Ramat-lehi laj yac'be sbi li banamile.

¹⁸ Li Sansone solel taquin yo'nton laj ya'ay, ja' yu'un jech laj yalbe li Muc'ul Diose: “Vo'ot laj avac'bun li muc'ul coltael avu'une. Pero ¿c'u yu'un ti li' xa chavac' chamcun ta taqui-o'nal, xchi'uc chavac'un ta sc'ob li boch'otic mu'yuc yich'ojic circuncisione?”, xut.

¹⁹ Ja' yu'un li Diose la sjam jun vomlum te ta Lehi, jech te iloc' tal vo'; ja' laj yuch' li Sansone. Jech i'ayin lec stsatsal yan velta; itsatsub lec yo'nton. En-hacore laj yac'be sbi li nio' te ta Lehie. Te to oy o c'alal to tana.

²⁰ Li Sansone jtob (20) jabil i'och ta jchapanvanej yu'un israeletic. Ja'o ti c'alal spasojic canal li filistaetique.