Jueces 14 - Bible in Tzotzil de Chenalhó with Deuterocanon

Li Sansone laj yic' jun filista ants

¹ Li Sansone iyal batel ta Timnat; te laj yil jun filista tseb.

² C'alal isut batele, c'ot yalbe li stot sme'e, jech laj yalbe: —Oy laj quil jun filiste tseb ta Timnat. Avocolicuc bat jac'bicun, yu'un ta jc'an ta xquic' —xut.

³ Itac'ovic li stot sme'e: —¿C'u yu'un ja' chbat avic'be tal stseb filistaetic ti mu'yuc yich'ojic circuncisione? ¿Me yu'un mu'yuc stseb cuts' calaltic li' no'ox, xchi'uc me yu'un mu'yuc stseb jchi'iltactic li' ta sjunul jlumaltic? —xut. Itac'ov li Sansone: —Yu'un ja' toj lec chquil li tseb le'e, ja' ta jc'an chquic' —xi.

⁴ Li stote sme'e muc sna'ic me yu'un jech tsc'an Muc'ul Dios sventa ac'o vinajuc c'u x'elan xu' tstsalic li filistaetique, yu'un ja'o yorail tsalbilic li israeletique.

⁵ Li Sansone ibatic ta Timnat xchi'uc stot sme'. C'alal ic'ot ta ts'usubtic ta Timnat li Sansone, te xme'et tal ta stojol jcot ch'ium jti'vanej bolom.

⁶ Li espíritu yu'un Muc'ul Diose laj yac'be stsatsal li Sansone, jech ivu' yu'un ta sc'ob no'ox biq'uitic la slilin comel li bolome. Xco'laj no'ox xchi'uc unin tentsun laj ya'ay. Pero mu'yuc laj yalbe stot sme' li c'usi ic'ot ta pasele.

⁷ Iyal batel, bat sc'opan li yelub tsebe yu'un lec c'upil sba chil.

⁸ Ta yan c'ac'al c'alal yu'un xa chbat ochuc ta na li Sansone, te i'och sq'uel li bolom ti la smile. Ja' to laj yil te ochem muc'ta pom ta sbec'tal li bolome; yac'oj xa lec spomic.

⁹ Jech la sjots' li pome; te la slo' batel ta be. C'alal la sta ta be li stot sme'e, laj yac'be slo'ic ec. Pero mu'yuc laj yalbe me ta chamen bolom la sta.

¹⁰ Li stot sme'e te ic'otic ta sna li tsebe. Li Sansone te lic spas lec q'uin, yu'un jech stalel chnupin li querem tsebetique.

¹¹ Ta sventa ti chi'ic li uts' alaletique, jech laj yiq'uic tal lajuneb xcha'vinic (30) xchi'iltaquic.

¹² Li Sansone jech laj yalbe li lajuneb xcha'vinic (30) te oyique: —Oy c'usi chcac' anopbeic smelol. Me it'un avu'unic li vucub c'ac'al li' oyutic ta q'uine, vu'un chacac'boxuc jujulic lequil muc'tic c'u'iletic pasbil ta lino no xchi'uc jujulic ac'u'ic sventa q'uin.

¹³ Pero me muc xavalbicun c'usi smelole, vo'oxuc chavac'bicun lajuneb xcha'vinic (30) ta lic lequil muc'tic c'u'iletic pasbil ta lino no xchi'uc lajuneb xcha'vinic (30) c'u'il sventa q'uin —xut. Itac'ovic: —Alo li atajimol lo'ile, chca'icutic —xiic.

¹⁴ Jech lic yal li Sansone: “Ta jti'vanej iloc' tal ve'lil; Ti c'usi tsots slomoe, te iloc' tal c'usi chi'”, xi. C'alal iloc' oxib c'ac'ale, mu sna'beic o c'usi smelol li lo'ile.

¹⁵ Ta xchanibal c'ac'al jech laj yalbeic yajnil li Sansone: —Tsatsal jac'bo amalal c'usi smelol li lo'il laj yale. Me mu xapase, ta xajchic'cutic ta c'oc' xchi'uc sna atot tana. Ma'uc yu'un laj avic'uncutic tal li'i ti me'on xa chisutcutic batel avu'unique —xutic.

¹⁶ Li tsebe bat sc'opan li smalale; te ic'ot oc'uc ta stojol, jech laj yalbe: —Mu'yuc cani ac'anojun. Abajojun cani, yu'un mu xavalbun ca'ay c'usi smelol ec li lo'il laj avalbe jchi'iltaque —xut. Itac'ov li Sansone: —Mu'yuc bu calojbe smelol ec li jtot jme'e. ¿Me yu'un vo'ot xa chacalbot smelol ec? —xut.

¹⁷ Li vucub c'ac'al la spasic q'uine te choc'ta sba o ta stojol smalal li tsebe. Ta sventa ti isujilanat yu'un yajnil li Sansone, jech ta svucubal c'ac'al lic yalbe c'usi smelol. C'alal laj ya'ay li tsebe, bat yalbe li xchi'iltaque.

¹⁸ Ta svucubal c'ac'al c'alal mu'yuc to'ox chch'ay c'ac'ale li filistaetique jech bat yalbeic li Sansone: “Li c'usi toj chi'e ja' no'ox pom; li c'usi toj tsots slomoe ja' no'ox jti'vanej bolom”, xutic. Itac'ov li Sansone: “Ti manchuc laj ajochic li cunin tsebal vacaxe, muc xana'beic smelol ti jechuque”, xut.

¹⁹ Ta ora i'ac'bat stsatsal yu'un espíritu yu'un Muc'ul Dios li Sansone, jech ibat ta Ascalón, bat smil lajuneb xcha'vinic (30) viniquetic. Laj yich'anbe tal li sc'u'ique; ja' laj yac'be li boch'otic laj yalbeic smelol li lo'ile. Tsots ilic sc'ac'al yo'nton li Sansone, jech isut o batel ta sna stot.

²⁰ Li yajnile i'ac'at ta c'abal yan velta; ja' laj yic' li boch'o lec ono'ox sc'opan sba xchi'uc li Sansone.