Jueces 13 - Bible in Tzotzil de Chenalhó with Deuterocanon

Ivoc' li Sansone

¹ Li israeletique lic spasic c'usi chopol yan velta ta stojol li Muc'ul Diose. Ja' yu'un li Muc'ul Diose laj yac' ochicuc ta sc'ob filistaetic cha'vinic (40) jabil.

² Oy jun vinic te ta Zora liquem ta jchop yu'un Dan, Manoa sbi. Li yajnile mu sna' x'alaj, jech mu'yuc yol xnich'onic o.

³ Li antse ital c'opanatuc yu'un yaj'almantal Muc'ul Dios, jech i'albat: “Vo'ote mu ono'ox xana' xa'alaj. Pero ta xlic achi'in avol; chavoq'ues jun querem.

⁴ Ja' yu'un mu me xavuch' pox, xchi'uc c'usi tsotsic ta uch'el, xchi'uc mu me xave' li c'usi albil mu stac' chave'ique.

⁵ Yu'un chavoq'ues jun querem, pero mu me xaloc'be sjol, yu'un ja' voc'bil yu'un Dios sventa yabtel., Ja' t'ujbil c'alal mu'yuc to'ox chvoc' sventa chlic scolta loq'uel ta sc'ob filistaetic li achi'iltac ta israelale”, x'utat.

⁶ Li antse ital yalbe smalal scotol li c'usi i'albate, jech laj yalbe: “Oy jun vinic liquem tal ta stojol Dios i'ay sc'opanun, pero xco'laj xchi'uc jun j'almantal yu'un Muc'ul Dios ti lec ich'bil ta muq'ue. Mu'yuc la jac'be boch'o, bu liquem tal, xchi'uc mu'yuc laj yalbun c'usi sbi ec.

⁷ Jech laj yalbun: ‘Ta xlic achi'in avol; chavoq'ues jun querem. Ja' yu'un mu me xavuch' pox, xchi'uc mu me xavuch' li c'usi tsotsic ta uch'ele, xchi'uc mu me xave' li c'usi albiloxuc mu stac' xave'ique. Yu'un li querem chavoq'uese ja' t'ujbil yu'un Dios c'alal mu'yuc to'ox ta xvoc', xchi'uc c'alal to ta xcham’, xiyutun”, xut li smalale.

⁸ Li Manoae lic sc'opan Dios, jech laj yalbe: “Cajval Muc'ul Dios, ta jc'anbot vocol ti ac'o xa taluc yan velta li vinic ti laj atac tale; ac'o tal xchanubtasuncutic lec c'usi ta jpascutic c'alal me ivoc' li querem laj avale”, xut.

⁹ Li Diose laj ya'ibe sc'op li Manoae, jech la stac tal yan velta yaj'almantal ta stojol li ants ti c'alal ja'o loq'uem ta osilaltique; yan li smalale mu'yuc te oy.

¹⁰ Li antse bat yalbe ta anil noxtoc li smalale: —Ay xa sc'opanun noxtoc li vinic ti i'ay ono'ox sc'opanun ta jun veltae —xut.

¹¹ Ilic li Manoae; la xchi'in batel li yajnile, jech c'ot yalbe li vinic ti te oye: —¿Me vo'ot ti ay ono'ox ac'opan jun velta li cajnile? —xut. —Vu'un —xi itac'ov.

¹² Li Manoae jech laj yalbe: —C'alal me ic'ot ta pasel li c'usi laj avale, ¿c'u x'elan ta ts'itesel li quereme? ¿C'usi xu' ta jpascutic? —xut.

¹³ Itac'ov: —Ja' tsc'an ac'o spas scotol c'usi calojbe xa li avajnile.

¹⁴ Mu me xuch' pox, xchi'uc c'usiuc no'ox pasbil ta ya'lel ts'usub, xchi'uc c'usi tsotsic ta uch'el, xchi'uc mu me sve' li c'usi sc'oplal mu stac' xave'ique. Tsc'an ac'o spas scotol li c'usi laj calbee —xi.

¹⁵ Li Manoae jech laj yalbe li yaj'almantal Muc'ul Diose: —Avocoluc pajan to, yu'un ta jmeltsanbot jcotuc unin tentsun —xut.

¹⁶ Itac'ov: —Ac'o me chapajesun, pero mu'yuc ta jve' li ve'lile. Ja' lec ja' chic'bo smotonin li Muc'ul Diose —xut. Li Manoae muc sna' me ja' yaj'almantal Muc'ul Dios li vinic la xchi'in ta lo'ile.

¹⁷ Li Manoae jech laj yalbe: —Albuncutic c'usi abi, yu'un jech xu' chaquich'otcutic ta muc' c'alal ta xc'ot ta pasel li c'usi laj avale —xut.

¹⁸ Itac'ov li j'almantale: —¿C'u yu'un ti chajac'bun jbie? Ja' toj lec, toj muc' ta a'yel li jbie —xi.

¹⁹ Li Manoae la stsac li unin tentsun xchi'uc li c'usitic co'oltic sba jech chac c'u cha'al trigoe. Laj yac' ta ba ton; te la xchic' ta stojol li Muc'ul Diose. Li Muc'ul Diose oy c'usi toj lec lic spas ta stojol li Manoa xchi'uc yajnile.

²⁰ C'alal toyolic iloc' yat c'oc' te ta tone, li yaj'almantal Muc'ul Diose te imuy batel ta vinajel ta yat c'oc'. C'alal laj yil Manoa xchi'uc yajnile, la squejan sbaic ta stojol.

²¹ Li yaj'almantal Muc'ul Diose muc xa sut o tal yan velta ta stojol li Manoae xchi'uc ta stojol li yajnile. Jech te la sna'ic o ti ja' yaj'almantal Muc'ul Diose.

²² Li Manoae jech laj yalbe li yajnile: —Ta jbel sc'oplal chijchamutic xa, yu'un laj xa quiltic li Diose —xut.

²³ Itac'ov li antse: —Ti yu'unuc tsc'an chismilutic li Muc'ul Diose, muc xistsacbutic li smoton la jchic'betique xchi'uc li c'usitic co'oltic jech chac c'u cha'al trigoe, xchi'uc mu'yuc c'usi xijyac'butic quiltic; muc xijyalbutic scotol jech a'yej ti jechuque —xi.

²⁴ C'alal ivoc' li squeremique, Sansón laj yac'beic sbi. Ich'i li quereme; lec ac'bil bendición yu'un Muc'ul Dios.

²⁵ Li espíritu yu'un Muc'ul Diose laj yac' sba ta ilel ta stojol Sansón te ta carpanaetic yu'un Dan ti cacal ta o'lol yu'un Zora xchi'uc Estaole.