Jueces 12 - Bible in Tzotzil de Chenalhó with Deuterocanon

Sc'oplal Jefté xchi'uc jchop liquemic ta Efraín

¹ Li viniquetic liquemic ta Efraine italic ta stojol Jefté la xtuch'ic jelovel tal uc'um Jordán te ta stuq'uil Zafón. Jech vul yalbeic: —¿C'u yu'un muc xavalbuncutic ec ti ay atic' aba atuc ta pleito xchi'uc li amonetique, ay jchi'inotcutic ti jechuque? Li' tanae ta jchic'cutic ana; te capal chajchic'otcutic ec —xutic.

² Itac'ov li Jeftee: —Li vu'un jchi'uc jvinictaque oy la jpascutic pleito jchi'uc li amonetic. Laj quic'otcutic, pero muc x'ay acoltauncutic.

³ C'alal laj quil ti muc x'ay acoltauncutique, ja' yu'un laj cac' jbec'tal jtuc ta stojol li amonetique. Pero li Muc'ul Diose laj yac'bun ta jc'ob. ¿C'u yu'un ti ja' to latalic tal acontrainicune? —xut.

⁴ Li Jeftee lic stsob scotol li viniquetic te ta Galaade; lic spasic pleito xchi'uc li jchop liquemic ta Efraine. Tsalbil icom yu'unic. Yu'un jech to'ox i'albatic yu'un li boch'otic liquemic ta Efraine: “Vo'oxuc li galaadoxuc ti te xa nacaloxuc ta o'lol yu'unic li Efraín xchi'uc Manasese jatoviloxuc, yu'un li' laloq'uic batel ta jtojolcutic”, x'utatic.

⁵ Li galaadetique la spojbeic o li xtuch'ubil uc'um Jordán yu'un Efraine. C'alal me tsc'an te chjelovic batel li boch'otic liquemic ta Efraine, li galaadetique jech tsjac'beic: “¿Me vo'ot liquemot ta Efraín?”, xutic. C'alal me chalic ti ma'uque,

⁶ jech chalbeic noxtoc: “Shibolet”, chian ca'tic, xutic. “Sibolet”, me xie, te no'ox tsmilic o ta xtuch'ubil uc'um Jordán, yu'un cha'yic ti mu xloc' yu'une. Jech te ichamic chib yoxvinic ta mil (42,000) li boch'otic liquemic ta Efraine.

⁷ Li Jeftee vaquib jabil i'och ta jchapanvanej yu'unic li israeletique. C'alal ichame, te la smuquic ta Galaad ta slumal yo' bu ivoq'ue.

Ilic yan oxib jchapanvanej ta stojol israeletic

⁸ C'alal icham li Jeftee, ja' i'och ta jchapanvanej yu'un israeletic jun vinic liquem ta Belén, Ibzán sbi.

⁹ Oy lajuneb xcha'vinic (30) squeremetic xchi'uc lajuneb xcha'vinic (30) stsebetic. Scotol li xnich'nabtac le'e ta yantic bu ilican tal yajnilic smalalic yu'un. Li Ibzane vucub jabil i'och ta jchapanvanej yu'un li israeletique.

¹⁰ C'alal ichame, te la smuquic ta Belén.

¹¹ Ts'acal ja' i'och ta jchapanvanej yu'un israeletic noxtoc jun vinic Elón, liquem ta jchop yu'un Zabulón. Lajuneb jabil i'abtej.

¹² C'alal ichame, te la smuquic ta Ajalón te ta yosilal ti bu liquem sts'unubale.

¹³ Ja' i'och ta jchapanvanej noxtoc jun vinic Abdón, xnich'on Hilel liquem ta Piratón.

¹⁴ Le'e oy cha'vinic (40) squeremetic, xchi'uc lajuneb xcha'vinic (30) smomnich'nab, xchi'uc lajuneb xchanvinic (70) ta cot scajleb ca'ic. Ja' vaxquib jabil i'abtej.

¹⁵ C'alal ichame, te la smuquic ta Piratón te ta yosilal Efraín ta vitsetic yu'un Amalec.