Jueces 11 - Bible in Tzotzil de Chenalhó with Deuterocanon

Li Jeftee i'och ta banquilal soldado

¹ Oy jun vinic Jefté sbi, lec tsatsal vinic, lec sna' paspleito. Ja' xnich'on Galaad; ja' yol jun jmulavil ants.

² Li yajnil Galaade oy squeremetic ec. C'alal ich'i li squeremetique, la snutsic loq'uel ta snaic li Jeftee, jech laj yalbeic: “Mu'yuc c'usi chavich' comel li' ta sna jtotic, yu'un yan o ame'”, xutic.

³ Jech iloc' batel li Jeftee; bat nacluc ta jun banamil Tob sbi. Oy xchi'iltac la stsob sbaic batel; ja' ch'ajil viniquetic. Co'ol iloq'uic batel xchi'uquic li Jeftee.

⁴ I'ech' jayibuc c'ac'al, li amonetique lic stsaquic ta pleito li israeletique.

⁵ Li banquilaletic te ta Galaade la staquic ta iq'uel li Jefté te nacal ta Tobe,

⁶ jech laj yalbeic batel: —Batic, vo'ot cha'och ta banquilal soldado cu'uncutic, yu'un chbat jpastic pleito xchi'uc li amonetique —xutic.

⁷ Itac'ov li Jeftee: —¿Me mu xana'ic ti laj ono'ox abajicun; laj anutsicun loq'uel tal ta sna li jtote? Tana li'i tal asa'icun ta sventa yu'un ep chavich'ic vocol —xut.

⁸ Itac'ovic: —Ta melel ja' ta scoj oy ep jvocolcutic ti tal jsa'otcutique. Yu'un ta jc'ancutic ti chabate, bat jpastic pleito jchi'uctic li amonetique, xchi'uc vo'ot cha'och ta banquilal cu'uncutic ti c'u quepalcutic te ta Galaade —xutic.

⁹ Itac'ov li Jeftee: —Me bat jchi'inoxuc sventa chbat jpastic pleito xchi'uc li amonetique, me laj yac'bun jtsal li Muc'ul Diose, ¿me ta melel ti chac'anic vu'un chicom ta banquilal avu'unique? —xi.

¹⁰ Itac'ov li banquilaletique: —Sna'oj Muc'ul Dios ti ja' melel chc'ot ta pasel jech chac c'u cha'al laj avale —xutic.

¹¹ Ja' yu'un li Jeftee la xchi'in tal li banquilaletique. Li israeletic te ta Galaade ja' la st'ujic ta banquilal xchi'uc ta jchapanvanej yu'unic. C'alal te oy ta Mizpa li Jeftee, te lic yalbe Muc'ul Dios c'usi laj yalic xchi'uc li banquilaletique.

¹² Li Jeftee la stac batel j'almantaletic ta stojol li ajvalil yu'un amonetique, jech laj yalbe batel: “¿C'usi chopol la jpasbotcutic ti tal acontrainuncutic li' ta cosilalcutique?”, xutic.

¹³ Itac'ov li ajvalil yu'un amonetique: “C'alal iloq'uic tal ta Egipto li amoltotique, la spojbun li cosilalcutic xlic ta uc'um Arnón c'alal to ta uc'um Jaboc xchi'uc ta uc'um Jordane. Me xac'anique, sutesbuncutic ta lequilal ta ora”, xi.

¹⁴ Li Jeftee la stac batel yan j'almantaletic ta stojol li ajvalile,

¹⁵ jech c'ot yalbeic: “Li Jeftee jech laj yal tal: Vu'uncutic li israeluncutique mu'yuc la jpojbecutic yosil moabetic xchi'uc vo'oxuc li amonoxuque.

¹⁶ C'alal liloc'cutic tal ta Egiptoe, te lixanovcutic tal ta xocol banamil c'alal to ta Tsajal nab; te livulcutic ta Cades.

¹⁷ Te la jtaccutic batel j'almantaletic ta stojol li ajvalil ta Edome, jech c'ot yalbeic: “Ta jc'anbot vocol ti avac'uc jelovcuncutic batel ta avosilale”, xutic. Pero li ajvalile muc xac' jelocuncutic batel. La jtaccutic batel j'almantal noxtoc ta stojol li ajvalil ta Moabe, pero muc xac' jelovcuncutic noxtoc. Ja' yu'un te licomcutic ta Cades.

¹⁸ Ts'acal lixanovcutic batel ta xocol banamil; la joyibtabecutic yosilal li edometic xchi'uc moabetique. Te lic'otcutic ta stuq'uil sloq'ueb c'ac'al yu'un Moab; te no'ox la jpas jcarpanacutic ta jot uc'um Arnón. Muc jtuch'cutic jelovel li uc'ume yu'un ja' xa te xlic yosilal li moabetique.

¹⁹ La jtaccutic batel j'almantaletic noxtoc ta stojol Sehón, ja' li ajvalil yu'un amorretic te ta Hesbone. Jech c'ot yalbeic: “Ta jc'anbot vocol ti avac'uc jelovcuncutic batel ta avosilale yu'un chibatcutic ta cosilalcutic”, xutic.

²⁰ Pero li Sehone muc xac' jelovcuncutic ta yosilal. Ta ora la stsob svinictac tal spas scarpanaic ta Jahaza, jech lic stsacuncutic ta pleito.

²¹ Pero li Muc'ul Dios cu'uncutic, vu'uncutic li israeluncutique, laj yac'bun ta jc'obcutic li ajvalil Sehone, xchi'uc scotol svinictaque, jech la jtsalcutic laj quich'becutic comel scotol yosilalic li amorretic yo' bu nacajtique.

²² Laj quich'cutic scotol, xlic ta uc'um Arnón c'alal to ta Jaboc xchi'uc xlic ta xocol banamil c'alal to ta uc'um Jordán.

²³ Li vo'ote chac'an chapojbuncutic tana li c'usi laj yac'bun ta jc'obcutic Muc'ul Dios ti la spojbe li amorretique.

²⁴ Li c'usi chayac'bot ec li Quemós, ja' li dios avu'une, ja' xa avu'un chc'ot o ec. ¿Me mu jechuc? Ja' no'ox jech ec li vu'uncutique, li c'usi laj yac'bun ta jc'obcutic li Muc'ul Diose ja' xa cu'un chca'icutic o ec.

²⁵ ¿Me yu'un vo'ot toj ven lecot chava'ay jech chac c'u cha'al li Balac, xnich'on Zipor, ja' li ajvalil ta Moabe? Pero li stuque muc x'ay stsacuncutic ta pleito.

²⁶ Oy xa oxib ciento (300) jabil li' nacaluncutic ta Hesbón, ta Aroer, xchi'uc ta bic'tal lumetic yu'unic, xchi'uc ta scotol li lumetic te ta yosilal Arnone. ¿C'u yu'un muc ono'ox xac'opojic vo'one tal?

²⁷ Li vu'une mu'yuc c'usi chopol chajpasbot. Ja' vo'ot ti chopol c'usi chapasbuncutique yu'un chac'an chacontrainuncutic. Ja' ac'o yal stuc Muc'ul Dios boch'o oy smul, me israeletic, o me amonetic”, xutic c'otel.

²⁸ Pero li ajvalil yu'un amonetique muc xich' ta muc' c'usi laj yal batel li Jeftee.

Li Jeftee laj yal ti oy c'usi chac' ta stojol Diose

²⁹ Li Jeftee iventainbat yo'nton yu'un Espíritu yu'un Muc'ul Dios. Ixanov batel ta yosilal Galaad xchi'uc ta yosilal Manasés; te ijelov batel ta Mizpa te ta Galaad, yu'un ch-och batel ta yosilal amonetic.

³⁰ Li Jeftee jech laj yal ta stojol li Muc'ul Diose: “Me chavac'bun ta jc'ob li amonetique,

³¹ ta jchic'bot amotonin li boch'o chloc' snupun ta be c'alal me lisut batel ta stsalel li amonetique”, xut.

³² Jech ibat ta slumal amonetic li Jeftee, bat stsac ta pleito. Li Muc'ul Diose laj yac'be ta sc'ob, jech ivu' yu'un la stsal.

³³ Ep la smil comel li yajcontraique; la spoj jtob (20) lumetic te ta Aroer, ta Minit c'alal to ta Abel-keramime. Jech i'ochic o ta sc'ob israeletic li amonetique.

³⁴ C'alal isut tal ta sna te ta Mizpa li Jeftee, ital nupatuc ta be yu'un stseb; te ch-ac'otaj tal, tstij tal sepsep taq'uin. Pero c'ajumal jun li xnich'one; mu'yuc yan squerem, o me stseb.

³⁵ C'alal laj yil ti ja' stsebe, la sli' sc'u', jech laj yal: —Ay, cunin tseb, laj xa avac'bun ep jvocol. ¿Me vo'ot ic'ot ta atojol ti chavac'bun ep cat co'ntone? Yu'un oy c'usi caloj ta stojol Muc'ul Dios, pero mu xa xu' ta jsutes jc'op —xut.

³⁶ Itac'ov li tsebe: —Lec oy tati, pasbun me li c'usi laj aval ta stojol Muc'ul Diose yu'un laj yac' atsal comel ec li avajcontrae, ja' li amonetique.

³⁷ Ja' no'ox ta jc'anbot ti ac'o acoltaun to batel chibuc u, yu'un chibat ta xanubal ta vitsetic jchi'uc yan tsebetic, chbat coc'ta jba ta sventa ti mu xa xu' chimalij oe —xut.

³⁸ Itac'ov li stote: —Lec oy, batan —xut. Jech la scolta batel chib u; ixanov batel ta vitsetic xchi'uc yan tsebetic, bat yoc'ta sba ta sventa ti mu xa xu' chmalij oe.

³⁹ C'alal its'aqui li chib ue, isut tal ta stojol li stote. Jech li totile la spas o li c'usi yaloj ta stojol Muc'ul Diose. Li tsebe muc xmalij o; mu'yuc yiloj o vinic c'alal icham.

⁴⁰ Li israeletique jech stalelic o ti chanib c'ac'al ta jabil chbat yoc'taic jujun jabil stseb Jefté scotol li tsebetic yu'unique.