Jueces 10 - Bible in Tzotzil de Chenalhó with Deuterocanon

Li israeletique la sventainic lum Tola xchi'uc Jair

¹ C'alal chamen xa'ox li Abimeleque, ilic jun vinic, Tola sbi; ja' liquem ta jchop yu'un Isacar. Ja' xnich'on Fúa; ja' smomnich'on Dodo. Ja' lic scolta scotol li israeletique. Li Tolae te nacal ta Samir ta vitsetic yu'un Efraín.

² Ja' lic spas ta mantal oxib xcha'vinic (23) jabil li israeletique, ja' to ti c'alal ichame, te la smuquic ta Samir.

³ Ts'acal ilic noxtoc Jair, galaad vinic; ja' la spas ta mantal chib xcha'vinic (22) jabil li israeletique.

⁴ Li Jaire oy lajuneb xcha'vinic (30) xnich'nab xchi'uc jujucot scajleb buroic. Xchi'uc oy lajuneb xcha'vinic (30) lumetic yu'unic. Ja' “Lumetic yu'un Jair” sbi; ja' jech sbi o c'alal to tana. Li lumetique te oy ta yosilal Galaad.

⁵ C'alal icham li Jaire, te la smuquic ta Camón.

Itsalatic yu'un amonetic li israeletique

⁶ Li israeletique lic spasic c'usi chopol yan velta ta stojol li Muc'ul Diose; ja' lic tunicuc yu'un li Baaletique, xchi'uc li Astarote, xchi'uc li diosetic yu'un Siria, Sidón, Moab, xchi'uc li diosetic yu'un xnich'nab Amón xchi'uc filistaetique. Ja' la scomtsanic o li Muc'ul Diose; muc xa ja'uc xtunic yu'un.

⁷ Ja' yu'un li Muc'ul Diose i'ilin ta stojol li israeletique, jech laj yac' ochicuc ta sc'ob filistaetic xchi'uc ta sc'ob amonetic.

⁸ Li israeletic te nacajtic ta Galaad ta jot uc'um Jordán ta yosilal amorretique, tsots lic yich'ic uts'intael vaxaclajuneb (18) jabil yu'un li filistaetic xchi'uc amonetique.

⁹ Li amonetique ijelovic batel ta jot uc'um Jordán noxtoc yu'un bat stsaquic ta pleito li boch'otic liquemic ta Judá, ta Benjamín xchi'uc ta Efraine. Jech te ilic tsots svocolic ta uts'intael li israeletique.

¹⁰ Ts'acal to lic sc'anbeic vocol li Muc'ul Diose jech laj yalbeic: “Laj xa jta jmulcutic ta atojol, yu'un la jcomtsanotcutic vo'ot li Diosote; ja' laj quich'cutic ta muc' li Baaletique”, xutic.

¹¹ Li Muc'ul Diose jech la stac'be: “Li vo'oxuque oy to'ox avocolic ta mozoinel yu'un li egiptoetique, li amorretique, li amonetique, li filistaetique,

¹² li sidonetique, xchi'uc li amalequetique. Pero c'alal laj ac'anbicun vocol ta jtojole, ¿me muc xajcoltaoxuc?

¹³ Vo'oxuc laj acomtsanicun; ja' laj avich'ic ta muc' li yantic diosetique. Ja' yu'un mu'yuc xa chajcoltaoxuc.

¹⁴ Ja' bat c'anbeic vocol li diosetic avu'unic laj at'ujique. Ac'o scoltaoxuc loq'uel ta sventa li avocolique”, xut.

¹⁵ Li israeletique jech laj yalbeic li Muc'ul Diose: “Laj xa jta jmulcutic. Pasbuncutic li c'usi chac'ane. Ja' no'ox avocoluc coltauncutic ta sventa li jvocolcutic li' ta orae”, xutic.

¹⁶ Jech lic sloq'uesic ta stojolic li yantic diosetic yu'unique; ja' lic yich'ic ta muc' stuc li Muc'ul Diose. Li Muc'ul Diose toj abul sba laj yil ti ep chich'ic vocol li israeletique.

¹⁷ Li amonetique jmoj la stsob sbaic; te la spas scarpanaic ta Galaad. Jech ec li israeletique jmoj la stsob sbaic; te la spas scarpanaic ta Mizpa.

¹⁸ Li israeletic te nacajtic ta Galaade xchi'uc li banquilaletic yu'unique jech laj yalbe sbaic: “Li boch'o chijyic'utic batel ta scontrainel li amonetique ja' chcom ta jpasmantal yu'un scotol li jnaclumetic li' ta Galaade”, xut sbaic.