Jueces 1 - Bible in Tzotzil de Chenalhó with Deuterocanon

Li Judá xchi'uc Simeone la xchuquic li Adoni-bezeque

¹ C'alal chamen xa'ox li Josuee, li israeletique lic sjac'beic Muc'ul Dios boch'o jchopucal ba'yuc chbat spas pleito yu'unic xchi'uc li canaanetique.

² Jech itac'batic yu'un li Muc'ul Diose: “Ja' ba'yuc chbatic li boch'otic liquemic ta Judae yu'un ja' cac'ojbe ta sc'obic li banamil le'e”, xi.

³ Ja' yu'un li jchop liquemic ta Judae jech laj yalbeic li jchop liquemic ta Simeone, ja' yits'inab no'ox sbaic: “Bat coltauncutic ta spojel li banamil ti sc'oplal chquich'cutique, jech chbat jcoltaotcutic ta spojel ec li banamil bu chavich'ique”, xutic. Jech la xch'unic batel li jchop liquemic ta Simeone,

^4-5 jech ibatic xcha'chopalic. Li Judae i'ac'bat ta sc'obic yu'un Muc'ul Dios li canaanetique xchi'uc li ferezetique. La smilic comel lajunmil (10,000) viniquetic te ta Bezec. Te la staic noxtoc ta Bezec li Adoni-bezeque, pero ijatov batel.

⁶ La snutsic batel, la xchuquic; la sc'ocanbeic sme' sc'ob xchi'uc sme' yacan.

⁷ Li Adoni-bezeque jech laj yal: “Li vu'une ja' jech la jc'ocanbe sme' sc'ob, sme' yacanic lajuneb xchanvinic (70) ajvaliletic ec; laj cac'be stamic xch'uch'ulil jve'el ta yolon jmexa. Ti c'u x'elan la jpase, ja' jech chispacbun ec li Diose”, xi. Jech te laj yiq'uic batel ta Jerusalén; te icham o.

Ja' smelol c'alal i'och ta sc'obic Jerusalén xchi'uc Hebrón li Judae

⁸ Li boch'otic liquemic ta Judae bat spojic li Jerusalene; laj yich'ic o comel. La smilbeic ta espada scotol li yajvale, xchi'uc laj yac'beic comel sc'ac'al li lume.

⁹ Ts'acal bat stsalic noxtoc li canaanetic te nacajtic ta toyolaltic ta yosilal Néguev xchi'uc ta stenlejaltique.

¹⁰ Xchi'uc bat stsalic noxtoc li canaanetic te nacajtic ta Hebrón ti Quiriat-arba to'ox sbie. La smilic comel li Sesai, Ahimán, xchi'uc Talmaie.

La stsal lum Debir li Otoniele jech laj yic' o li Acsae

¹¹ Ts'acal bat smilic noxtoc li boch'otic te nacajtic ta Debire, ja' li Quiriat-sefer to'ox sbie.

¹² Jech ono'ox yaloj li Calebe: “Li boch'o chbat stsal li lum Debire, ta xcac'be yic' li jtseb Acsae”, xi.

¹³ Li boch'o ay stsale ja' Otoniel, xnich'on Cenaz; ja' xnich'on xc'ox its'in li Calebe. Ja' yu'un li Calebe ja' laj yac'be o yic' li stseb Acsae.

¹⁴ C'alal yu'un xa'ox chic' batel li yajnile, li Otoniele laj yalbe yajnil ti ac'o sc'anbe jutebuc yosil li stote. Jech iyal ta sburo li tsebe. Li Calebe jech la sjac'be li stsebe: —¿C'usi apas? —xut.

¹⁵ —Yu'un oy c'usi ta jc'an chavac'bun. Yu'un avac'ojbun xa ono'ox li Negueve; ac'bun noxtoc li nio'etic tee —xut. Jech li Calebe laj yac'be li nio'etic ta cajal xchi'uc ta olone.

Li jchop liquemic ta Judá xchi'uc ta Benjamine la spojic to batel yan yosilic

¹⁶ Li xnich'nab queneo vinic, ja' li smuni' Moisese, iloq'uic batel ta lumetic ti xantic sbie; ja' la xchi'inic batel li jchop liquemic ta Judae. Te ibatic ta xocol banamil yu'un li Judá te ta stuq'uil sur yu'un Arade. Jech te icom naquiicuc scotolic.

¹⁷ Li jchop liquemic ta Judá xchi'uc ta Simeón ti xchi'il no'ox sbaic ta voq'uele bat stsalic li canaanetic te nacajtic ta Sefate; laj yulesic o comel. Li lum tee Horma laj yac'beic sbi.

¹⁸ Li Judae laj yich'ic noxtoc li lum Gaza xchi'uc yosilale, xchi'uc li Ascalón xchi'uc yosilale, xchi'uc li Ecrón xchi'uc yosilale.

¹⁹ Li Judae te chi'inbil yu'un li Muc'ul Diose, jech ivu' yu'un la stsalic li boch'otic te nacajtic ta vitsetic ta toyolaltique. Ja' xa no'ox muc stsal yu'unic li boch'otic te nacajtic ta stenlejaltique yu'un oy lec scaretaic pasbilic ta stsatsal taq'uin.

²⁰ Li Calebe ja' laj yich' li Hebrone yu'un jech ono'ox yaloj comel li Moisese. Ja' yu'un li Calebe la snuts loq'uel li oxib xnich'nab muc'ta vinic Anaque.

²¹ Pero li jchop liquemic ta Benjamine muc xu' yu'unic la snutsic loq'uel te ta Jerusalén li jebusetic te nacajtique. Ja' yu'un te la xchi'inic o ta naclej. Yoquel te xchi'inojic o ta naclej ta Jerusalén c'alal to tana.

Ja' smelol c'alal bat spojic Betel li smomnich'nabtac Josee

²² Li smomnich'nabtac Josee imuyic batel ta Betel, te chi'inbilic yu'un li Muc'ul Diose.

²³ Ba'yuc la staquic batel boch'o chbat sq'uel c'u x'elan li lum Betele, ja' li Luz to'ox yan sbie.

²⁴ Li boch'o ibatique laj yilic jun vinic te iloc' tal ta lum, jech laj yalbeic: “Ac'bun quilcutic c'u x'elan xu' chij'och ta yut li lume. Me chavac'bun quilcutique, ta xajc'uxubinotcutic”, xutic.

²⁵ Jech li vinique laj yac' ta ilel c'u x'elan xu' ch-ochic ta yut lum, jech la smilic comel ta espada scotol. Yan li vinique la scoltaic batel xchi'uc yajnil xnich'nab.

²⁶ Te ibat ta yosilal Hetetic; te la spas jun lum. Luz laj yac'be sbi. Ja' jech sbi o c'alal to tana.

Muc xu' yu'unic stsalel yajvaltac banamil li Manasés xchi'uc Efraine

²⁷ Li jchop liquemic ta Manasese muc xu' yu'unic stsalel li lum Bet-seán, Taanac, Dor, Ibleam, Meguido, xchi'uc li tsobtsobnaetic yu'un jujun lume. Ja' yu'un te la xchi'inic ta naclej li canaanetique.

²⁸ Pero c'alal itsatsub lec yo'ntonic li israeletique, laj yaq'uic persa ti ac'o abtejicuc tsots yu'unic li canaanetique, pero muc xu' yu'un la snutsic loq'uel.

²⁹ Jech noxtoc li jchop liquemic ta Efraine muc xu' yu'un la snutsic loq'uel ta Gezer li canaanetic te nacajtique, jech te nacajtic icom xchi'uquic.

Ja' smelol ti muc xu' yu'unic snutsel loq'uel yajvaltac yosilic li yantic israeletique

³⁰ Li jchop liquemic ta Zabulone muc xu' yu'unic snutsel loq'uel li canaanetic te nacajtic ta Quitrón xchi'uc ta Naabale, jech te nacal icom xchi'uquic. Ja' no'ox laj yac'beic tsots yabtelic.

^31-32 Jech ec li jchop liquemic ta Azere muc xu' yu'unic snutsel loq'uel li canaanetic te nacajtic ta Aco, ta Sidón, ta Ahlab, ta Aczib, ta Helba, ta Afec, xchi'uc ta Rehobe. Ta sventa ti muc xu' yu'unic snutsel loq'uele, jech te nacal icom xchi'uquic.

³³ Jech ec li Neftalie muc xu' yu'unic snutsel loq'uel noxtoc li canaanetic te nacajtic ta Bet-semes xchi'uc ta Bet-anate. Jech te nacajtic icom xchi'uquic; ja' no'ox laj yac'beic tsots yabtelic.

³⁴ Li amorretique la snutsic batel c'alal to ta vitsetic li jchop liquemic ta Dane; muc xaq'uic yalicuc tal ta stenlejaltic.

³⁵ Ja' yu'un li amorretique ja' te icom naquiicuc o ta Heres, ta Ajalón xchi'uc ta Saalbim. Pero c'alal itsatsub lec yo'ntonic li smomnich'nabtac Josee, lic yaq'uic persa ti ac'o abtejicuc tsots yu'unic li amorretique.

³⁶ Li sts'aquic xchi'uquic amorretique te xlic ta ch'utch'ut vits yu'un Acrabim c'alal to ta Sela, xmuy batel c'alal to ta cajal.