San Juan 5 - Bible in Tzotzil de Chenalhó with Deuterocanon

Icol jun vinic aluben yacan te ta Betesda

¹ Ts'acal to la sta sc'ac'alil yan q'uin cu'uncutic, vu'uncutic li judiouncutique. Jech ibat ta Jerusalén li Jesuse.

² Te ta Jerusalene oy pasbil stanqueal vo' ta nopol sti' li coralton sventa yocheb chijetique. Li stanqueal vo'e Betesda sbi ta hebreo c'op. Te oy noxtoc vo'bej cotcot na ta sti'ti' li stanqueal vo'e.

³ Ja' te mochajtic ep jchameletic. Te oy ma'satetic, coxoetic, xchi'uc boch'otic aluben yacanic.

⁵ Te oy jun vinic, vaxaclajuneb xcha'vinic (38) xa jabil stsaquel ta chamel.

⁶ C'alal laj yil Jesús ti te mochole, la sna' ti ep xa jabil jech ip cha'ye, jech la sjac'be: —¿Me chac'an chacol? —xut.

⁷ Itac'ov li jchamele: —Quits'in, mu'yuc boch'o oy cu'un ti xu' ta stic'un ochel c'alal ta xich' yuq'uilanel li vo'e. C'alal ta xcac' persa chibate, oy xa'ox boch'o te ochem ta jta —xi.

⁸ Li Jesuse jech laj yalbe: —Lican, balo batel apop, xanovan —xut.

⁹ Ta ora no'ox icol li vinique. La sbal li spope, ixanov batel. Ja'o sc'ac'alil cuxub o'ntonal ti jech ic'ot ta pasele.

¹⁰ Li j'abteletic yu'un judioetique jech laj yalbeic li vinic ti colem xae: —Li'i ja' sc'ac'alil ta jcux co'ntontic. Mu smeloluc ti chavich' batel apope —xutic.

¹¹ Itac'ov li vinique: —Li boch'o la scoltaune ja' stuc jech laj yalbun: ‘Ich'o batel apop, xanovan’, xiyutun —xi.

¹² Jech la sjac'beic li vinique: —¿Boch'o ti laj yalbot: ‘Balo apop, xanovan’, xayutote? —xutic.

¹³ Li vinic ti colem xae muc xotquin li boch'o icoltavane, yu'un li Jesuse ta ora no'ox icapij ta stojol epal cristianoetic.

¹⁴ Ts'acal to li Jesuse te la sta ta ch'ulna li vinique. Jech laj yalbe: —Q'uelavil, colemot xa. Pero mu xa me xasa' amul, yu'un naca me ech'em to chopol c'usi chtal ta atojol —xut.

¹⁵ Li vinique bat yalbe j'abteletic yu'un judioetic ti ja' icoltaat yu'un li Jesuse.

¹⁶ Ja' yu'un li j'abteletic yu'un judioetique te lic scontrainic li Jesuse; solel tsc'an ta smilic o ta scoj ti jech la spas ta sc'ac'alil cuxub o'ntonale.

¹⁷ Li Jesuse jech laj yalbe li j'abteletic yu'un judioetique: —Li Jtote ta to x'abtej. Jech ta xi'abtej ec li vu'une —xut.

¹⁸ C'alal laj yal jech li Jesuse, yo'to isoc sjolic o li j'abteletic yu'un judioetique; solel tsc'an ta smilic o li Jesuse. Muc ja'uc xa no'ox ta scoj ti muc xchabi li sc'ac'alil cuxub o'ntonale; ja' ta scoj noxtoc ti laj yal ti ja' Stot li Diose. Yu'un laj xa sco'lajes sba jech chac c'u cha'al Dios.

Oy svu'el sventa chac' cuxlejal sbatel osil li Xnich'on Diose

¹⁹ Li Jesuse jech laj yalbe: “Jamal chacalboxuc ava'yic, vu'un li Xnich'onun Diose mu'yuc c'usi xu' cu'un ta jpas jtuc; ja' no'ox li c'usi tspas chquil li Jtote, ja' jech ta jpas ec.

²⁰ Li Jtote lec sc'anojun, ja' yu'un chiyac'bun quil scotol li c'usi ta spase. Ech'em to muc'tic sq'uelubil chiyac'bun jpas. Li vo'oxuque toj ch'ayel chc'ot avo'ntonic yu'un.

²¹ Jech chac c'u cha'al ta xcha'cuxes animaetic li Jtote xchi'uc ti ta xac'be xcuxlejalique, ja' no'ox jechun ec, xu' ta jcha'cuxes li boch'o ta jc'an ta jcha'cuxese; ta xcac'be xcuxlejal ec.

²² Yu'un li Jtote muc ja'uc ta xchapan stuc li cristianoetique. Vu'un yac'ojbun jventain xchapanel, vu'un li Xnich'onune.

²³ Yu'un jech ac'o ich'atcun ta muc', jech chac c'u cha'al ich'bil ta muc' li Jtote. Li boch'otic mu xiyich'icun ta muc' vu'un li xnich'onune ja' mu xich'ic o ta muc' li Jtot ti la stacun tale.

²⁴ “Jamal ta xcalboxuc ava'yic. Li boch'otic ta xa'ibun jc'ope, me ta xch'unic li boch'o la stacun tale, oy xcuxlejalic ta sventa sbatel osil. Mu'yuc xa chbat stoj smulic, yu'un icom xa yu'unic li lajele. Ijelovic xa ta sventa cuxlejal.

²⁵ Jamal ta xcalboxuc ava'yic, vu'un li Nich'onilune, ta to sta yorail, ta melel ista xa yorail chiya'ibicun jc'op li boch'otic chamenique. Li boch'otic ta xa'yic jc'ope ta xcuxiic.

²⁶ Jech chac c'u cha'al oy cuxlejal sbatel osil ta stojol li Jtote; ja' no'ox jech yac'ojbun cuxlejal sbatel osil ta jventa ec.

²⁷ Jech noxtoc, yac'ojbun jvu'el sventa chichapanvan, yu'un Xnich'on Cristiano lic'ot.

²⁸ Mu me toj ch'ayeluc ta xc'ot avo'ntonic ta sventa ti jech laj calboxuque. Yu'un ta to me sta sc'ac'alil ta xa'ibicun jc'opojel scotol li boch'otic oyic ta smuquinalique.

²⁹ Li boch'otic lec c'usi la spasique ta xcha'cuxiic loq'uel sventa chcuxiic sbatel osil. Yan li boch'otic chopol c'usi la spasique ta xcha'cuxiic loq'uel sventa chbatic ta tojob mulil.

Li Jesuse laj yal li boch'otic testigo yu'une

³⁰ “Li vu'une mu'yuc c'usi xu' cu'un ta jpas jtuc. Ti c'u x'elan tsc'an chichapanvan li Jtote, ja' jech ta jpas. Tuc' chapanel chcac', yu'un ma'uc ta jpas c'usi lec chca'ay jtuc; ja' ta jpas c'usi oy ta yo'nton li Jtot ti la stacun tale.

³¹ Ti vu'cun no'ox jtuc ta xcal jc'oplale, xu' mu meleluc c'usi chcal ti jechuque.

³² Pero oy yan boch'o chiyalbun jc'oplal. Li jc'oplal ta xalbune jna'oj ti ja' melele.

³³ Jech ec li vo'oxuque laj ataquic ta jaq'uel ta stojol li Juan j'ac'vanej ta vo'e. Li jc'oplal laj yalbune ja' melel.

³⁴ Pero mu yu'unuc ja' tsots sc'oplal chca'ay ti cristiano chiyalbun jc'oplale. Ti jech chacalboxuque, ja' no'ox sventa ac'o ach'unic, yu'un jech xu' chacolic.

³⁵ Li Juane ja' toj ic'ot avu'unic, jech lec sacjaman laj avilic yu'un. Pero jliquel no'ox lec laj ava'yic li c'usi laj yalboxuque; jliquel no'ox xcuxet avo'ntonic yu'un.

³⁶ Li Juane ja' no'ox laj yalboxuc ava'yic jc'oplal. Pero li vu'une ta sventa cabtel ta xac'bun jpas li Jtote ja' ta svinajes ti ja' tacbilun tal yu'une.

³⁷ Jech ec li Jtot ti la stacun tale, ja' ta xalbun jc'oplal noxtoc. Mu'yuc bu ava'yojic c'u x'elan chc'opoj; mu'yuc avilojic c'u x'elan.

³⁸ Jech noxtoc me jbeluc sc'op mu xu' chc'ot ta avo'ntonic, yu'un mu xach'unic ti vu'un tacbilun tal yu'une.

³⁹ Chaq'uelilanic li sc'op Diose; chanopic ti jech chacuxiic o sbatel osile. Pero li sc'op Diose ja' vu'un te chiyalbun jc'oplal noxtoc.

⁴⁰ Pero mu xac'an xatalic ta jtojol ti jech xu' chacuxiic o sbatel osile.

⁴¹ “Li vu'une mu ja'uc tal jsa' ich'el ta muc' yu'un li cristianoetique.

⁴² Li vu'une xcotquin c'u x'elan avo'ntonic. Jna' ti mu'yuc ono'ox ac'anojic li Diose.

⁴³ Li vu'une talemun ta sventa li Jtote, pero mu xavich'icun ta muc'. Yan me oy boch'o jech no'ox ta xtal ta yo'nton stuque, ja' chavich'ic ta muc'.

⁴⁴ Mu xu' avu'un chach'unic, yu'un ja' no'ox chac'anic ti lec ac'oplalic yu'un li cristianoetique. Mu ja'uc chac'anic ti lecuc ac'oplalic yu'un li Dios ti jun no'oxe.

⁴⁵ Mu me xanopic ti vu'un ta jtic'boxuc amulic ta stojol li Jtote. Li boch'o xu' chc'ot ta jtic'mulil avu'unique ja' li Moisese; ja' li boch'o apatoj avo'ntonic yu'une.

⁴⁶ Ti ach'unicuc c'usi ts'ibabil comel yu'une, chach'unicun ec ti jechuque, yu'un ja' jc'oplal la sts'iba comel li Moisese.

⁴⁷ Me mu xach'unic c'usi ts'ibabil comel yu'un li Moisese, ¿c'uxi xu' chach'unbicun li jc'ope?”, x'utatic yu'un Jesús li j'abteletique.