San Juan 2 - Bible in Tzotzil de Chenalhó with Deuterocanon

I'ay ta q'uel nupinel ta lum Caná li Jesuse

¹ Ta yoxibal c'ac'al, la spasic q'uin nupinel ta lum Caná te ta Galilea banamil. Te oy ec li sme' Jesuse.

² Li Jesús xchi'uc yajchanc'optaque i'ic'atic ta sq'uelel nupinel ec.

³ C'alal te oyic ta q'uine, ilaj li ya'lel ts'usub yu'unique. Li Jesuse jech i'albat yu'un li sme'e: —Ilaj li ya'lel ts'usub yu'unique —x'utat.

⁴ Li Jesuse jech laj yalbe: —Ants, ¿c'u yu'un ti vu'un tal avalbune? yu'un mu'yuc to ta sta sc'ac'alil chcac' ta ilel li jvu'ele —xut.

⁵ Li sme'e jech bat yalbe li j'ac've'liletique: —Ch'unic me scotol li c'usitic ta xalboxuque —xut.

⁶ Te oy vacbej yav vo' pasbil ta ton, ja' sventa tslecubtas sbaic jech chac c'u cha'al stalel tspasic li judioetic c'alal tspoc sc'obique. Li jujubej yav vo'e x'och chib oxib muc'tic q'uib vo'.

⁷ Li Jesuse jech laj yalbe li j'ac've'liletique: —Nojesic lec scotol li yav vo'e —xut. Jech lic snojesic lec c'alal ta sti'.

⁸ Li Jesuse jech laj yalbe: —Lupic batel, bat ac'beic li boch'o sventainoj q'uine —xut. Jech la slupic batel.

⁹ Li boch'o sventainoj q'uine la spas ya'ay li vo' ti ic'ataj ta pasem ya'lel ts'usube, pero mu sna' bu ital. Yan li j'ac've'liletique lec sna'ic ti vo' la slupic loq'uele. Li boch'o sventainoj q'uine laj yic' li boch'o ta xnupine,

¹⁰ jech laj yalbe: —Scotol li cristianoetique ja' ba'yuc chaq'uic ta uch'el ti bu toj lec li ya'lel ts'usube. C'alal me ep xa laj yuch'ique, ja'o chaq'uic ta uch'el ti bu jutuc xa no'ox leque. Li vo'ote ja' laj anac' ti bu leque; ta slajeb xa chavac' ta uch'el —xut.

¹¹ Le'e ja' sba sq'uelubil stsatsal laj yac' ta ilel Jesús ti c'alal te oy ta Caná ta Galilea banamile. Jech ivinaj o slequilal yutsilal. Jech i'ayin lec xch'unojel yo'ntonic ta stojol li yajchanc'optaque.

¹² Ts'acal to iyal batel ta Capernaum li Jesuse. La xchi'in batel li sme'e xchi'uc li xchi'iltaque xchi'uc li yajchanc'optaque. Pero mu'yuc ep c'ac'al te ijoc'tsajic.

La sloq'ues jbolomaletic ta yamaq'uil ch'ulna li Jesuse

¹³ C'alal jutuc xa'ox sc'an sta sc'ac'alil q'uin Coltael cu'uncutic, vu'uncutic li judiouncutique, ibat ta Jerusalén li Jesuse.

¹⁴ Te oyic ta ch'ulna c'ot sta jchonvacaxetic, jchonchijetic, xchi'uc jchonpalomaetic. Te chotajtic noxtoc jeltaq'uinetic.

¹⁵ Li Jesuse lic sts'ot lec ch'ojon, ja' la sloq'ues o scotol te ta ch'ulna. La sloq'ues c'alal ta chijetic, ta vacaxetic. La sbutq'uinbe xmexaic noxtoc li jeltaq'uinetique; te la stanibe comel li staq'uinique.

¹⁶ Jech laj yalbe li jchonpalomaetique: —Loq'uesic batel scotol li'i. Mu xapasic ta snail ch'ivit li sna Jtote —xut.

¹⁷ Li yajchanc'optaque te ivul ta sjolic ti jech ono'ox ts'ibabil comel ta sc'op Diose: “Ta sventa ti toj tsots sc'oplal chca'ay li anae, jech ta xquich' o contrainel”, xi ono'ox ts'ibabil.

¹⁸ Li j'abteletic yu'un judioetique jech laj yalbeic li Jesuse: —¿C'usi sq'uelubil xu' chavac' quilcutic bu avich'oj avabtel ti jech chapas chac le'e? —xutic.

¹⁹ Itac'ov li Jesuse: —Vuq'uesic li ch'ulna li'i, ta oxib c'ac'al ta jcha'va'an —xut.

²⁰ Jech itac'ovic: —Ta vaquib to yoxvinic (46) jabil imeltsaj li ch'ulna li'i. Li vo'ote chaval ti ta oxib no'ox c'ac'al chacha'va'ane —xutic.

²¹ Li ch'ulna laj yal Jesuse ja' sc'oplal sbec'tal stuc.

²² Ja' yu'un c'alal icha'cuxi ta yoxibal c'ac'al li Jesuse, li yajchanc'optaque ja' to te ivul ta sjolic ti jech ono'ox laj yale. Jech te la xch'unic o ti jech ono'ox ts'ibabil ta sc'op Diose, xchi'uc ti ja' melel li c'usi laj yale.

Li Jesuse xotquinbe yo'nton scotol li cristianoetique

²³ C'alal te oy ta Jerusalén ta yorail q'uin Coltael li Jesuse, ep boch'otic la xch'unic, laj yich'ic ta muc', yu'un laj yilic ti ep sq'uelubil stsatsal la spase.

²⁴ Pero li Jesuse mu'yuc bu la spat yo'nton yu'un, yu'un xotquin scotol.

²⁵ Mu persauc oy boch'o ta xalbe ya'ay c'u x'elan yo'nton li cristianoetique, yu'un li stuque xotquinbe yut yo'nton li cristianoetique.