San Juan 16 - Bible in Tzotzil de Chenalhó with Deuterocanon

¹ “Ti jech laj calboxuc ava'yic scotole, yu'un jech mu xchibaj avo'ntonic ti c'alal chc'ot ta pasele.

² Yu'un ta to snutsoxuc loq'uel ta nail tsobobbailetic. Ta to sta yorail ti oy ta smiloxuque, yu'un tsnopic ti ja' jech tspasbeic yabtel li Diose.

³ Jech tspasic, yu'un mu xotquinic li Jtote, xchi'uc mu xiyotquinicun ec li vu'une.

⁴ Jech chacalboxuc ava'yic, yu'un jech cht'ab ta avo'ntonic ti c'alal yorail chc'ot ta pasele, yu'un calojboxuc xa ono'ox ava'yic. Mu'yuc bu jech laj calboxuc ta sliqueb, yu'un li' to'ox jchi'inojoxuc.

Sc'oplal c'usi yabtel c'alal chtal li Ch'ul Espiritue

⁵ “Pero li' ta orae ta xa xisut batel ta stojol li Boch'o la stacun tale. Me junuc mu'yuc boch'o tsjac'bun avu'unic ti bu chibate.

⁶ Ja' no'ox puru at-o'nton batem ta avo'ntonic ti c'alal jech laj calboxuc ava'yique.

⁷ Pero melel li c'usi chacalboxuque: Ja' sventa alequilalic ti chibate. Yu'un me mu'yuc chibate, mu'yuc chtal ta atojolic li Jpat-o'ntonale. Pero me chibate, vu'un ta jtacboxuc tal.

⁸ C'alal me itale, ja' yabtel ta xac'be yotquinic cristianoetic ti oy smulique, xchi'uc ti tuc' co'nton li vu'une, xchi'uc ti oy chapanel yu'un li smulique.

⁹ Ta xac'be sna'ic ti oy smulique, yu'un mu xixch'unicun.

¹⁰ Ta xac'be sna'ic ti tuc' co'ntone, yu'un chiyic'un muyel ta stojol li Jtote. Mu'yuc xa bu chiyilicun o li' ta banamil.

¹¹ Ta xac'be sna'ic ti oy chapanel yu'un li smulique, yu'un li banquilal jpasmantal li' ta banamile chapanbil xa smul sventa sbatel osil.

¹² “Oy to ep c'usi ta jc'an ta xcalboxuc, pero mu xu' avu'unic ya'yel scotol ta ora.

¹³ C'alal me ital li Ch'ul Espíritu ti ja' Melele, ja' chastojobtasoxuc batel ta sventa scotol li c'usi melele. Yu'un mu ja'uc ta xal c'usi tsc'an stuc; ja' ta xal li c'usitic ta x'ac'bat sna'e. Ja' ta xac'boxuc ana'ic scotol li c'usitic ta to xc'ot ta pasele.

¹⁴ Ja' ta xac'un ta ich'el ta muc', yu'un ja' jc'oplal chiyalbun; vo'oxuc chayac'boxuc ana'ic.

¹⁵ Scotol li c'usi oy yu'un Jtote ja' cu'un ec. Ja' yu'un laj calboxuc ti ja' jc'oplal chiyalbune, xchi'uc ti vo'oxuc chayac'boxuc ana'ique.

Li at-o'ntone chlic c'atajuc ta xcuxetel o'ntonal

¹⁶ “Mu xa epuc c'ac'al li' oyun, jech mu'yuc chavilicun. Ts'acal chavilicun to jayibuc xa no'ox c'ac'al —xi li Jesuse.

¹⁷ Oy jun chib yajchanc'op jech laj yalbe sbaic: —¿C'usi smelol ti jech laj yalbutique: ‘Mu xa epuc c'ac'al li' oyun, jech mu'yuc chavilicun. Ts'acal chavilicun to jayibuc xa no'ox c'ac'al, ja'o ta xisut batel ta stojol li Jtote’, ti xijyututique?

¹⁸ ¿C'usi smelol ti ‘mu xa epuc c'ac'al’, xie? Mu xca'ibetic smelol li c'usi ta xale —xiic.

¹⁹ Li Jesuse la sna' ti tsc'an tsjac'beic smelole, ja' yu'un jech laj yalbe: —Ta jna' ti chajac'be abaic ta sventa ti jech laj cale: ‘Mu xa epuc c'ac'al li' oyun, jech mu'yuc chavilicun. Ts'acal chavilicun to jayibuc c'ac'al’, ti xacutoxuque.

²⁰ Ja' melel li c'usi chacalboxuc ava'yique: Li vo'oxuque ta to xa'oq'uic; ta to xavat avo'ntonic. Yan li cristianoetic li' ta banamile xcuxet no'ox yo'ntonic. Pero ac'o me chavat avo'ntonic li vo'oxuque, chlic c'atajuc ta xcuxetel avo'ntonic.

²¹ Jech chac c'u cha'al c'alal ta xcux jun antse, oy svocol yu'un yorail xa chcux. Pero c'alal me voq'uem xa li yole, mu xa sna' li svocole, yu'un xcuxet xa yo'nton ti oy xa yunin quereme.

²² Ja' no'ox jech ec li vo'oxuque, li' ta orae chavat avo'ntonic, pero ta to xajq'ueloxuc. Jech xcuxet no'ox avo'nton chava'yic; mu'yuc boch'o xu' chaspojboxuc o li xcuxetel avo'ntonique.

²³ “C'alal jech chc'ot ta pasele, mu'yuc xa c'usi chajac'bicun. Ja' melel li c'usi chacalboxuc ava'yique: Scotol c'usi chac'anbeic ta jbi li Totile chayac'boxuc.

²⁴ Tana mu'yuc to c'usi ac'anojbeic ta jbi. C'anbeic, jech chayac'boxuc. Jech toj xcuxet no'ox avo'ntonic scotol c'ac'al.

“Tsalbil xa cu'un li c'usitic sventa banamile”, xi li Jesuse

²⁵ “Scotol li c'usi laj calboxuque ta lo'il c'op no'ox laj calboxuc. Pero ta sta yorail ti muc xa ta lo'il c'opuc chajc'opanoxuque; jamal chacalboxuc ava'yic sc'oplal li Jtotic Diose.

²⁶ Ta sc'ac'alil le'e, xu' xa chac'anic ta jbi li c'usi chac'anique; mu'yuc chacalboxuc ti vu'un to ta jc'anboxuc ta stojol li Totile.

²⁷ Yu'un li Jtotic Diose lec sc'anojoxuc, yu'un lec ac'anojicun ec, xchi'uc laj ach'unic ti te liquemun tal ta stojole.

²⁸ Te lilic tal ta stojol Jtotic Dios ti liyal tal li' ta banamile. Li' ta orae ta jcomtsan noxtoc li banamile; ta xa xisut batel ta stojol li Jtotic Diose —xi li Jesuse.

²⁹ Li yajchanc'optaque jech laj yalbeic: —Li' ta orae jamal xa laj avalbuncutic; muc xa ta lo'il c'opuc chac'opoj.

³⁰ Laj xa jna'cutic ti oy ta aba ta asat scotole. Muc persauc oy boch'o chayalbot. Jech la jch'uncutic o ti te liquemot tal ta stojol li Diose —xutic.

³¹ Itac'ov li Jesuse: —¿Me laj xa ach'unic ta melel?

³² A'yo ava'yic, ja' xa yorail ta xapuc abaic batel ta jujuntal. Jtuc xa chacomtsanicun. Pero mu jtucuc chicom; li' xchi'inojun li Jtotic Diose.

³³ Ti c'u yepal laj calboxuque, ja' sventa ti ac'o junuc o avo'ntonic ta jtojole. Li' ta orae oy avocolic li' ta banamil, pero pato avo'ntonic ti tsalbil cu'un li c'usi sventa banamile —xi li Jesuse.