San Juan 14 - Bible in Tzotzil de Chenalhó with Deuterocanon

Li Jesuse ja' be sventa chijc'ot ta stojol Dios

¹ Li Jesuse jech laj yalbe li yajchanc'optaque: —Mu me xlo'ilaj avo'ntonic. Ch'unic ti chascoltaoxuc li Diose, jech ch'unic ti chajcoltaoxuc eq'ue.

² Te ta sna li Jtote, ep ta c'ol na te oy. Ti manchuc jech quiloje, mu jechuc ta xcalboxuc ti jechuque. Ja' yu'un ba'yuc chibat, chbat jchapan bu chac'otic li vo'oxuque.

³ Me chibate, xchi'uc me ichapaj cu'un li avavilique, chisut tal yan velta; vu'un jtuc chtal quic'oxuc muyel, yu'un jech xu' te chac'otic ec ti bu oyune.

⁴ Xana'ic xa ti bu chibate; xana'ic xa bu xbat li sbelale —xut.

⁵ Li Tomase jech laj yal: —Cajval, mu jna'cutic bu chabat. ¿C'uxi xu' ta jna'becutic bu xbat sbelal? —xut.

⁶ Li Jesuse jech laj yal: —Vu'un li beune, vu'un li melelune, vu'un li cuxlejalune. Mu'yuc boch'o xu' chbat ta stojol Jtot ti me mu xtal ta jtojole.

⁷ Me xavotquinicun xa leque, jech xavotquinic xa ec li Jtote. Li' ta orae xavotquinic xa; laj xa avilic —xi.

⁸ Li Felipee jech laj yal: —Cajval, ac'bun cotquincutic li Jtotic Diose jech cux xi co'ntoncutic —xut.

⁹ Li Jesuse jech laj yalbe: —Ep xa c'ac'al li' jchi'inojoxuc. ¿Me mu to xavotquinun, Felipe? Li boch'otic laj xa yilicune laj xa yilic o li Jtote. ¿C'u yu'un chavalbun: ‘Ac'bun cotquincutic li Jtotic Diose’, xachi?

¹⁰ ¿Me mu xach'un ti vu'un jun oyuncutic jchi'uc li Jtote? Li c'usi ta xcalboxuc ava'yique mu jc'opuc jtuc. Ja' sc'op li Jtot ti li' jchi'uque. Ja' stuc tspas li abteletic ta jpase.

¹¹ Ch'unic ti vu'un jun oyuncutic jchi'uc li Jtote. Me mu xach'unique, ch'unic ta sventa li c'usitic ta jpas chavilique.

¹² Jamal chacalboxuc ava'yic, li boch'o ta xch'unicune, xu' chlic spasic ec jech chac c'u cha'al ta jpase. Toj ven tsotsic c'usitic chlic spasic, yu'un li vu'une ta xa xibat yo' bu oy li Jtote.

¹³ Scotol c'usiuc chac'anbeic ta jbi li Totile, vu'un ta xcac'boxuc, yu'un jech ich'bil ta muc' ac'o c'otuc ta jventa li Totile.

¹⁴ Me oy c'usi chac'anic ta jbie, vu'un ta xcac'boxuc.

Laj yal Jesús ti ta stac tal li Ch'ul Espiritue

¹⁵ “Me ac'anojicune, chach'unbicun scotol li jmantaltaque.

¹⁶ Vu'un ta jc'anbe vocol Jtot ti ac'o yac'boxuc tal li Jpat-o'ntonale, yu'un jech j'ech'el te chaxchi'inoxuc o.

¹⁷ Ja' li Ch'ul Espíritu ti ja' Melele. Li cristianoetique mu xu' ta xich'ic, yu'un mu xilic, xchi'uc mu xotquinic. Yan li vo'oxuque chavotquinic, yu'un te chnaqui ta atojolic; j'ech'el te ch-och o ta avo'ntonic.

¹⁸ “Muc me'on ololuc chacomic cu'un; ta xtal jchi'inoxuc.

¹⁹ Mu xa jaluc li' oyun. Li cristianoetic li' ta banamile mu'yuc xa bu chiyilicun o. Pero li vo'oxuque ta to xavilicun, yu'un li vu'une cuxulun o; ja' no'ox jech chacuxiic ec li vo'oxuque.

²⁰ C'alal me la sta sc'ac'alil chtal li Ch'ul Espiritue, jech chach'unic o ti jun oyun jchi'uc li Jtote, xchi'uc ti jun oyutic eq'ue, xchi'uc ti te oyun o ta atojolique.

²¹ Li boch'o te oy ta yo'nton li jmantaltaque, me ta xch'une, le'e ja' li boch'o sc'anojicune. Li boch'o sc'anojicune ta xc'anatic yu'un ec li Jtote. Jech jc'anojic ec; ta xcac' jba ta ilel ta stojolic —xi li Jesuse.

²² Jech laj yal li Judase, pero mu ja'uc li Judas Iscariotee: —Cajval, ¿c'u yu'un ti vu'uncutic no'ox chavac' aba ta ilel ta jtojolcutique? ¿C'u yu'un mu xavac' aba ta ilel ta stojol ec li cristianoetique? —xut.

²³ Itac'ov li Jesuse: —Li boch'o chisc'anune ta xch'unbun li jc'ope. Jech ta xc'anat yu'un li Jtote. Ta xtal jchi'incutic; te chinaquicutic o ta yo'nton.

²⁴ Yan li boch'o mu xisc'anune mu xch'un li jc'ope. Li c'op laj calboxuc ava'yique, muc vu'cun jc'op; ja' sc'op li Boch'o la stacun tale.

²⁵ “Jech ta xcalboxuc yu'un yo'to li' jchi'inojoxuc.

²⁶ Yan li Jpojvanej ta stacboxuc tal ta jventa li Jtote, ja' li Ch'ul Espiritue. Ja' ta xac'boxuc ana'ic scotol; ja' ta xchanubtasoxuc. Ja' ta svulesboxuc ta ajolic scotol li c'usi laj calboxuque.

²⁷ “Ta xcac'boxuc comel jun avo'ntonic. Li jun o'ntonal oy cu'une ja' ta xcac'boxuc comel. Li jun o'ntonal chcaq'ue mu jechuc jech chac c'u cha'al chac' li cristianoetique. Ja' yu'un mu me xlo'ilaj avo'ntonic; mu me xaxi'ic.

²⁸ Laj xa ava'yic ti jech laj calboxuque: ‘Ta xibat, pero ta to xtal jchi'inoxuc. Me ac'anojicune, xcuxet no'ox avo'ntonic ti chibate. Yu'un ja' te chisut batel ta stojol li Jtote. Yu'un ja' ech'em smuc'ul jech chac c'u cha'al li vu'une’, xacutoxuc.

²⁹ Jech ta xcalboxuc, yu'un yo'to mu'yuc chc'ot ta pasel chibat, yu'un jech xu' chach'unic ti c'alal chc'ot ta pasele.

³⁰ “Mu xa xu' jal ta jc'opanoxuc, yu'un ta xa xtal li banquilal jpasmantal li' ta banamile, pero mu'yuc c'usi xu' yu'un chispasbun.

³¹ Ja' no'ox sventa ac'o yilic scotol cristianoetic ti lec jc'anoj li Jtote, ti ja' ta jch'unbe smantale. “Licanic, loc'cutic xa batel —xi li Jesuse.