Josué 7 - Bible in Tzotzil de Chenalhó with Deuterocanon

La sta smul Acán

¹ Pero oy jun vinic liquem ta jchop yu'un Judá, Acán sbi. Ja' xnich'on li Carmie; ja' smomnich'on Zabdi; ja' smuc'ta moltot li Zerae. Li Acane la stam tal li c'usi albil sc'oplal chich' ulesel oe, ja' yu'un li Muc'ul Diose i'ilin ta stojol li israeletique.

Li israeletique itsalatic yu'un lum Hai ta scoj smul li Acane

² C'alal te oyic ta Jericó li israeletique, li Josuee la stac batel jayibuc viniquetic ta lum Hai te ta sloq'ueb c'ac'al yu'un Betel ta nopol Bet-avén. Jech laj yalbe batel: “Batanic, bat q'uelic tal lec c'u x'elan li banamil tee”, xut. Jech ibat sq'uelic tal c'u x'elan li lum Haie.

³ C'alal isutic tale, jech vul yalbeic li Josuee: “Mu persauc jcotoltic chbat jcontraintic li lum Haie yu'un mu'yuc ep li yajvaltaque. Xu' no'ox ac'o batuc cha'mil (2,000), o me oxmil (3,000) viniquetic; lec xu' yu'unic o”, xiic.

⁴ Jech oxmil (3,000) no'ox imuyic batel ta Hai; bat smilbeic li yajvale. Pero itsalatic yu'un li cristianoetic tee; nutsbil isutic tal.

⁵ Imilatic tal vaclajuneb xcha'vinic (36) li israeletique. Li yantique nutsbil iliquic ta sti' coralton yu'un li lume c'alal to ta Sebarim. Te la smilic comel ta yalubaltic. Ja' yu'un li israeletique ilaj stsatsal yo'ntonic; solel ichibaj yo'ntonic.

⁶ Li Josué xchi'uc li banquilaletic yu'un israeletique la sli' sc'u'ic; laj yac' pucuc ta sjolic. Bat spatan sbaic ta stuq'uil xcaxail smantal Muc'ul Dios; te patalic o c'alal to ich'ay c'ac'al.

⁷ Li Josuee jech laj yal ta stojol li Muc'ul Diose: —Ay, Cajval, ¿c'u yu'un ti laj avac' jelovcuncutic tal li' ta jot uc'um Jordán, yu'un tal avac'uncutic ta milel jcotolcutic yu'un li amorretique? Ja' lec ti teuc no'ox licomcutic ta jot uc'um Jordane.

⁸ Ay, Cajval, ¿c'usi ta xcal ta sventa ti nutsbil isutic tal yu'un cajcontracutic li jchi'iltaque?

⁹ Me laj ya'yic scotol li canaanetic li'i xchi'uc li yan jnaclumetic li' ta banamile, xu' ta xtal yulesuncutic o jcotolcutic. J'ech'el chtu'p o jc'oplalcutic li' ta banamil. ¿C'usi chc'ot ta pasel ta sventa ti vinajem ac'oplal ech'em amuc'ule? —xut.

¹⁰ Itac'ov li Muc'ul Diose: —Lican xa. ¿C'usi chapas ti te patalot o ta banamile?

¹¹ Li achi'iltaque staoj xa smulic ta jtojol, yu'un muc xch'unbicun li c'usi la jchapan ta stojolique yu'un la stamic tal li c'usi albil xa sc'oplal cu'un chich' ulesel oe. Laj yelc'anic tal; i'epalc'opoj xa; te xa snac'ojic yo' bu oy li c'usitic oy yu'unique.

¹² Ja' ta scoj ti mu xa xu' avu'un chatsalic li avajcontraique. Persa nutsbil chasutic tal yu'un li avajcontraique, yu'un vo'oxuc tsc'an chc'ot ta atojol atuquic li vocole. Me mu xaloq'uesic li c'usi chopol te oy ta atojolique, mu'yuc xa bu chajchi'inoxuc o.

¹³ Lican, tsobo scotol li achi'iltaque. Albo ya'yic ti ac'o xchapan sbaique; ac'o slecubtas sbaic ta sventa oc'om. Scotolic ac'o tal sva'an sbaic ta jtojol, vu'un li Muc'ul Diosun avu'unique. Jech chcalbeic li achi'iltaque: ‘Vo'oxuc israeletic, te oy ta atojolic li c'usi albil sc'oplal chich' ulesel oe. Me mu xaloq'ues ta atojolique, mu xu' avu'un chatsalic o li avajcontraique’, xcut chcalbeic.

¹⁴ Oc'om ac'o taluc scotolic ti jaychopoxuque. Li jchop bu ta xcac' ana'e, ac'o talicuc ta jujuchop sbiic. Li jchop sbiic bu chcac' ana'e, ac'o talicuc xchi'uc yalab xnich'nabic. Li yalab xnich'nab bu chcac' ana'e, ac'o talicuc ti jayib viniquetic yu'unique.

¹⁵ Li boch'o yich'oj li c'usi albil xa sc'oplal cu'un chich' ulesel oe, ac'o yich' chiq'uel xchi'uc yalab xnich'nab, xchi'uc scotol c'usitic oy yu'un, yu'un muc xch'un li c'usi chapanbil cu'une, xchi'uc ja' la spas te ta atojolic li c'usi mu stac' chapasic oe —x'utat li Josuee.

La stoj smul li Acane

¹⁶ Ta yoc'omal sob ilic li Josuee; laj yic'an tal ta jujuchop li xchi'iltaque. Li Diose laj yac' ta na'el ti ja' xa li jchop liquemic ta Judae.

¹⁷ Ja' yu'un li Josuee laj yal ti xquechcun ac'o jelovicuc ta jujuchop sbiic li jchop liquemic ta Judae. Ja' te ivinaj senyail ta stojol li jchop sbiic Zeraetique. Laj yic'an noxtoc li yalab xnich'nab Zerae, ja' li viniquetique. Ja' te ic'ot ta stojol jun vinic, Zabdi sbi.

¹⁸ Te inopajic tal ta jujuntal noxtoc li viniquetic xnich'nab Zabdie. Ja' te ivinaj senyail ta stojol li Acane, ja' li xnich'on Carmie, ja' li smomnich'on Zabdie, ja' muc'ta moltotil yu'unic li Zerae. Ja' te liquemic ta jchop yu'un Judá.

¹⁹ Li Josuee jech laj yalbe li Acane: —Quits'in Acán, ac'o ta ich'el ta muc' li Muc'ul Dios cu'untic, vu'utic li israelutique. Ac'o vinajuc slequilal avu'un. Jamal xavalbun li c'usi laj apase; mu me xamuc ta avo'nton —xut.

²⁰ Itac'ov li Acane: —Ta melel jamal ta xcal ti jtaoj xa jmul ta stojol li Muc'ul Diose, ja' li Dios cu'untic, vu'utic li israelutique. Li jmule ja' li'i:

²¹ C'alal i'och ta jc'obtic scotol li c'usitic oy te ta Jericoe, te laj quil jlic natil c'u'il lec c'upil sba, liquem tal ta Babilonia, xchi'uc chib ciento (200) ta sep saquil taq'uin, xchi'uc jpech c'anal taq'uin ech'em ta o'lol kilo yalal. Ipich'aj co'nton yu'un jech laj quich' tal. Te vul jmuc ta banamil ta o'lol yut jcarpana; te la jnet'u lec noxtoc li taq'uine —xi.

²² Li Josuee ta ora la stac batel jayibuc viniquetic ta scarpana li Acane. Te mucul ta o'lol yut na la staic tal scotol c'alal ta saquil taq'uin.

²³ Laj yich'ic batel ta stojol li Josuee xchi'uc ta stojol scotol li israeletique; te bat yaq'uic ta stojol Muc'ul Dios.

²⁴ Li Josué xchi'uc scotol israeletique laj yiq'uic batel ta stenlejaltic ta Acor li Acane xchi'uc li jpech c'anal taq'uine, li c'u'ile, li saquil taq'uine, xchi'uc c'alal ta squeremetic stsebetic, xchi'uc xvacax, xchij, sburotac, xchi'uc scotol li c'usitic oy yu'une.

²⁵ Li Josuee jech laj yalbe: —¿C'u yu'un laj avac' taluc li vocol ta jtojoltique? Li' ta orae li Muc'ul Diose vo'ot chayac'bot acuch scotol li vocol li' laj avich' tal ta jtojoltique —xut. C'alal laj yal jeche, scotol li israeletique lic smilic ta ton li Acane, xchi'uc yajnil xnich'nab, xchi'uc li c'usitic oy yu'une. Ts'acal la xchiq'uic ta c'oc'.

²⁶ Ja'o te lic slatsic ep ton; te to oy o c'alal to tana. Ja' yu'un li banamil tee stenlejaltic yu'un Acor xi sbi c'alal to tana. Ja' to jech ilecub o yo'nton Muc'ul Dios ta stojol li israeletique.