Josué 5 - Bible in Tzotzil de Chenalhó with Deuterocanon

La spas scarpanaic ta Gilgal li israeletique

¹ Scotol li ajvaliletic yu'un amorretic te nacajtic ta jot uc'um Jordán ta stuq'uil smaleb c'ac'ale xchi'uc li ajvaliletic yu'un canaanetic te nacajtic ta nopol muc'ta Nab Mediterraneoe laj ya'yic c'u x'elan la staquijes uc'um Jordán Muc'ul Dios ti c'alal ijelovic li israeletique. C'alal laj ya'yique, bats'i ep ixi'ic; solel mu sc'an stsac sbaic ta pleito xchi'uc li israeletique.

² Ja'o yorail te ic'opanat yu'un Muc'ul Dios li Josuee. Jech i'albat: “Pasbo lec ye tonetic; ac'bo yich'ic circuncisión li achi'iltac ti mu'yuc to yich'ojique”, x'utat.

³ Li Josuee lic spasbe lec ye jayibuc tonetic; ja' itun ta sventa xcuchilo. Ja' la xtuch'be o snuculil sni' sc'unilic li xchi'iltac c'alal te oyic ta vits Aralote.

⁴ Ti jech la xtuch'be snuculil sni' sc'unilic xchi'iltac li Josuee, yu'un ichamic xa'ox ta xocol banamil scotol li viniquetic ti xu' xa'ox yu'unic paspleito c'alal iloq'uic tal ta Egiptoe.

⁵ Ac'o me yich'ojic circuncisión scotol li boch'otic iloq'uic tal ta Egipto banamile, pero li boch'otic ts'acal ivoq'uic tal ta bee mu'yuc to yich'ojic.

⁶ Ta sventa ti cha'vinic (40) jabil ixanovic tal ta xocol banamil li israeletique, jech ichamic xa scotol li boch'otic xu' xa'ox yu'unic pleito c'alal iloq'uic tal ta Egiptoe. Yu'un la sbajbeic smantal li Muc'ul Diose, ja' yu'un li Diose laj yal ta jamal ti mu'yuc ch-ochic o ta banamil ti bu yalojbe ono'ox smoltotic ta vo'one chac'bee; ja' li jun banamil ti bu ta xloc' ep ya'lel xchu' vacax, xchi'uc pom jech chac c'u cha'al ta xloc' vo'e.

⁷ Ja' yu'un li nich'naletic ti ja' xa xq'uexol stot icomic yu'un li Diose, laj yac'be yich' circuncisión li Josuee yu'un mu'yuc to yich'ojic tal circuncisión ta be.

⁸ C'alal laj yich'ic circuncisión scotolique, te to icom xcux yo'ntonic ta scarpanaic, ja' to ti c'alal icolic leque.

⁹ Li Muc'ul Diose jech laj yalbe li Josuee: “Ta sventa li circuncisión laj avich'ique, laj xa jloq'uesboxuc o ta atojolic li na'leel laj yac'boxuc egiptoetic c'alal smozoinojoxuc to'oxe”, xut. Ja' yu'un Gilgal laj yac'beic sbi li banamile, ja' jech sbi o c'alal to tana.

¹⁰ Li israeletique te la spas scarpanaic ta Gilgal. Ta xchanlajunebal c'ac'al yochel li u stsacojique ta sbatel c'ac'al la spasic q'uin Coltael, te ta stenlejaltic Jericó.

¹¹ Ta sc'ac'alil le'e la sve'ic pan ti mu'yuc yich'oj svolesubil xch'ute, xchi'uc bacuben bec' trigo. Ta yoc'omale ja' xa lic sve'ic li c'usitic chch'i ta banamile.

¹² Ja'o te iquechaj li manavaj ch-ac'batic to'ox tale. Ja' xa lic sve'ic li c'usitic chloc' te ta Canaán banamile.

Li Josuee la sc'opan sbaic xchi'uc banquilal soldado yu'un Dios

¹³ C'alal ja'o te va'al ta nopol Jericó li Josuee, laj yil te va'al ta stuq'uil jun vinic yich'oj jun espada. Li Josuee inopaj batel; jech la sjac'be: —¿Me vu'uncutic tal acoltauncutic, o me ja' tal acolta li cajcontracutique? —xut.

¹⁴ Itac'ov li vinique: —Mu'yuc boch'o tal jcolta jchopuc. Li vu'une ja' no'ox talemun jech chac c'u cha'al banquilal yajsoldado li Muc'ul Diose —xi. C'alal laj ya'ay li Josuee, lic squejan spatan sba ta banamil ta stojol, jech la sjac'be: —Cajval, ¿c'usi chac'an chavalbun vu'un li avajtunelune? —xut.

¹⁵ Itac'ov li banquilal soldado yu'un Muc'ul Diose: —Loq'ueso axonob, yu'un li banamil bu va'alote ts'u'iltasbil cu'un —x'utat. Li Josuee la xch'un.