Josué 23 - Bible in Tzotzil de Chenalhó with Deuterocanon

La staq'ui scotol xchi'iltac li Josuee

¹ C'alal ep xa'ox c'ac'al i'ac'bat xcux yo'ntonic ta pleito yu'un Muc'ul Dios li israeletique, c'alal jun xa yo'ntonique, li Josuee bats'i mol xa'ox.

² Jech lic yic'an scotol li israeletique, xchi'uc li moletic, li banquilaletic, li jchapanvanejetic, xchi'uc li j'abteletic yu'unique, jech laj yalbe: “Vu'une molun xa, laj xa yipal cu'un.

³ Li vo'oxuque laj avilic scotol c'usi la spas Muc'ul Dios ta stojol li muc'tiquil lumetic c'alal la scontrainutique. Ja' stuc Dios la stsalboxuc scotol.

⁴ Ti jaychopoxuque, vu'un la jvoc'boxuc ta canal tajimol li yosilalic li'i. Ma'uc no'ox la jvoc'boxuc ti bu jpojojtic xae; la jvoc'boxuc noxtoc ti bu sc'an to pojele, ti te xlic ta uc'um Jordán c'alal to ta muc'ta Nab Mediterráneo ta smaleb c'ac'ale.

⁵ Li Muc'ul Dios cu'untique ja' ta snutsboxuc loq'uel scotol li yajvaltaque, jech vo'oxuc chavich'ic o comel jech chac c'u cha'al yaloj ono'oxe.

⁶ “Aq'uic me persa xch'unel spasel scotol li c'usi ts'ibabil comel ta svunal mantaletic yu'un li Moisese. Xquechet xach'unic spasel scotol.

⁷ Mu me jmojuc c'usi xapas achi'uquic li cristianoetic ti li' to nacajtic comen ta atojolique. Mu me xavich'ic ta muc' li diosetic yu'unique; mu me xat'abbeic sbi ti c'alal oy c'usi chavalique; mu me xatunic yu'un.

⁸ Ja' no'ox xavich'ic o muc' li Muc'ul Dios cu'untic jech chac c'u cha'al chapasic li' ta orae.

⁹ Yu'un li Muc'ul Diose ja' la stsalboxuc scotol li yajval banamiletic ti toj tsotsique, ti toj simaronique. Ta sliqueb xchi'uc c'alal to tana mu'yuc boch'o xastsaloxuc o.

¹⁰ Manchuc me junoxuc no'ox, xu' avu'un chanutsic batel jmil, yu'un ja' stuc Muc'ul Dios ta stsalboxuc jech chac c'u cha'al yaloj ono'oxe.

¹¹ Ja' yu'un q'uelo me abaic lec li vo'oxuque; ja' no'ox me xavich'ic o ta muc' li Muc'ul Dios cu'untique.

¹² Pero me chacomtsanic li Diose, me ja' chaco'lajes avo'nton achi'uquic li boch'otic te to nacajtic comen ta atojolique, me chlic nupinan achi'uquique,

¹³ na'ic me ti mu'yuc chasnutsboxuc loq'uel ta atojolic li Muc'ul Diose. Ja' no'ox chlic stunesboxuc sventa ayacubilic, yu'un ac'o yalanic ta lum. Xchi'uc ja' snuculal apatic, ja' xchamel asatic chc'ot, jech cha'ulic o te ta alequil banamilic ti laj yac'boxuc Muc'ul Diose.

¹⁴ Li vu'une po'ot xa chicham. Pero ta jc'an ac'o c'otuc lec ta ajol ta avo'ntonic ti ic'ot ta pasel scotol li c'usi yalojboxuc Muc'ul Dios cu'untique. Me jbeluc mu'yuc c'usi ti muc spase.

^15-16 Jech chac c'u cha'al la spas scotol ta atojolic c'usi lec yalojboxuc li Muc'ul Dios cu'untique, ja' no'ox jech ta spas ta atojolic noxtoc c'usi chopol yaloj me mu xach'unbeic c'usi xchapanoj ti yalojboxuc ac'o ach'unique, xchi'uc me chbat avich'ic ta muc' yan diosetique, me chbat aquejan abaic ta stojole. Jech li Muc'ul Diose chlic ilinuc ta atojolic, jech ta anil no'ox xu' chayulesoxuc o te ta alequil banamilic yo' bu laj yac'boxuque”, xut xchi'iltac li Josuee.