Josué 21 - Bible in Tzotzil de Chenalhó with Deuterocanon

Sc'oplal lumetic laj yich'ic levietic

^1-2 Li banquilaletic yu'unic ta jujuchop sbiic levietique ibat sc'opanic li pale Eleazare, xchi'uc li Josuee, xchi'uc li banquilaletic ta jujuchop sbiic li jujuchop israeletic c'alal te oyic ta Silo te ta yosilal Canaane. Jech c'ot yalbeic: “Li Muc'ul Diose jech ono'ox yalojbe Moisés ti tsc'an chavac'buncutic lumetic bu chinaquicutic xchi'uc yosilal sventa jvacaxcutic, xchi'uc sventa jchijcutic”, xutic.

³ Ja' yu'un li israeletique la svoq'uic comel jayibuc lumetic ti ja' xa yu'unique xchi'uc yosilal sventa xvacaxic xchijic jech chac c'u cha'al yaloj mantal li Muc'ul Diose.

⁴ C'alal la spasic canal tajimole, ja' ba'yuc ic'ot ta stojol li jchop sbiic levietique, ja' li coatetique, ja' smomnich'nab li Coate, ja' xnich'on pale Aarone. Ja' oxlajuneb (13) lumetic la staic te ta yosilal li boch'otic liquemic ta Judá, ta Simeón, xchi'uc ta Benjamine.

⁵ Li yantic xnich'nabtac Coate ja' la staic lajuneb lumetic te ta yosilal li jchop liquemic ta Efraín, ta Dan, xchi'uc li o'lol jchop liquemic ta Manasese.

⁶ C'alal ilaj le'e, ja'o ic'ot ta stojolic li yan jchop sbiique; ja' li smomnich'nabtac Gersone. Ja' oxlajuneb (13) lumetic la staic te ta yosilal jchop liquemic ta Isacar, ta Aser, ta Neftalí, xchi'uc li yan o'lol jchop liquemic ta Manasés ti te oyic ta Basane.

⁷ Li yan jchop sbiic, ja' li smomnich'nabtac Merarie, ja' la staic lajchab (12) lumetic te ta yosilal li jchop liquemic ta Rubén, ta Gad, xchi'uc ta Zabulone.

⁸ Li israeletique la spasic canal tajimol ec ti c'alal la svoq'uic lumetic yu'unic xchi'uc yosilal ta sventa li levietique yu'un jech albil yu'un Muc'ul Dios li Moisese.

⁹ Li jchop liquemic ta Judá xchi'uc ta Simeone ja' laj yac'beic lumetic yu'unic

¹⁰ li coatetique, ja' li smomnich'nab Aarón ti liquemic ta Levie, yu'un ja' iloc' yu'unic li sba canal tajimole. Li lumetic laj yaq'uic li Judá xchi'uc Simeone

¹¹ ja' li lum Quiriat-arba, ja' li Hebrón yan sbi ti te oy ta toyolaltic ta yosilal Judae. Ja' li jun lum ti lec to'ox ich'bil ta muc' yo' bu nacalic smomnich'nabtac li muc'ta vinic Anaque. Laj yac'beic yosilal noxtoc sventa chve' ts'unub yovolic.

¹² Pero scotol li yan yosilal lum le'e xchi'uc li tsobtsobnaetic yu'une ja' yu'un icom o li Caleb, xnich'on Jefone.

¹³ Ja' yu'un li lum Hebrone, ja' li snac'ubbail boch'o chmilvanique, ja' laj yich'ic li smomnich'nabtac Aarone, xchi'uc laj yich'ic noxtoc yantic lumetic yu'un. Ja' Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta, xchi'uc Bet-semes. Li baluneb lumetic le'e oy yosilal sventa te chve' xvacaxic xchi'uc xchijic.

¹⁷ Li jchop liquemic ta Benjamine ja' laj yaq'uic lum Gabaón, Geba,

¹⁸ Anatot, xchi'uc Almón. Ja' chanib lumetic xchi'uc jutuc yosilal.

¹⁹ Ta scotol li lumetic laj yich'ic li paleetic, ja' li smomnich'nabtac Aarone, ja' oxlajuneb (13) ta scotol xchi'uc yosilaltac li jujun lume.

²⁰ Li yan jchop sbiic levietic ti mu'yuc to staoj lumetic yu'unique, ja' li yan smomnich'nabtac Coate, ja' te ic'ot ta stojolic ta yosilal Efraín.

²¹ Xchi'uc ja' i'ac'batic noxtoc li lum Siquem te ta vitsetic yu'un Efraine, ja' li snac'ubbail boch'o chmilvanique, xchi'uc lum Gezer,

²² Kibsaim, xchi'uc Bet-horón. Ja' chanib lumetic xchi'uc yosilaltac.

²³ Ta yosilal li jchop liquemic ta Dane ja' laj yich'ic li lum Elteque, Gibetón,

²⁴ Ajalón, xchi'uc Gat-rimón. Ja' chanib lumetic ta scotol xchi'uc jutuc yosilaltac.

²⁵ Ta yosilal li o'lol jchop liquemic ta Manasese, chib lum te laj yich'ic; ja' Taanac, xchi'uc Gat-rimón, xchi'uc jutuc yosilaltac.

²⁶ Li coatetique ja' lajuneb lumetic laj yich'ic xchi'uc jutuc yosilaltac.

²⁷ Li yan levietic, ja' li smomnich'nabtac Gersone, ja' i'ac'batic li chib lumetic te ta yosilal o'lol jchop liquemic ta Manasese, xchi'uc jutuc yosilaltac. Li chib lumetique ja' Colán te ta Basán xchi'uc lum Beestera; ja' chtun yu'unic sventa snac'ubbailic.

²⁸ Te ta yosilal jchop liquemic ta Isacare ja' laj yich'ic lum Cisón, Daberat,

²⁹ Jarmut, xchi'uc En-ganim. Ja' chanib lumetic ta scotol xchi'uc yosilaltac.

³⁰ Te ta yosilal jchop liquemic ta Asere ja' laj yich'ic lum Misael, Abdón,

³¹ Helcat, xchi'uc Rehob. Ja' chanib lumetic ta scotol xchi'uc yosilaltac.

³² Te ta yosilal jchop liquemic ta Neftalie ja' laj yich'ic lum Cedes te ta Galilea; ja' chtun sventa snac'ubbailic, xchi'uc lum Hamot-dor, xchi'uc Cartán. Ja' oxib lumetic ta scotol xchi'uc yosilaltac.

³³ Ta scotol li lumetic laj yich'ic smomnich'nabtac Gersón ta jujuchop sbiique ja' oxlajuneb (13) ta scotol xchi'uc yosilaltac.

³⁴ Li yan jchop sbiic levietic, ja' li smomnich'nabtac Merari ti mu'yuc to yich'oj slumalique, ja' te laj yich'ic ta yosilic li jchop liquemic ta Zabulone; ja' Jocneam, Carta,

³⁵ Dimna, xchi'uc Naalal. Ja' chanib lumetic ta scotol xchi'uc sve'ub sts'unub yovolic.

³⁶ Te ta yosil li jchop liquemic ta Rubene ja' laj yich'ic lum Beser, Jahaza,

³⁷ Cademot, xchi'uc Mefaat. Ja' chanib lumetic ta scotol xchi'uc sve'ub sts'unub yovolic.

³⁸ Te ta yosil li jchop liquemic ta Gade ja' laj yich'ic lum Ramot te ta Galaad sventa chtun ta snac'ubbailic, xchi'uc Mahanaim,

³⁹ Hesbón, xchi'uc Jazer; ja' chanib lum ta scotol xchi'uc sve'ub sts'unub yovolic.

⁴⁰ Ti c'u yepal lumetic laj yich'ic ta scotol li smomnich'nabtac Merari ta jujuchop sbiique ja' lajchab (12) ta scotol.

⁴¹ Ti c'u yepal lumetic laj yich'ic ta scotol li levietique ja' vaxquib yoxvinic (48) ta scotol xchi'uc yosilaltac jujun lum. Ja' te laj yich'ic ta yosilic scotol li jaychop israeletique.

⁴² Li jujun lumetic le'e oy yosilal ta joyob. Co'ol yepal yosilal laj yich' ac'bel li jujun lumetique.

Li Muc'ul Diose jbel xc'opoj, mu sna' sjelilan sc'op

⁴³ Li Muc'ul Diose ja' jech laj yac'be yich'ic yosilic li israeletique yu'un jech ono'ox yalojbe ta jamal li smoltotaquic ta vo'onee. Jech laj yich'ic; te inaquiic o.

⁴⁴ Li Muc'ul Diose la spajes scotol c'op te ta scotol li yosilalique, jech mu'yuc xa pleito laj ya'yic; jun no'ox yo'ntonic yu'un jech ono'ox yaloj. Muc stsalatic yu'un li yajcontraique yu'un te la xchi'in ta stsalel scotol.

⁴⁵ Scotol li c'usi yalojbe ono'ox israeletic li Muc'ul Diose ic'ot ta pasel yu'un scotol, me jbeluc mu'yuc xlaj sc'oplal.