Josué 20 - Bible in Tzotzil de Chenalhó with Deuterocanon

La svoq'uic comel lumetic sventa snac'ubbailic

¹ Li Muc'ul Diose la sc'opan li Josuee, jech laj yalbe:

² “Albo scotol achi'iltac ti ac'o st'ujic comel lumetic sventa anac'ubbailic jech chac c'u cha'al calojbe ono'ox li Moisese.

³ Yu'un me oy boch'o tsmil junuc xchi'il ti muc yaleluc la smile, xu' te chbat snac' sba ti me chpacbat yu'un yuts' yalal li boch'o ichame.

⁴ Li boch'o chbat sa' snac'ubbail te ta lumetic le'e ac'o c'ot xchol lec ya'yej ta stojol li banquilaletic te ta sti' coralton yu'un lume. Jech li banquilaletique ac'o yotesic; ac'o yac'beic sna bu xu' chnaqui.

⁵ Pero me nutsbil batel yu'un yuts' yalal li boch'o ichame, li banquilaletique mu me xaq'uic ta c'abal li boch'o imilvane yu'un muc yaleluc la smil, xchi'uc mu yu'unuc oy sc'ac'al yo'nton yu'un.

⁶ Li boch'o chmilvane tsc'an te tsnac' sba o, ja' to me laj yich' chapanel ta stojol scotol li yajvaltac lume, xchi'uc me icham li banquilal pale ti tiq'uil ta abtel c'alal la sta smule. Ts'acal xu' xa tsut batel ta sna ta slumal stuc ti bu ono'ox ijatov loq'uel tale”, x'utat yu'un Dios li Josuee.

⁷ Jech li israeletique ja' la st'ujic ta snac'ubbailic li lum Cedes te ta Galilea ta toyolaltic yu'un Neftalí, xchi'uc lum Siquem te ta vitsetic yu'un Efraín, xchi'uc Quiriat-arba, ja' li Hebrón yan sbie; ja' te ta vitsetic yu'un Judá.

⁸ Te ta jot uc'um Jordán ta stuq'uil sloq'ueb c'ac'al yu'un Jericoe, ja' la st'ujic comel li lum Beser te ta xocol banamil ta yosilic li jchop liquemic ta Rubene. Yan te ta yosilal Galaade, ja' la st'ujic comel li Ramot te ta yosilal jchop liquemic ta Gade. Te ta yosilal Basane, ja' la st'ujic comel li Colán te ta yosilal jchop liquemic ta Manasese.

⁹ Scotol le'e ja' snac'ubbailic la st'ujic comel ta sventa scotol li israeletique xchi'uc ta sventa li yan lum cristianoetic te xchi'inojic ta nacleje. Ja' te chbat snac' sba li boch'o tsmil xchi'il ti muc yaleluc tsmile, yu'un jech mu xpacbat sutel yu'un yuts' yalal li boch'o chchame, ja' to me ivinaj c'u x'elan ichapaj ta stojol li yajvaltac lume.