Josué 19 - Bible in Tzotzil de Chenalhó with Deuterocanon

Laj yich' yosilic jchop liquemic ta Simeón

¹ Li xchibal velta canal tajimol la spasique ja' ic'ot ta stojol li jchop liquemic ta Simeone. Ti bu la staique, ja' te xcom ta o'lol yosilalic li boch'otic liquemic ta Judae.

² Li lumetic laj yich'ique ja': Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot, xchi'uc Saruhén. Ja' oxlajuneb (13) lumetic ta scotol xchi'uc tsobtsobnaetic yu'un.

⁷ Ja' slecoj o li yantic lum laj yich'ique; ja' li Aín, Rimón, Eter, xchi'uc Asán; ja' chanib lumetic ta scotol xchi'uc tsobtsobnaetic yu'un.

⁸ Xchi'uc ja' laj yich'ic noxtoc li tsobtsobnaetic xbat c'alal ta Baalat-beer, ja' li lum Ramat te ta Negueve. Le'e ja' lumetic ic'ot ta sventaic ta jujuchop sbiic li boch'otic liquemic ta Simeone.

⁹ Ja' yu'un li yosilic jchop liquemic ta Simeone i'och to jutuc ta yut yosilalic li jchop liquemic ta Judae. Yu'un li smomnich'nabtac Judae toj ep laj yich'ic li banamile, ja' yu'un i'ac'batic jutuc yich'ic ec li boch'otic liquemic ta Simeone. Jech laj yich'beic to jutuc yosilalic li Judae.

Laj yich' yosilic jchop liquemic ta Zabulón

¹⁰ Li yoxibal velta canal tajimol la spasique ja' ic'ot ta stojolic li jchop liquemic ta Zabulone, ja' ti c'u yepal oyic ta jujuchop sbiique. Li yosilalic laj yich'ique ic'ot c'alal to ta Sarid.

¹¹ Te xbat ta stuq'uil smaleb c'ac'al c'alal ta Marala; ts'acal te xlic batel noxtoc xc'ot c'alal ta Dabeset; te xpaj ta bevo' ta stuq'uil Jocneam.

¹² Te xlic batel noxtoc ta Sarid ta sloq'ueb c'ac'al; xc'ot c'alal to ta Quislot-tabor. Te xlic batel noxtoc xjelov batel ta Daberat; te xmuy batel c'alal ta Jafía.

¹³ Te xjelov batel noxtoc; te xbat ta xocon sloq'ueb c'ac'al xc'ot ta Gat-hefer xchi'uc ta Ita-cazin; te xloc' batel ta Rimón; te xjoyij tal ta Nea.

¹⁴ Li sts'aquil ta nortee te xjoyij tal ta Hanatón; te xvul ta loq'uel ta stenlejaltic Jefte-el.

¹⁵ Ti c'u smuc'ul banamil le'e oy lajchab (12) lumetic xchi'uc tsobtsobnaetic yu'un ti te no'ox nopolique xchi'uc li yantic lumetic li'i: Catat, Naalal, Simrón, Idala, xchi'uc Belén.

¹⁶ Li banamil le'e xchi'uc li lumetique ja' yu'unic ic'ot li jchop liquemic ta Zabulone, ja' ti c'u yepal oyic ta jujuchop sbiique.

Laj yich' yosilic jchop liquemic ta Isacar

¹⁷ Li xchanibal velta canal tajimol la spasique ja' ic'ot ta stojolic li jchop liquemic ta Isacare, ja' ti c'u yepal oyic ta jujuchop sbiique.

¹⁸ Li yosilalic laj yich'ique ja' jech sbi li lumetic yu'une: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada, xchi'uc Bet-pases.

²² Li sts'aquile xc'ot c'alal ta Tabor, ta Sahazima, xchi'uc ta Bet-semes. Te xpaj ta uc'um Jordán. Ja' vaclajuneb (16) lumetic ta scotol xchi'uc tsobtsobnaetic yu'un.

²³ Le'e ja' yu'unic icom li jchop liquemic ta Isacare, ja' ti c'u yepal oyic ta jujuchop sbiique. Xchi'uc ja' laj yich'ic li lumetique xchi'uc li tsobtsobnaetic yu'une.

Laj yich' yosilic jchop liquemic ta Aser

²⁴ Li yo'obal velta canal tajimol la spasique ja' ic'ot ta stojolic li jchop liquemic ta Asere.

²⁵ Ja' la staic scotol li lumetic li'i: Helcat, Halí, Betén, Acsaf,

²⁶ Alamelec, Amad, xchi'uc Miseal. Xc'ot c'alal ta Carmelo ta smaleb c'ac'al xchi'uc ta Sihor-libnat.

²⁷ Te xjoyij tal sts'aquil ta sloq'ueb c'ac'al ta Bet-dagón; xc'ot ta Zabulón c'alal ta stenlejaltic Jefte-el ta stuq'uil norte. Te xbat ta Bet-emec xchi'uc ta Neiel; te xc'ot ta loq'uel ta Cabul ta norte.

²⁸ Ja' laj yich'ic noxtoc li lum Hebrón, Rehob, Hamón, xchi'uc Caná c'alal to ta muc'ta lum Sidón.

²⁹ Li sts'aquil te xlic batele te xjoyij tal ta stuq'uil Ramá xchi'uc c'alal ta jun lum Tiro ti lec setbil ta tsatsal coraltone. Te xjoyij batel ta stuq'uil Hosa; te xloc' ta muc'ta Nab Mediterráneo c'alal ta yosilal Aczib.

³⁰ Ja' la staic noxtoc li lum Uma, Afec, xchi'uc Rehob. Ta scotol oy chib xcha'vinic (22) lumetic xchi'uc tsobtsobnaetic yu'un.

³¹ Le'e ja' yosilalic ic'ot li jchop liquemic ta Asere, ja' ti c'u yepal oyic ta jujuchop sbiique.

Laj yich' yosilic jchop liquemic ta Neftalí

³² Li svaquibal velta canal tajimol la spasique ja' ic'ot ta stojolic li jchop liquemic ta Neftalie.

³³ Li yosilalique xlic ta Helef, xjelov ta Alón-saananim, ta Adami-neceb xchi'uc ta Jabneel c'alal to ta Lacum; te xloc' batel ta Jordán.

³⁴ Li sts'aquil ta smaleb c'ac'ale te xbat ta Aznot-tabor xchi'uc ta Hucoc. Ts'acal te xbat ta stuq'uil sur; ja' stsacoj sbaic xchi'uc li yosilal jchop liquemic ta Zabulone. Yan ta smaleb c'ac'ale ja' stsacoj sba xchi'uc yosilic li jchop liquemic ta Asere. Ta sloq'ueb c'ac'ale te to xpaj ta uc'um Jordán.

³⁵ Li lumetic la staic ti lec tsotsic pasbile ja': Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat, xchi'uc Bet-semes. Ja' balunlajuneb (19) lumetic ta scotol xchi'uc tsobtsobnaetic yu'un.

³⁹ Le'e ja' yosilalic ic'ot li jchop liquemic ta Neftalie, xchi'uc ja' yu'unic ic'ot li lumetique xchi'uc li tsobtsobnaetic yu'une. Ja' jech yepal la staic ti c'u yepal oyic ta jujuchop sbiique.

Laj yich' yosilic jchop liquemic ta Dan

⁴⁰ Li svucubal velta canal tajimol la spasique ja' ic'ot ta stojolic ta jujuchop sbiic li jchop liquemic ta Dane.

⁴¹ Li yosilalic la staique ja' te oy li lumetic li'i: Zora, Estaol, Ir-semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bene-berac, Gat-rimón,

⁴⁶ Mejarcón, xchi'uc Racón, xchi'uc yosilal te ta yeloval Jope.

⁴⁷ Ti c'u yepal laj yich' yosilic li jchop liquemic ta Dane, muc xcom ta yu'unic o scotol, jech imuyic batel ta lum Lesem, bat stsalbeic scotol li yajvale; la smilic comel ta espada scotol. Ja' laj yich'beic o comel li yosilalique; te inaquiic o. Li lum Lesem to'oxe, Dan laj yac'beic sbi; ja' li sbi smoltotic ta vo'onee.

⁴⁸ Le'e ja' yosilalic ic'ot li jchop liquemic ta Dane, ja' ti c'u yepal oyic ta jujuchop sbiique. Ja' laj yich'ic li lumetique xchi'uc li tsobtsobnaetic yu'une.

Ja' sc'oplal c'alal laj yich' yosil li Josuee

⁴⁹ C'alal laj xa yich' yosilic scotol li jaychop israeletique, lic yac'beic yosil ec li Josué te ta o'lol yosilal stuquique.

⁵⁰ Li Josuee ja' la sc'an li lum Timnat-sera te ta toyolaltic yu'un Efraine. Jech laj yac'beic, yu'un jech ono'ox yaloj li Muc'ul Diose. Li Josuee la xcha'meltsan lec li lume; te inaqui o.

⁵¹ Le'e ja' scotol li banamil ti laj yac' ta pasel ta canal tajimol li pale Eleazare, xchi'uc li Josuee, xchi'uc li banquilaletic yu'un israeletique. Te la spasic canal tajimol ta stojol Muc'ul Dios scotol li jaychop israeletic ta ti'ch'ulna pasbil ta nucul te ta Siloe. Jech ivu' yu'unic svoq'uel li banamile.