Josué 18 - Bible in Tzotzil de Chenalhó with Deuterocanon

Sc'oplal yosilic li yantic jujuchop israeletique

¹ Scotol li yalab xnich'nab Israele te la stsob sbaic ta Silo; te la snacanic li ch'ulna yu'un Dios pasbil ta nucule. Yu'un li banamile i'och xa ta sc'obic o,

² ac'o me oy to vucchop israeletic mu'yuc voc'bil li yosilique.

³ Li Josuee jech laj yalbe scotol li israeletique: “¿Baq'uin to chamalaic ch-och ta ac'obic li banamil ti yac'ojboxuc Muc'ul Dios, ja' li Dios yu'un jmoltotactic ta vo'onee?

⁴ Ja' lec t'ujic oxib vinic ta jujuchopoxuc sventa ta jtaquic batel yu'un ac'o bat sq'uelic tal c'u x'elan li banamile, yu'un jech xu' chvul yalbicun ca'ay c'u x'elan xu' chich' voq'uel.

⁵ Ja' ac'o svoq'uic ta vucvoc'. Li yosilal jchop liquemic ta Judae te ac'o comuc ta sur. Li yosilal smomnich'nab Josee te ac'o comuc ta norte.

⁶ C'alal me laj xa svoq'uic ta vucvoc' li banamile, ts'acal ac'o tal yalbicun, jech vu'un ta xcac' apasic canal tajimol ta stojol li Muc'ul Dios cu'untique.

⁷ Li levietique mu'yuc chich' voc'bel yosilic jech chac c'u cha'al li vo'oxuque. Li c'usi ja' yu'unique ja' li paleal ta stojol Diose. Li jchop liquemic ta Gad, ta Rubén, xchi'uc li o'lol jchop liquemic ta Manasese te xa staoj comel yosilic le' ta jot uc'um Jordán ta sloq'ueb c'ac'ale. Ja' ti i'ac'batic ono'ox comel yu'un Moisese, ja' li yajtunel Muc'ul Diose”, xut.

⁸ Jech ibatic li viniquetique, bat svoq'uic li osile. C'alal mu'yuc to chbatique, jech i'albatic batel yu'un li Josuee: “Bat voq'uic scotol li osile; ts'acal xatalic li' ta jtojol. Vu'un ta xcac' apasic canal tajimol ta stojol Muc'ul Dios te ta Silo”, xut.

⁹ Jech li viniquetique ibat xpaxaltaic tal scotol c'u x'elan li banamile. La svoq'uic ta vucvoc' li lumetique; la sts'ibaic tal ta vun scotol. Ts'acal isutic tal ta scarpanaic ta Silo yo' bu oy li Josuee.

¹⁰ Li Josuee lic svoc' scotol li banamil c'alal te oy ta Siloe. Laj yac'anbe spasic canal tajimol ta stojol li Muc'ul Diose.

Sc'oplal yosilalic jchop liquemic ta Benjamín

¹¹ C'alal la spasic li sba velta canal tajimole, li jchop liquemic ta Benjamine ja' ic'ot ta stojolic li banamil ti cacal ta o'lol yu'un yosilal Judá xchi'uc Josee.

¹² Li sts'aquil yosilalique te xlic batel ta norte ta uc'um Jordán. Te xbat ta xocon norte yu'un li Jericoe. Te stsac batel li toyolaltic ta stuq'uil smaleb c'ac'ale; te xvul ta loq'uel ta xocol banamil Bet-avén.

¹³ Te xlic batel noxtoc, xbat ta stuq'uil Luz (ja' li Betel yan sbie) ta xocon sur; te xyal batel c'alal to ta Atarot-adar te ta vits ta stuq'uil sur yu'un Bet-horón ta olon.

¹⁴ Ts'acal te xjoyij tal ta smaleb c'ac'al ta xocon sur ta stuq'uil vits ta yeloval Bet-horón. Te xvul ta loq'uel ta Quiriat-baal (ja' li Quiriat-jearim yan sbie), ja' li lum comen ta sventaic jchop liquemic ta Judae. Le'e ja' li sts'aquiltac ta smaleb c'ac'ale.

¹⁵ Li sts'aquil ta sure te xlic batel ta Quiriat-jearim; te xloc' batel ta smaleb c'ac'al ta nio' yu'un Neftoa.

¹⁶ Te xyal batel noxtoc ta slajeb li vits te ta stuq'uil stenlejaltic yu'un Ben-hinome; ja' te ta stuq'uil norte yu'un li stenlejaltic Refaime. Ts'acal te xyal batel noxtoc ta stenlejaltic yu'un Hinom; te xjelov batel ta stuq'uil sur yu'un jebusetic. Ts'acal te xyal batel ta nio' yu'un Rogel.

¹⁷ Ts'acal te xjoyij tal ta stuq'uil norte; te xvul ta loq'uel ta En-semes. Ts'acal te xlic batel noxtoc. Te xbat ta Gelilot ta stuq'uil muyeltic yu'un Adumín; te xyal batel ta muc'ta ton yu'un Bohán, xnich'on Rubén.

¹⁸ Te xjelov batel ta xocon norte ta stuq'uil Arabá; te xyal batel c'alal to ta uc'um Jordán.

¹⁹ Te xjelov batel ta norte yu'un Bet-hogla; te xpaj ta stuq'uil norte ta yochebal Nab Muerto, ja' te yo' bu chcha'xolaj batel li uc'um Jordane. Le'e ja' sts'aquil te ta sur.

²⁰ Li sts'aquil ta sloq'ueb c'ac'ale ja' li uc'um Jordane. Le'e ja' sts'aquiltac yosilalic li jchop liquemic ta Benjamín ti laj yich'ic voc'bel c'u yepal oyic ta jujuchop sbiique.

²¹ Li lumetic laj yich'ic ta jujuchop sbiic li jchop liquemic ta Benjamine ja': Jericó, Bet-hogla, Emec-casis,

²² Bet-arabá, Zemaraim, Betel,

²³ Avim, Pará, Ofra,

²⁴ Quefar-haamoni, Ofni, xchi'uc Geba. Ja' lajchab (12) lumetic ta scotol xchi'uc tsobtsobnaetic yu'un.

²⁵ Ja' slecoj o li Gabaone, Ramá, Beerot,

²⁶ Mizpa, Cafira, Mozah,

²⁷ Requem, Irpeel, Tarala,

²⁸ Zela, Elef, Jebús, (ja' li Jerusalene), Gabaa, xchi'uc Quiriat. Ja' chanlajuneb (14) lum ta scotol xchi'uc tsobtsobnaetic yu'un. Le'e ja' yu'unic icom li jchop liquemic ta Benjamine, ja' ti c'u yepal oyic ta jujuchop sbiique.