Josué 17 - Bible in Tzotzil de Chenalhó with Deuterocanon

Laj yich' yosilic li jchop liquemic ta Manasese

¹ Li'i ja' li banamil ti ic'ot ta sventaic li jchop liquemic ta Manasese, ja' li banquilal xnich'on Josee. Li Maquir, ja' li banquilal xnich'on Manasese, ja' li stot Galaade, ja' jun vinic ti lec sna' paspleitoe, ja' laj yich' li osil te ta Galaad xchi'uc ta Basán ta stuq'uil sloq'ueb c'ac'al yu'un uc'um Jordane.

² Jech noxtoc li yantic xnich'nab Manasese la spasic canal tajimol ta sventa bu chc'ot ta stojolic li banamile. Ja' jech yepal laj yich'ic ti c'u yepal oyic ta jujuchop sbiique. Li xnich'nab Manasese ja' li'i: Abiezer, Helec, Asriel, Siquem, Hefer, xchi'uc Semida. Le'e ja' xnich'nab li Manasese; ja' smomnich'nab li Josee.

³ Oy jun vinic, Zelofehad sbi, ja' xnich'on Hefer. Li Hefere ja' xnich'on Galaad. Li Galaade ja' xnich'on Maquir. Li Maquire ja' li xnich'on Manasese. Pero li Zelofehade mu'yuc squeremetic; ja' no'ox oy vo'ob stsebetic; ja' Maala, Noa, Hogla, Milca, xchi'uc Tirsa.

⁴ Li tsebetique ital sc'opanic li pale Eleazar, xchi'uc Josué, xchi'uc li banquilaletic yu'un israeletique. Jech c'ot yalbeic: “Li Diose yalojbe ono'ox Moisés ti ac'o avac'buncutic cosilcutic ec te ta yo' bu chich'ic li cuts' calalcutique”, xutic. Jech li Josuee laj yac'be spuculal osilic ec te ta stojol li yuts' yalaltac stot jech chac c'u cha'al yaloj Muc'ul Diose.

⁵ Ja' yu'un li jchop liquemic ta Manasese, lajunsep laj yich'ic; ja' slecoj o li banamil yich'ojic te ta Galaad xchi'uc ta Basán te ta jot uc'um Jordane

⁶ yu'un laj yich' spuculal osilic ec li tsebetic smomnich'nab Manasés jech chac c'u cha'al laj yich' li viniquetique. Li banamil te ta Galaade ja' icom ta sventaic li yantic smomnich'nab Manasese.

⁷ Li yosilalic jchop liquemic ta Manasese te xbat ta Aser c'alal ta Micmetat ta stuq'uil Siquem. Ts'acal te xyal batel ta sur c'alal to ta yut yosilal Tapúa.

⁸ Li banamil te ta Tapuae ja' laj yich'ic li jchop liquemic ta Manasese. Pero li mero lum Tapúa te ta sts'aquil yosilic li jchop liquemic ta Manasese ja' icom ta sventaic li jchop liquemic ta Efraine.

⁹ Ts'acal te xyal batel sts'aquil ta bevo' yu'un Caná ta stuq'uil sur yu'un li bevo'e. Li lumetic yu'un Efraine te xcom ta o'lol yu'un li lumetic yu'un Manasese, ac'o me ja' yu'unic jchop liquemic ta Manasés li ts'ac ta stuq'uil norte yu'un bevo' ti te xloc' batel sti' ta nabe.

¹⁰ Li jchop liquemic ta Efraine te icomic ta sur yu'un li bevo'e. Li Manasese te icomic ta norte. Li sts'aquique ja' li muc'ta Nab Mediterraneoe. Ja' te sts'aquinoj sbaic xchi'uc li Aser te ta nortee. Yan ta sloq'ueb c'ac'ale ja' sts'aquinoj sbaic ic'ot xchi'uc li Isacare.

¹¹ Jech noxtoc li Manasese laj yich'ic jayibuc lumetic te ta yosilic Isacar xchi'uc Aser xchi'uc li tsobtsobnaetic te nopajtique. Li lumetique ja' li'i: Bet-seán, Ibleam, Dor, Endor, Taanac, xchi'uc Meguido, xchi'uc yan oxvoc' banamil.

¹² Pero li jchop liquemic ta Manasese muc xu' yu'unic la snutsic loq'uel li canaanetic te nacajtic ta lumetic le'e, yu'un li canaanetique laj yaq'uic persa jech ivu' yu'unic te icomic ta naclej.

¹³ Pero ts'acal to scotol li israeletique tsots la spasic, jech laj yaq'uic persa ti ac'o stoj spatanic li canaanetique; ja' no'ox ti muc snutsic loq'uele.

Ja' laj yich'ic toyolaltic li smomnich'nab Josee

¹⁴ Li smomnich'nabtac Josee jech laj yalbeic li Josuee: —¿C'u yu'un ti jun no'ox velta laj avac' jpascutic canal tajimole, yu'un jech jsep no'ox laj avac'bun o li cosilcutique? Yu'un li vu'uncutique epuncutic; li Muc'ul Diose yac'ojbuncutic ep bendición —xutic.

¹⁵ Itac'ov li Josuee: —Me yu'un toj epoxuque, me mu xa'ochic o ta toyolaltic yu'un li Efraine, muyanic batel ta toyolal te'tic le'e. Loq'uesbeic li ste'tical yosilal ferezetique xchi'uc li refaetique —xut.

¹⁶ Jech laj yalic: —Mu xiloc'cutic o ti c'u yepal toyolal te'tic le'e. Jech noxtoc li canaanetic te nacajtic ta stenlejaltic, ta Bet-seán, xchi'uc ta tsobtsobnaetic yu'une, xchi'uc li boch'otic te nacajtic ta stenlejaltic Jezreele oy lec scaretaic pasbilic ta taq'uin —xutic.

¹⁷ Li Josuee jech la stac'be li smomnich'nabtac Josee, ja' li yan o'lol jchop liquemic ta Manasés xchi'uc li jchop liquemic ta Efraine: —Li vo'oxuque lec jun muc'ta lumoxuc; lec xu' avu'unic, jech mu xu' ti jsep no'ox chavich' avosilique.

¹⁸ Ja' yu'un ja' avu'unic noxtoc li toyolal te'tic le'e. Ac'o tunuc avu'unic scotol. Li canaanetique vo'oxuc xu' chanutsic loq'uel ac'o me lec xu' yu'unic, ac'o me oy lec scaretaic pasbilic ta taq'uin —xut.